Foto: Dosen ISI BALI, I Gde Made Indra Sadguna, Ph.D. (kiwa), miwah Professor Elizabeth A. Clendinning saking Wake Forest University (tengen) sajeroning pemutaran perdana film dokumenter Guna Pering: The Use of Bamboo in Bali, rahina Soma (29/6) ring Ruang Vicon ISI BALI.
Institut Seni Indonesia Bali (ISI BALI) sareng Wake Forest University, Amerika Serikat ngamargiang pemutaran perdana (screening) film dokumenter Guna Pering: The Use of Bamboo in Bali ring rahina Soma (29/6) ring Ruang Vicon Gedung Citta Kelangen Lantai 2 ISI BALI. Parikrama puniki dados silih tunggil pemargi ngenenin indik diseminasi pikaryan paniletan (penelitian) kolaboratif riantara dosen ISI BALI, I Gde Made Indra Sadguna, Ph.D., sareng Professor Elizabeth A. Clendinning saking Wake Forest University.
Parikrama punika pinaka implementasi saking Memorandum of Agreement (MoA) riantara Institut Seni Indonesia Denpasar (mangkin ISI BALI) sareng Wake Forest University sane kairit (katandatanganin) ring tanggal 12 Juli 2023. Palarapan kerja sama punika, makakalih peneliti ngalimbangang riset ngenenin indik tetabuhan tradisional Bali, pamekasne suling miwah sunari, sane sampun mamargi ngawit warsa 2024.
Dosen ISI BALI, I Gde Made Indra Sadguna, Ph.D. maosang paniletan punika pemargi kapertama nenten ja lian matiosan ring aspek artistik suling Bali. Nanging sajeroning panglimbakne, tim peneliti manggihin mungguing suling punika nenten prasida kapasahang saking sunari miwah ekosistem budaya sane nglingkupin. Indik puniki raris ngalimbangang linggah pahan paniletan, nenten ja ngebahas instrumen musik pinaka benda seni kemanten, nanging taler nileti pakilitan riantara sarana pering (bambu), pemargi kreatif krama, praktik budaya, kantos nilai-nilai spiritual sane urip sajeroning krama Bali.
Manut Indra Sadguna, paniletan puniki matetujon ngenalangsang kearifan lokal Bali majeng ring krama internasional liwat pendekatan akademik miwah media visual. “Iraga mapangapti mangda sayan akeh krama global resep ring kearifan lokal Bali. Kapertama paniletan puniki wantah ngebahas suling, nanging raris kauningin mungguing suling miwah sunari punika pahan sane nenten prasida kapasahang saking kebudayaan Bali. Saking irika paniletan ngalimbang dados kajian sane sayan linggah ngenenin indik pakilitan riantara palemahan, jadma, seni, miwah Ida Sang Hyang Widhi Wasa palarapan antuk pemanfaatan pering,” sapunika baos dane.
Dane nlatarang mungguing pering sajeroning tradisi Bali nenten ja wantah sarana baku ngaryanin piranti musik kemanten, nanging madue arti filosofis sane nyihnayang pemargi konsep Tri Hita Karana, inggih punika harmoni hubungan jadma sareng Ida Sang Hyang Widhi Wasa, sesamaning jadma, miwah palemahan. Perspektif punika kaaptiang prasida ngwantu krama internasional ngresepin kebudayaan Bali pinih utuh.
Foto: Pabligbagan (Diskusi) sajeroning pemutaran perdana film dokumenter Guna Pering: The Use of Bamboo in Bali, rahina Soma (29/6) ring Ruang Vicon ISI BALI.
Kolaborasi paniletan puniki sampun ngamedalang makudang-kudang pikaryan akademik miwah kreatif. Silih tunggilan ipun inggih punika bab buku sane mamurda Crafting Harmony: Sustainable Instrument Production in Bali sane diterbitang ring warsa 2025 olih Universitätsverlag Hildesheim, Jerman. Taler, paniletan punika ngawetuang film dokumenter Guna Pering: The Use of Bamboo in Bali sane ngangkat nilai budaya, filosofi, miwah praktik keberlanjutan sajeroning pemanfaatan pering ring Bali.
Film dokumenter punika kaproduksi antuk paica saking program Wake the Arts saking Wake Forest University miwah American Institute for Indonesian Studies (AIFIS). Risampune pemutaran perdana, parikrama kelanturang antuk sesi diskusi sareng para peneliti jagi mabaosang pemargi paniletan, daging film, miwah relevansinyane majeng ring panglimbak kajian seni lan budaya Bali.
Film Guna Pering: The Use of Bamboo in Bali taler jagi kakenalang majeng krama internasional liwat penayangan sajeroning Simposium Gabungan ICTMD kelompok studi Performing Arts of Southeast Asia (PASEA) ring Chang Mai, Thailand, tanggal 2-8 Juli 2026 pinaka pahan saking mautsaha ngalimbangang jangkauan diseminasi pikaryan paniletan lintas negara. (ISIBALI/Humas)
Foto: Pimpinan ISI BALI sareng narasumber miwah peneliti sajeroning pemutaran perdana film dokumenter Guna Pering: The Use of Bamboo in Bali, rahina Soma (29/6) ring Ruang Vicon ISI BALI.
