Nyinggahang 79 Karya saking Kutus Negara
Foto: Rektor ISI BALI nyingakin pameran kriya internasional “Becoming: Prakriti–Pustaka–Padma” ring ARMA, Ubud, Redite (5/7).
Institut Seni Indonesia Bali (ISI BALI) magotong-royong sareng Agung Rai Museum of Art (ARMA) ngamargiang pameran kriya internasional mamurda “Becoming: Prakriti–Pustaka–Padma” pinaka pahan saking parikrama mikelingin 30 warsa ARMA. Pameran puniki kabuka olih Rektor ISI BALI, Prof. Dr. Wayan ‘Kun’ Adnyana, Redite (5/7), ring ARMA, Ubud.
Pameran sane kakurasi olih Jean Couteau, Wayan Seriyoga Parta, miwah Warih Wisatsana puniki dados genah urati miwah patemon para seniman kriya saking makudang-kudang negara. Wenten 50 seniman saking kutus negara, inggih punika Amerika Serikat, Belanda, Jerman, Swiss, India, Kenya, Iran, miwah Indonesia, nyihnayang 79 karya kalih miwah tigang dimensi sane nyihnayang makudang-kudang medium seni kriya.
Manggala Panitia Pameran, Prof. Dr. Wayan Suardana, nlatarang mungguing pameran puniki pinaka silih sinunggil agenda sajeroning mikelingin HUT kaping-30 ARMA sane nibenk ring tanggal 9 Juni 2026. Antuk kolaborasi sareng Program Studi Kriya ISI BALI, ARMA ngamargiang pameran kriya skala internasional sane mamargi saking tanggal 5 kantos 18 Juli 2026.
Prof. Suardana ngawewehin, sajaba kamiletin olih seniman internasional, pameran puniki taler nyarengang para dosen miwah praktisi seni saking makudang-kudang perguruan tinggi ring Indonesia, minakadi ISI Yogyakarta, ISI Surakarta, ISBI Bandung, Universitas Negeri Surabaya (UNESA), Institut Informatika Indonesia Surabaya, Universitas Muhammadiyah Bandung, Universitas Negeri Gorontalo, Universitas Bumigora Nusa Tenggara Barat, miwah sekaa seniman seni rupa Surabaya.
Foto: Pameran kriya internasional “Becoming: Prakriti–Pustaka–Padma” ring ARMA, Ubud, Redite (5/7).
Sami wenten 79 karya sane kapamerang, kakepah dados 28 karya patung keramik, 6 karya terakota, 9 guci keramik, 4 karya kriya logam, 3 keris, 6 karya wastra, 3 karya batik seni, 2 karya kriya kayu, 4 tapestri, 6 karya mixed media, 1 wayang kulit, miwah 4 instalasi.
Sajeroning atur piuningnyane, Rektor ISI BALI Prof. Dr. Wayan ‘Kun’ Adnyana ngaturang rasa angayubagia miwah apresiasi ring Program Studi Kriya ISI BALI sane dados pangawit tur sang sane ngamargiang pameran punika.
“Pameran puniki pinaka inisiatif murni saking Program Studi Kriya ISI BALI nenten wenten sokongan dana saking instansi. Puniki nyihnayang semangat makarya miwah kawagedan ngawangun papanggihan kolaborasi sane patut kabaos becik,” sapunika baos dane.
Dane nandesang mungguing seni kriya sajebag puniki sering kacingak wantah pinaka kerajinan utawi produk massal, padahal sujatinne pinaka pikolihan ngolah cipta sane embas saking pamargi lantang peradaban manusa. Manut dane, seni miwah kriya nenten dados kapasahang santukan makakalih embas saking proses ngulengang pikayunan, kreativitas, miwah ngrereh arti, antuk seni kriya madue nilai artistik miwah kawigunan.
Rektor nlatarang mungguing unteng (tema) Prakriti–Pustaka–Padma nguningayang refleksi filosofis ngenenin proses embasnyane silih tunggil karya kriya. Prakriti ngingatang mungguing palemahan (alam) pinaka wit inspirasi, material, energi, miwah kaweruhan. Pustaka nandesang mungguing kreativitas tumbuh saking tradisi intelektual, pengalaman empiris, eksplorasi teknik, miwah dialog budaya. Sajeroning punika, Padma nyihnayang pikolihan estetika sane embas saking pangresepan dalem, mawinan karya kriya madue nilai fungsional, artistik, spiritual, miwah kamanusian sane ngebekin jagat.
“Seni kriya nenten ja seni kelas kalih. Pameran puniki dados momentum nincapang kasadaran mungguing seni pinaka pahan mabuat sajeroning ngawangun peradaban. Saking palemahan embas kreativitas, malarapan antuk ilmu karya kedagingin, miwah malarapan antuk kalulutan nilai budaya kadiwarisin ring pratisentana wekas,” tegas Guru Besar Bidang Sejarah Seni puniki.
Ring galah punika, Prof. Wayan “Kun” Adnyana taler nyihnayang pamargi kerja sama internasional ISI BALI ring widang seni kriya. Dane maosang mungguing ISI BALI sampun nanganin Nota Kesepahaman sareng Hasami Tohjiki Industrial Association miwah BESTie Co., Ltd., ring Kota Hasami, Prefektur Nagasaki, Jepang. Malarapan antuk kerja sama punika, ISI BALI jagi nglimbakang skema kurikulum magang internasional sane ngicen galah ring mahasiswa muputang pelatihan basa Jepang miwah kawagedan keramik sadurung ngamargiang program magang tur makarya ring industri keramik Hasami, Jepang.
Dane taler ngaturang suksma ring kaluarga ageng ARMA antuk genah kolaborasi sane sampun kawangun, taler ring para kurator, dosen, mahasiswa, alumni, seniman sane nyarengin, panitia, miwah makasami mitra sane sampun nyokong pamargi pameran puniki.
Sajeroning punika, Sang Sané Ngadegang ARMA, Anak Agung Gde Rai, ngaturang rasa angayubagia ring ISI BALI antuk sinergi sane terus mamargi becik. Manut dane, pameran “Becoming: Prakriti–Pustaka–Padma” nenten ja wantah nyinggahang karya seni, nanging taler nyihnayang semangat mangda terus tumbuh.
Agung Rai ngaptiang pameran puniki dados saksi mungguing saking Ubud, saking Bali, iraga terus matunangan sareng jagat. Mungguing kriya nenten ja benda mati, nanging tetamian (pusaka) hidup sane terus mamargi. “Becoming nenten ja wantah murda. Punika nyihnayang proses lantang mangda terus mautsaha. Saking ipian cenik ring Ubud, ARMA tumbuh dados genah matemunne jagat sareng jiwan Bali. Spirit becoming punika sane kacingak endih sajeroning karya-kriya sane kapamerang ring rahina puniki,” sapunika baos dane. (ISIBALI/Humas)
