Foto: Riri Riza (tengen) kawisuda ring Wisuda Sarjana, Sarjana Terapan, Magister, miwah Doktor XXXIX sane kalaksanayang nuju rahina Sukra (27/2) ring Auditorium Kirtya Sabha Mahottama ISI BALI
Program Studi Seni Program Doktor ring Program Pascasarjana ISI BALI sane sampun polih akreditasi Unggul saking Badan Akreditasi Nasional Perguruan Tinggi (BAN-PT), malih nyinahang linggihnyane pinaka genah akademik sane ngembahang sang maraga pemikir miwah praktisi seni madasar antuk riset. Rekam jejak para lulusannyane nyihnayang kontribusi sane nyata ring makudang-kudang widang seni miwah kebudayaan, yadiastun punika ring widang penciptaan, pengkajian, utawi kebijakan budaya.
Ring Wisuda Sarjana, Sarjana Terapan, Magister, miwah Doktor XXXIX sane kalaksanayang nuju rahina Sukra (27/2) ring Auditorium Kirtya Sabha Mahottama ISI BALI, kalih figur publik nasional taler kakukuhang dados Doktor Seni, inggih punika sineas Riri Riza miwah aktris Zeezee Shahab. Makakalih kawisuda sareng para lulusan lianan sajeroning suasana sane khidmat tur membanggakan.
Riri Riza, sane madue wastana Mohammad Rivai Riza, kasub pinaka sutradara miwah produser sane karya-karyannyane madue sesana mabuat pisan ring panglimbak perfilman Indonesia modern. Melalantupan film-filmnyane, dane nampilang perspektif sinematik sane reflektif tur kontekstual sajeroning nureksain realitas sosial miwah budaya. Pendidikan doktoral sane kamargiang ring ISI BALI puniki dados genah mabuat anggen nincapang pamineh akademik ngeninin indik praktik kreatif sane sampun kalaksanayang, sinambi nagingin khazanah kajian seni madasar antuk pengalaman profesional.
Foto: Zeezee Shahab (tengen) kawisuda ring Wisuda Sarjana, Sarjana Terapan, Magister, miwah Doktor XXXIX sane kalaksanayang nuju rahina Sukra (27/2) ring Auditorium Kirtya Sabha Mahottama ISI BALI.
Sajeroning galah punika, Zeezee Shahab sane madue wasta jangkep Fauziah Shahab, taler resmi polih gelar Doktor Seni ring galah sane pateh. Kiprah dane ring industri seni peran miwah jagat kreatif nasional mangkin sayan kukuh madasar antuk akademik miwah riset sane teleb. Pendidikan doktoral puniki ngicenin dane galah nureksain indik praktik keaktoran miwah dinamika industri kreatif sajeroning perspektif keilmuan.
Rauhne para lulusan saking latar belakang profesional sane ngrincab puniki nyihnayang mungguing Program Studi Seni Program Doktor ISI BALI nenten ja wantah pusat pengembangan akademik semata, nanging pinaka genah dialog riantara teori miwah praktik, riantara penciptaan miwah pemikiran. Program puniki setata ngenahang raga pinaka genah ngukuhang widang pemineh, artikulasi praksis seni madasar antuk riset, tur panglimbak ilmu pengetahuan seni sane relevan ring dinamika kebudayaan kontemporer. (ISIBALI/Humas)
Foto: Rahina kaping tiga Wisuda Sarjana, Sarjana Terapan, Magister, miwah Semester Gasal Warsa Akademik 2025/2026 magenah ring Auditorium Kirtya Sabha Mahottama, ISI Bali, nuju rahina Sukra (27/2)
Institut Seni Indonesia Bali (ISI BALI) ngamargiang upacara inagurasi majeng ring 607 wisudawan sajeroning Wisuda Sarjana, Sarjana Terapan, Magister, miwah Doktor XXXVII, XXXVIII, lan XXXIX ring Semester Gasal Warsa Akademik 2025/2026 sané kalaksanaang tigang rahina, saking rahina Buda nyantos Sukra, 25–27 Februari 2026, magenah ring Auditorium Kirtya Sabha Mahottama, ISI BALI.
Pamargin wisuda sané kalaksanaang tigang rahina puniki pinaka utsaha institusi mangda prasida ngrauhang suasana wisuda sané inklusif miwah anget, ngicénin galah majeng ring para rerama miwah kulawarga wisudawan mangda prasida masanding ring sajeroning genah sané bagia puniki. Ring tengahing pamargin wisuda sané ketahnyané nenten ngicénin kulawarga ngeranjing ka gedung, ISI BALI justru ngabukak panggung sinarengan pinaka cihna rasa angayubagia sareng-sareng ring sajeroning pikolih akademik para lulusan punika.
Foto: Wisuda Sarjana, Sarjana Terapan, Magister, miwah Semester Gasal Warsa Akademik 2025/2026 magenah ring Auditorium Kirtya Sabha Mahottama, ISI BALI.
Ngunggahang tajuk “Satya-Jnana-Sukha” (Kesetiaan–Pengetahuan–Kebahagiaan), wisuda ring galah puniki ngumandhangang sasatya ngerereh kasejatian kaweruhan mabuat kabagiaan sané paripurna. Kaweruhan sané kabaosang nenten wantah pikolih intelektual semata, nanging kasejatian sané mawak seni-desain, madasar antuk inovasi digital mutakhir, saha makohtamain antuk nilai-nilai mautama ring masa sané sampun lintang.
Rektor ISI BALI, Prof. Dr. Wayan ‘Kun’ Adnyana sajeroning sambutannyané maosang, ring semester puniki, ISI BALI ngawisuda 607 wisudawan sané kepah dados 558 lulusan Program Sarjana miwah Sarjana Terapan, 30 lulusan Program Magister, miwah 19 lulusan Program Doktor. Momentum wisuda puniki kadedikasikang pinaka altar pengakuan antuk karahayuan para mahasiswané nuntasang studi antuk rasa tanggung jawab sané ageng. Majeng ring lulusan magister miwah doktor, inagurasi gelar puniki dados mimbar paripurna nyihnayang kepakaran seni, desain, miwah budaya, saha pinaka peneguhan perjuangan nincapang nilai-nilai hakiki kauripan.
Pikolih akademik semester puniki taler kapatri sajeroning rekam jejak kerja sama sané sayan galang. Sawatara 479 mitra bereputasi sané ngeranjing ring ekosistem ISI BALI Berdampak—ngawit saking jagat usaha miwah industri, studio seniman-desainer profesional, nyantos lembaga jejaring global—masikian memajukan institusi. Sangkaning komitmen mebagi kaweruhan autentik miwah cita pemajuan sareng-sareng, ISI BALI ngicen penghargaan Sewaka Kerthi Mahawidya Nugraha sajeroning Pasamuan Widya Mahardika ring rahina Sukra, 20 Februari 2026.
Foto: Wisuda Sarjana, Sarjana Terapan, Magister, miwah Semester Gasal Warsa Akademik 2025/2026 magenah ring Auditorium Kirtya Sabha Mahottama, ISI BALI.
Pinaka tatujun nincapang relevansi, jaminan mutu, miwah daya saing sajeroning kontribusi nuju transformasi sosial, budaya, miwah ekonomi bangsa, ISI BALI ngwangun Kurikulum ISI BALI Berdampak. Kurikulum puniki kaputusang madasar antuk Peraturan Rektor Nomor 3 Warsa 2026 majeng ring Program Sarjana miwah Peraturan Rektor Nomor 4 Warsa 2026 majeng ring Program Sarjana Terapan, sané mamayung ring Peraturan Menteri Diktisaintek Nomor 39 Warsa 2025 ngeninin Penjaminan Mutu Pendidikan Tinggi. Kurikulum punika dados haluan majeng ring para mahasiswa mangda prasida dados seniman, desainer, wirausahawan, peneliti-kritikus, miwah pendidik seni sané berjiwa Pancasila—kreatif, inovatif, bernalar kritis, saha nyunjung nilai kemanusiaan, palemahan, miwah kearifan luhur Indonesia.
Ngiringin pikolih akademik miwah kerja sama, sivitas ISI BALI taler ngrauhang pembaruan genah miwah simbol institusi saking pembangunan ikon-ikon anyar minakadi Tugu Batu, Gerbang Bancingah, Panggung Candi, nyantos Jineng Keluhuran. Sajeroning dudonan Wisuda miwah Dies Natalis kaping-23, ISI BALI taler nyembahang buku ‘Artistika Rupa Paraga’ pinaka sumbangsih keilmuan majeng ring krama akéh.
Prestasi kelembagaan taler nyinahang pamargin punika. Ring panguntat warsa 2025, ISI BALI polih Gold Winner Anugerah Kerja Sama Diktisaintek kategori Kerja Sama Industri Terbaik, Silver Winner Anugerah Humas Diktisaintek, Bronze Winner kategori Kerja Sama Internasional Terbaik, miwah peringkat tiga nasional Nilai Kinerja Anggaran 2025 kategori Perguruan Tinggi Satker.
Pinaka pamuput raosnyané, Prof. Kun Adnyana ngaturang rahajeng majeng ring makasami wisudawan miwah para rerama sangkaning karahayuan nuntasang studi. “Antuk rasa bangga, titiang ngelepas Akademia Cemerlang Dunia. Daya cendikiané ngarum raya, saking mangkin nyantos wekas. Saking rikala tali toga kapindahang ka tengen, para lulusané resmi dados pahan saking kulawarga ageng alumni kebanggan ISI BALI, sayaga ngabdi, makarya, miwah nincapang kauripan antuk seni, desain, miwah budaya,” baos dané. (ISIBALI/Humas)
Foto: Panegteg Dies Natalis sane mamurda “Kita Jiwa Kata” sajeroning Malam Puitika miwah Artistika ring Auditorium Kirtya Sabha Mahottama, Gedung Citta Kelangen ISI BALI, nuju rahina Buda (25/2) wengi.
Sajeroning nyihnayang linggih Dies Natalis XXIII Warsa 2026, Institut Seni Indonesia Bali (ISI BALI) ngamargiang Panegteg Dies Natalis sane mamurda “Kita Jiwa Kata” ring sajeroning Malam Puitika miwah Artistika, magenah ring Auditorium Kirtya Sabha Mahottama, Gedung Citta Kelangen ISI BALI, nuju rahina Buda (25/2) wengi. Parikrama puniki dados genah reflektif anggén nyanggra ‘kata’ pinaka dewan (ruh) pangriptan miwah pangajian seni.
Silih tunggil acara utama sane kamargiang inggih punika bedah buku Artistika Rupa Paraga sane ngerauhange kurator seni rupa Arif B. Prasetyo, akademisi Prof. Dr. Gede Yudarta, miwah Prof. Dr. Anak Agung Gede Rai Remawa pinaka narasumber, tur kamargiang olih Prof. Dr. Komang Sudirga pinaka moderator. Papidarta punika ngulas sapunapi paukudan seni nenten ja wantah rupa sane kanten, nanging taler pinaka pamineh sane prasida kabaosang tur dipertanggungjawabkan (kapaidartayang) manut ring dasar-dasar ilmiah.
Foto: Bedah buku Artistika Rupa Paraga sajeroning Malam Puitika miwah Artistika, magenah ring Auditorium Kirtya Sabha Mahottama, Gedung Citta Kelangen ISI BALI, nuju rahina Buda (25/2).
Ring galah punika taler kamargiang panyukra (penyerahan) buku secara simbolik majeng ring perwakilan Dewan Pertimbangan, Kepala Unit Penunjang Akademik Perpustakaan, miwah sang sane polih penghargaan Bali Bhuwana Nata Kerthi Nugraha pinaka cihna diseminasi kaweruhan tur nindihang literasi akademik ring sajeroning lingkungan kampus.
Kahanan wengi punika sayan ledang tur khidmat rikala kawentenan pawaosan puisi olih Duta Besar Luar Biasa dan Berkuasa Penuh RI antuk Kazakhstan, Dr. Mochammad Fadjroel Rachman, sastrawan Warih Wisatsana, miwah sineas Riri Riza. Karauhan para tokoh punika nindihang yan ‘kata’ madue daya urip sane prasida ngelintangin wates disiplin ilmu miwah profesi.
Foto: Pawaosan Puisi olih Duta Besar Luar Biasa dan Berkuasa Penuh RI antuk Kazakhstan, Dr. Mochammad Fadjroel Rachman sajeroning Malam Puitika miwah Artistika ring Auditorium Kirtya Sabha Mahottama, Gedung Citta Kelangen ISI BALI, nuju rahina Buda (25/2).
Rektor ISI BALI, Prof. Dr. Wayan “Kun” Adnyana, maosang yan resepsi Dies Natalis puniki mateges pinaka utsaha nyanggra ‘kata’ pinaka panyinahan jiwa. “Kata punika pinaka dasar iraga ngerastiti. Sareng 24 dosen doktor pangriptan miwah pangajian seni, iraga ngerumusang sapunapi kaukudan siki karya prasida kabaosang antuk kata, raris kakemas sajeroning Artistika Rupa Paraga. Rupa mateges sane kanten, paraga mateges sane prasida kamanunggalang ring raga, ngalir dados ambe (gerak) tur dados sasolahan,” kadi punika baos idané. (ISIBALI/Humas)
Foto: Penyerahan Paican Penghargaan Sewaka Kerthi Mahawidya Nugraha Warsa 2026 majeng ring Mitra ISI BALI sane Mapidabdab, Sukra (20/2) ring Auditorium Kirtya Sabha Mahottama, ISI BALI.
Institut Seni Indonesia Bali (ISI BALI) micayang Paican Penghargaan Sewaka Kerthi Mahawidya Nugraha Warsa 2026 majeng ring 479 Mitra ISI BALI sane Mapidabdab ring sajeroning Pasamuan Widya Mahardika sane mamurda Kerthi–Jnana–Kwya (Cemerlang Jiwa Cendekia), ring rahina Sukra (20/2) magenah ring Auditorium Kirtya Sabha Mahottama, ISI BALI. Paican penghargaan puniki pinaka cihna apresiasi majeng ring kontribusi nyata para mitra sane sampun nyokong pangwerdi akademik, jejaring profesional, tur panglimbak kapasitas para mahasiswanyane.
Ring sajeroning sambrama wacanannyane, Rektor ISI BALI, Prof. Dr. Wayan ‘Kun’ Adnyana, negasang mungguing Paican Penghargaan Sewaka Kerthi Mahawidya Nugraha puniki katurang majeng ring para mitra sane mapidabdab, sane sampun micayang kaweruhan, pangalaman, jejaring, miwah kedeh kayunnyane mapatunggalan sareng sivitas akademika. Manut keneh dane, sinergi sane kawangun pantaraning kampus miwah mitra eksternal puniki dados energi mabuat sane nyokong ISI BALI mangda sayan percaya diri pinaka institusi seni sane adaptif tur relevan.
Sakatah 479 mitra sane polih paican penghargaan puniki mawit saking makudang-kudang widang miwah sektor sane sampun mabuat pisan mapatunggalan sareng ISI BALI, sajeroning parikrama akademik, praktik profesional, riset, miwah pengabdian majeng ring krama. Pangrauh parajana puniki kabaos prasida ngicenin kawigunan ageng ring ekosistem mlajah sane madasar antuk praktik miwah kolaborasi.
Foto: Pasamuan Widya Mahardika sane mamurda Kerthi–Jnana–Kwya (Cemerlang Jiwa Cendekia), ring rahina Sukra (20/2) magenah ring Auditorium Kirtya Sabha Mahottama, ISI BALI.
Ring galah punika, kalih perwakilan mitra maosin testimoni. Defria Amelia Kirana, Mitra Fakultas Seni Rupa miwah Desain, maosang mungguing kolaborasi sareng ISI BALI ngicenin galah mababaosan kreatif sane saling nyokong pantaraning dunia profesional miwah kampus. Sinambi punika, I Gusti Bagus Matra, Mitra Fakultas Seni Pertunjukan, ngwedarang rasa bangga prasida sareng nyokong parikrama pambinaan tur maderbe galah maosin pangalaman sareng para mahasiswanyane pinaka katurunan seni ring masa sane jagi rauh.
Ring sajeroning parikrama sane pateh, ISI BALI taler micayang Paican Penghargaan Sewaka Nata Kerthi Nugraha, penganugerahan majeng ring Pengabdi Seni Bereputasi, katurang ring Made Subrata alias Petruk, seniman teater tradisional, miwah Sukanta Wahyu, pematung sane satia makarya tur ngicenin kontribusi ring panglimbak seni rupa. Taler mungguing punika, penghargaan Sewaka Mahabakti Nugraha katurang majeng ring nemnem diri pegawai purna tugas antuk dedikasi miwah pengabdian sane utama ri kala ngalaksanayang swadharma ring lingkungan ISI BALI. (ISIBALI/Humas)
Foto: Jajaran pimpinan ISI BALI kasarengin Asesor BAN-PT miwah tim akreditasi Prodi Tata Kelola Seni Program Magister ISI BALI, Sukra (20/2) ring Gedung Desain Hub ISI BALI.
Program Studi Tata Kelola Seni Program Magister, Program Pascasarjana Institut Seni Indonesia Bali (ISI BALI) ngamargiang Asesmen Lapangan Akreditasi saking Badan Akreditasi Nasional Perguruan Tinggi (BAN-PT), ring rahina Sukra (20/2) magenah ring Gedung Desain Hub ISI BALI. Parikrama puniki dados pidabdab sane mabuat pisan sajeroning proses akreditasi nindihin mutu panyeledia pendidikan mangda manut ring standar nasional pendidikan tinggi.
Tim asesor sané rauh sajeroning asesmen lapangan puniki wantah Prof. Dr. phil. Yudi Sukmayadi, M.Pd. miwah Dr. Agung Eko Budiwaspada, M.Sn., kasarengin staf BAN-PT Dwi Sakti Nugroho. Pangrauh tim asesor kasanggra langsung olih jajaran pimpinan ISI BALI, minakadi Rektor Prof. Dr. I Wayan ‘Kun’ Adnyana, Wakil Rektor Bidang Akademik miwah Sistem Informasi Prof. Dr. AA. Gde Bagus Udayana, Wakil Rektor Bidang Perencanaan, Keuangan, miwah Umum Dr. Made Jodog, tur Wakil Rektor Bidang Kemahasiswaan miwah Kerja Sama Prof. Dr. Komang Sudirga. Taler rauh Kepala Biro Umum miwah Keuangan Dr. Gusti Ngurah Sudibya miwah Kepala Biro Akademik, Kemahasiswaan, Perencanaan, miwah Kerja Sama Dr. Komang Arba Wirawan.
Foto: Asesmen Lapangan Akreditasi saking BAN-PT, Sukra (20/2) magenah ring Gedung Desain Hub ISI BALI.
Pamargin asesmen puniki kasayagayang olih Unit Pengelola Program Studi (UPPS) Program Pascasarjana ISI BALI sareng tim akreditasi sané kamanggala olih Direktur Pascasarjana Nyoman Dewi Pebryani, Ph.D., kasarengin Wakil Direktur Dr. Wayan Ardini, M.Si., Koordinator Prodi Tata Kelola Seni Program Magister Dr. Wayan Agus Eka Cahyadi, taler Ketua Lembaga Penjaminan Mutu Pendidikan dan Pengembangan Pembelajaran (LPMPP) Prof. Dr. Wayan Setem.
Rektor ISI BALI, Prof. Dr. I Wayan ‘Kun’ Adnyana, sajeroning daging panyambrama ngaturang rasa angayubagia miwah panyambrama becik pisan majeng ring tim asesor BAN-PT. Dané maosang indik akreditasi puniki pinaka bukti komitmen institusi sajeroning nindihin mutu miwah kualitas Program Studi Tata Kelola Seni Program Magister mangda setata manut ring standar sané sampun kacumawisang olih BAN-PT.
Manut Prof. Kun Adnyana, makasami dokumen miwah data sané kaperluang sajeroning proses asesmen puniki sampun kasayagayang becik pisan olih Prodi Tata Kelola Seni kasarengin UPPS. Guru Besar Sejarah Seni punika mapangapti mangda pamargin asesmen puniki mamargi antar tur molihang hasil sané pinih becik majeng ring program studi.
Foto: Asesmen Lapangan Akreditasi saking BAN-PT, Sukra (20/2) magenah ring Gedung Desain Hub ISI BALI.
Parikrama Asesmen Lapangan puniki madué tatujon utama sajeroning nureksain kelayakan miwah kualitas pamargin program studi sané jangkep, minakadi aspek tata kelola, kramaning sumber daya manusia, kurikulum, penelitian, pengabdian majeng ring krama, miwah luaran taler capaian paplajahan. Malarapan antuk proses puniki, program studi molihang panyeledia (masukan) sané becik pisan pinaka dasar nglimbakang paridabdab sané berkelanjutan miwah nincapang sistem penjaminan mutu internal.
Sajaba sesi sareng UPPS, tim asesor taler ngamargiang paruman sareng pelaksana penjaminan mutu internal, alumni miwah sang sané nganggén lulusan (pengguna lulusan), mahasisya, dosen, taler tenaga kependidikan. Rangkaian sesi puniki matatujon mangda polih gambaran sané jangkep indik tata kelola, proses paplajahan, luaran, miwah kontribusi program studi majeng ring kaperluan jagat karya miwah krama.
Sajeroning galah punika, Prof. Dr. phil. Yudi Sukmayadi, M.Pd. maosang indik Program Studi Tata Kelola Seni madué linggih sané unik tur mabuat pisan ring Bali. Kautaman punika magenah ring dwaning prodi puniki dados kreteg sajeroning nyambungang praktik seni, manajemen, taler nglestariang budaya lokal sané dados jati raga (identitas) Pulo Bali. Prodi puniki kasokong olih kerajengan tradisi seni, ekosistem budaya sané urip, taler panyeledia saking krama miwah sang sané ngamargiang seni, mawinan dados laboratorium nyata sajeroning nglimbakang tata kelola seni sané madasar antuk kearifan lokal.
Siosan ring punika, program studi puniki kasokong olih para dosen sané mautama, sané akéhan sampun dados guru besar miwah akademisi sané sampun wikan (berpengalaman) ring widang seni miwah manajemen budaya. Paica sarana miwah prasarana sané becik pisan taler dados panyokong utama sajeroning proses paplajahan, penelitian, miwah pengabdian majeng ring krama.
Foto: Asesmen Lapangan Akreditasi saking BAN-PT, Sukra (20/2) magenah ring Gedung Desain Hub ISI BALI.
Asesor Dr. Agung Eko Budiwaspada, M.Sn. maosang indik malarapan antuk sesi wawancara sareng mahasisya, alumni, miwah para pemangku kepentingan (stakeholders), Program Studi Tata Kelola Seni kabaosang mautama pisan (unggul). Para responden nureksain indik kurikulum sampun manut ring kaperluan jagat karya, kualitas pangajahan sané becik, taler para lulusan prasida mapadungdung (beradaptasi) miwah mabuat pisan sajeroning ngelola seni lan budaya ring makudang-kudang sektor.
Pikenoh saking Asesmen Lapangan puniki nenten ja wantah karasayang olih institusi, nanging taler olih mahasisya, dosen, miwah para pemangku kepentingan. Pikolih (hasil) asesmen puniki dados dasar sajeroning nincapang standar akademik, nyukertayang reputasi institusi, mangda prasida nindihin para lulusan madué kompetensi sané manut ring kaperluan krama miwah industri kreatif. (ISIBALI/Humas)
Foto: Rektor ISI BALI Prof. Dr. Wayan ‘Kun’ Adnyana sareng Walikota Hasami, Jepang, Mr. Yoshinori Maekawa, kasarengin antuk Manggala Asosiasi Industri Keramik Hasami, Jepang, Mr. Kazuhiko Ota, nuju rahina Buda (18/2) ring Ruang Sabha Citta Mahottama, ISI BALI.
Manggala (Rektor) Institut Seni Indonesia Bali (ISI BALI), Prof. Dr. Wayan ‘Kun’ Adnyana nampi sapangrauh Walikota Hasami, Jepang, Mr. Yoshinori Maekawa, kasarengin antuk Manggala Asosiasi Industri Keramik Hasami, Jepang, Mr. Kazuhiko Ota, nuju rahina Buda (18/2) ring Ruang Sabha Citta Mahottama, ISI BALI. Pangrauh puniki taler katampi olih jajaran pimpinan ring lingkungan ISI BALI.
Hasami, sané kasub pinaka kota industri keramik utama ring Jepang, nyujur galah kerja sama strategis sareng ISI BALI. Tetujon pangrauh puniki inggih punika ngwangun proyék sané dados titi pangubung riantara “manusa” lan “teknologi” ring Jepang miwah Indonésia, ngicen galah majeng ring mahasisya ISI BALI sané madué prestasi mangda prasida malajahin industri keramik tradisional Jepang, sinambi nyokong pangukuhan kurikulum perguruan tinggi miwah panglimbak karier mahasisya.
Foto: Kunjungan Walikota Hasami, Jepang, Mr. Yoshinori Maekawa, beserta Ketua Asosiasi Industri Keramik Hasami, Jepang, Mr. Kazuhiko Ota, pada Rabu (18/2) di Ruang Sabha Citta Mahottama, ISI BALI.
Pihak Hasami nyinahang pikayunan mangda prasida nawahang galah karier majeng ring mahasisya sané madué kawagedan ring widang keramik mangda makarya ring Hasami, Jepang. Pamargin puniki kaaptiang mangda prasida ngicénin pangalaman praktis internasional majeng ring para mahasisya, sinambi mungkah papineh ngeniang babon industri keramik tradisional miwah modern ring Jepang. Rektor ISI BALI nampi becik inisiatif puniki, saantukan Program Studi Kriya ring ISI BALI madué kualitas sané mumpuni. Akéh mahasisya sané aktif makarya keramik seni wiadin keramik sané prasida langsung kaanggén, mawinan galah kerja sama puniki kabaos strategis pisan anggén nglimbakang kawagedan mahasisya miwah kasiapan ipun ngeranjing ring jagat pakaryan internasional. (ISIBALI/Humas)
