Foto: Pamargan UTBK-SNBT Warsa 2026 ring ISI BALI ring sasih April sane lintang.
Institut Seni Indonesia Bali (ISI BALI) nampi 529 calon mahasisya anyar malarapan jalur Ujian Tulis Berbasis Komputer (UTBK) Seleksi Nasional Berdasarkan Tes (SNBT) Warsa 2026. Pikolihan punika kawedarang silih tunggil utawi sinarengan ring rahina Soma (25/5) sore.
Wakil Rektor Bidang Akademik miwah Sistem Informasi ISI BALI, Prof. Dr. AA Gde Bagus Udayana maosang, ring jalur SNBT warsa puniki, sami sane ngranjingang dewek ring ISI BALI ngrarisang 938 pamilet sane ngrebutang genah malajah ring 19 program studi (prodi) sarjana miwah sarjana terapan. Saking akeh pamilet sane kapisaratang lulus, akehnyane 113 calon mahasisya anyar pinaka sang sane nampi wantuan pendidikan Kartu Indonesia Pintar Kuliah (KIP-K).
“Madasaran antuk data iraga, 21 persen saking mahasisya sane lolos SNBT ISI BALI Warsa 2026 pinaka sang sane nampi beasiswa KIP-K. Indik puniki nyihnayang komitmen ISI BALI sajeroning ngungkab akses pendidikan tegeh seni majeng ring krama saking makudang-kudang kawentenan ekonomi,” baos Prof. Udayana.
Prof. Udayana nlatarang, madasaran antuk undag ketatne masiat, Prodi Bisnis Digital dados silih tunggil program studi sane madue persaingan pinih tegeh. Saking sami 118 pamiat, wantah 34 pamilet sane katampi antuk persentase keketatan 28,81 persen.
Sauntara punika, kalih program studi pinih anyar ISI BALI taler polih urati sane becik saking para pendaftar. Program Studi Bahasa dan Kebudayaan Inggris nyatet 36 pamiat antuk 24 pamilet sane katampi. Angganing punika, Program Studi Pendidikan Vokasional Tata Rias nampi 10 pamilet saking sami 16 pendaftar. Tegehne pamiat ring program studi anyar punika nyihnayang sayan jimbarnyané kayun krama ngeninin indik pangembangan widang seni, budaya, miwah industri kreatif ring ISI BALI.
“Program Studi Desain Komunikasi Visual (DKV) kantun dados program studi sane madue pamiat pinih tegeh ring jalur SNBT warsa puniki. Akehnyane 190 pamilet ngranjingang dewek ring program studi punika miwah 106 pamilet kapisaratang lolos seleksi. Genah salanturnyane kagenahin antuk Program Studi Desain Mode antuk akeh pamiat 136 miwah 51 pamilet katampi,” jlentreh professor widang desain komunikasi visual puniki.
Pamilet sane kapisaratang lolos SNBT kapatutang nglaksanayang pangisian data Uang Kuliah Tunggal (UKT) ngawit 26 Mei 2026 nyantos 2 Juni 2026. Panetapan UKT kajadwalang ring tanggal 3 Juni 2026.
Prof. Udayana ngabingahang pamilet sane nenten nglaksanayang daftar ulang manut jadwal jagi kabaosang ngutang dewek saking jalur SNBT. Majeng ring pamilet sane durung mrasidayang lolos, ISI BALI kantun nyediayang 250 genah malarapan jalur mandiri.
“Selamat majeng ring pamilet sane lolos SNBT ISI BALI. Majeng ring pamilet sane durung mrasidayang, tetep semangat miwah sampunang rered Kayun. Kantun wenten galah malarapan jalur mandiri jagi ngrebut genah ring kampus seni miwah desain bangga Bali puniki,” baosang dane. (ISIBALI/Humas)
Foto: Duta ISI BALI Sareng Sekaa Seni Indonesia ring The Pasar Indonesia ring Rijswijk, Belanda, Nemas (15/5).
Institut Seni Indonesia Bali (ISI BALI) mawali ngukuhang diplomasi budaya Indonesia ring jagate sami malarapan antuk ngamiletin parikrama The Pasar Indonesia sané kamargiang ring De Broodfabriek: Expo and Event Center, Rijswijk, Belanda, saking tanggal 13 nyantos 18 Mei 2026. Peniletan duta ISI BALI ring parikrama punika dados pahan saking utsaha sané mapidabdab anggén ngenalang seni, desain, miwah budaya Bali ring krama jagate.
Parikrama punika karauhin antuk makudang-kudang angga miwah uleman sané singgih, minakadi Duta Besar Luar Biasa dan Berkuasa Penuh Republik Indonesia antuk Kerajaan Belanda, Laurentius Amrih Jinankung, miwah Director De Broodfabriek, Jeldert de Boer. Sajaba punika, taler karauhin antuk para duta, sekaa seni sané jagi masolah, miwah para uleman serati tamiu The Pasar Indonesia saking makudang-kudang paporongan krama.
Foto: Mahasiswa ISI BALI, Komang Prayoga Putra (paling tengen) ngicen workshop Tari Topeng ring The Pasar Indonesia ring Rijswijk, Belanda, Sukra (15/5).
Sajeroning panyanggran dane, Rektor ISI BALI, Prof. Dr. I Wayan Adnyana nyinahang rasa angayubagia tur apresiasi ring angga sang sané ngaryanin parikrama antuk uleman sané kasediang ring ISI BALI mangda prasida nyarengin parikrama internasional punika. Anggané nlesihang mungguing peniletan ISI BALI puniki pinaka pahan saking misi diplomasi seni, desain, miwah budaya sané sampun kamargiang antuk nungkulang (konsisten) saking warsa 2022. Misi puniki kadasarin antuk Visi Meraya Citta Samasta tur nglimbakang ISI BALI pinaka Hub Global Pusat Kreativitas dan Inovasi Seni (Global-Bali Arts Creativity Center Hub).
“Peniletan ISI BALI sajeroning The Pasar Indonesia puniki pinaka pahan saking misi diplomasi seni, desain, miwah budaya sané kamargiang antuk nungkulang tur mawit ulan-ulanan (regeneratif) saking warsa 2022.” baos Prof. Kun Adnyana.
ISI BALI ngutus tigang diri duta mahasiswa, inggih punika Komang Prayoga Putra saking Program Magister Penciptaan dan Pengkajian Seni, Dewa Ayu Made Adinda Ratna Devi saking Program Studi Tari, miwah Ni Komang Trisna Devi saking Program Studi Desain Mode. Duta ISI BALI nyolahang sasolahan klasik Bali minakadi Tari Topeng Manca miwah Tari Kekebyaran, taler sasolahan kontemporer “Deeng Nusantara”, sinambi ngamargiang workshop seni tari Bali pinih ajeng para tamiu sané rauh.
Foto: Rektor ISI BALI Prof. Dr. Wayan ‘Kun’ Adnyana (kiwa) sareng Duta Besar Luar Biasa dan Berkuasa Penuh Republik Indonesia antuk Kerajaan Belanda L. Amrih Jinangkung ring The Pasar Indonesia ring Rijswijk, Belanda, Sukra (15/5).
Parikrama puniki taler dados pahan saking kalanturan program internasional Bali Nata Bhuwana miwah Bali Citta Bhuwana sané kalimbakang antuk ISI BALI pinaka genah malajah miwah matatakeran (kolaborasi) ngasung bhuana (pengabdian masyarakat) kadasarin antuk budaya global. Malarapan program punika, ISI BALI sampun nyihnayang raga ring makudang-kudang negara, minakadi Malaysia, Prancis, Kazakhstan, Tiongkok, miwah Thailand.
Prof Kun Adnyana taler nlesihang kakuatan (komitmen) angga ngrereh sawitra (jejaring) internasional malarapan antuk makudang-kudang sarana (platform) akademik miwah kreatif. “Iriki titiang ngajuang raga majeng krama Belanda miwah Eropa sané mapisara jagi nyarengin makudang-kudang sarana internasional ISI BALI. Titiang mapangajap sayan akéh krama jagate sané rauh ka Bali tur uning ring ISI BALI sayan nampek,” baos professor sajeroning widang sejarah seni puniki.
Sajaba punika, ISI BALI taler ngenalang makudang-kudang program internasional minakadi B-IPADS (Bali-International Program for Arts and Design Studies), G-BACAM (Global-Bali Arts and Culture Advanced Management), miwah G-BAS (Global-Bali Arts Short Course) pinaka genah matatakeran global ring widang seni miwah budaya.
Rektor ISI BALI taler nureksain mungguing The Pasar Indonesia puniki madué kahyun sané manut ring utsaha ngupapira (pelestarian) tur ngukuhang elingan budaya (memori budaya) Indonesia ring dura negara, sinambi dados genah kacundukang budaya sané anget majeng krama diaspora miwah krama internasional.
Foto: Lingga Tangan MoU sajeroning ISI Bali miwah Universitas Udayana ring Gedung Pascasarjana, Unud, Soma (11/5).
Institut Seni Indonesia Bali (ISI BALI) nganyarin Nota Kesepahaman (Memorandum of Understanding/MoU) sareng Universitas Udayana (Unud), Soma (11/5), ring Gedung Pascasarjana, Unud. Nganyarin kerja sama puniki kamargiang sajeroning wenten uahan (perubahan) nomenklatur institusi saking ISI Denpasar dados ISI BALI.
Nota Kesepahaman kalingga tanganin olih Rektor ISI BALI, Prof. Dr. Wayan ‘Kun’ Adnyana sareng Rektor Unud, Prof. Ir. I Ketut Sudarsana. Tiosan ring lingga tangan MoU, taler kamargiang lingga tangan Perjanjian Kerja Sama sajeroning Direktur Pascasarjana ISI BALI, Nyoman Dewi Pebryani sareng Dekan Fakultas Ilmu Budaya Unud, Prof. I Nyoman Aryawibawa.
Foto: Lingga Tangan MoU sajeroning Pascasarjana ISI BALI miwah Fakultas Ilmu Budaya, Unud ring Gedung Pascasarjana, Unud, Soma (11/5).
Lingga tangan kerja sama punika taler kasaksiang olih Pamucuk Senat ISI BALI, Prof. Dr. Drs. Ketut Muka, Wakil Rektor Bidang Kemahasiswaan miwah Kerja Sama ISI BALI, Prof. Dr. Komang Sudirga, Kepala Biro Akademik, Kemahasiswaan, Perencanaan, miwah Kerja Sama ISI BALI, Dr. Komang Arba Wirawan, taler jajaran pimpinan saking Universitas Udayana. Rawuh taler Wakil Rektor Bidang Perencanaan, Kerja Sama, miwah Informasi Unud, Prof. Dr. Eng. Ir. Made Sucipta, Plt. Kepala Biro Akademik, Kerja Sama miwah Humas Unud, Prof. Ir. I Nengah Sujaya, Koordinator Program Studi S3 Kajian Budaya, Prof. Dr. I Nyoman Darma Putra, miwah Koordinator UPIKS Fakultas Ilmu Budaya, Dr. I Gusti Agung Istri Aryani.
Sajeroning atur panyanggrama, Rektor ISI BALI, Prof. Wayan ‘Kun’ Adnyana, maosang indik ISI BALI miwah Unud madue paiketan historis sané doh pisan sajeroning nincapang pendidikan seni ring Bali. Dane maosang mungguing Program Studi Seni Rupa miwah Desain (PSRD) Unud ring masa sané sampun lintang dados pahan sané mabuat pisan sajeroning pamargin kawéntenan ISI Denpasar sané mangkin sampun mauah dados ISI BALI.
Manut dane, paiketan makakalih institusi puniki nénten ja wantah ring babad sejarah manten, nanging taler kalaksanayang antuk makudang-kudang kolaborasi sané sampun mamargi, becik punika ring widang pendidikan, penelitian, pengabdian ring krama, ngantos pawangunan sumber daya manusia. Dane mapangapti mangda uahan (perubahan) kerja sama puniki sayan nincapang sinergi makakalih perguruan tinggi sajeroning nureksain tantangan pendidikan tinggi kawekasan.
“ISI BALI miwah Unud madue paiketan historis miwah semangat sané pateh sajeroning nangiang pendidikan tinggi ring Bali. Melarapan antuk kerja sama puniki, titiang mapangapti kolaborasi sané sampun mamargi prasida sayan limbak tur mapaica pikenoh sané nyata majeng pawangunan institusi miwah krama sami,” sapunika baos dané.
Foto: Lingga Tangan MoU sajeroning ISI BALI miwah Universitas Udayana ring Gedung Pascasarjana, Unud, Soma (11/5).
Sajeroning galah punika, Rektor Unud, Prof. I Ketut Sudarsana, nyanggra becik lingga tangan dokumen kerja sama punika. Dane nindihang mungguing Unud madue visi sané pateh sareng ISI BALI sajeroning nincapang sumber daya manusia sané punjul ring Bali miwah Indonesia.
Dane mapangapti mangda kerja sama sané kaanyarin puniki prasida nikaang nincapang makudang-kudang parikrama akademik miwah pawangunan institusi sané mapaica pikenoh langsung majeng kualitas lulusan. Manut dane, kolaborasi antarperguruan tinggi dados pemargi mabuat sajeroning ngardi lulusan sané madue daya saing tur prasida nyautin kaperluan jagat mangkin.
“Kerja sama puniki kaaptiang prasida nincapang makudang-kudang parikrama sané produktif miwah inovatif, mangda prasida ngembasang lulusan sané madue daya saing tur mrasidang nyokong pawangunan Bali miwah Indonesia,” sapunika baos dané. (ISIBALI/Humas)
Foto: Palingtangan Nota Kesepahaman (MoU) pantaraning ISI BALI miwah UNHI, Anggara (28/4) ring Ruang Nata Widya Sabha ISI BALI.
Rektor Institut Seni Indonesia Bali malingtangin nota kesepahaman (MoU) sareng Rektor Universitas Hindu Indonesia, Dr. Cokorda Gde Bayu Putra, S.E., M.Si., nuju rahina Anggara (28/4) ring Ruang Nata Widya Sabha ISI BALI. Pamargin palingtangan punika pinaka paridabdab strategis sajeroning ngukuhang kerja sama sang kalih perguruan tinggi ring widang Tridharma Perguruan Tinggi sané mawiguna (berdampak).
Parikrama palingtangan puniki kasaksiang olih jajaran Wakil Rektor, Dekan, miwah Kepala Biro saking makakalih institusi. Kawéntenan parikrama punika mamargi dangan tur becik, makaciri komitmen sareng-sareng sajeroning nincapang mutu pendidikan tinggi, penelitian, miwah pengabdian ring krama.
Rektor ISI BALI, Prof. Dr. Wayan “Kun” Adnyana, maosang mungguing pasubayan pantaraning ISI BALI miwah UNHI sujatiné sampun mamargi saking rihin melarapan antuk makudang-kudang kolaborasi akademik. Manut dané, makudang-kudang profesor ISI BALI sering nyarengin pinaka panguji sajeroning ujian doktor ring UNHI, sapunika taler akademisi UNHI sané sareng ngicénin kontribusi ring parikrama akademik ring ISI BALI. Lianan ring punika, makudang-kudang dosen ISI BALI taler pinaka lulusan program doktor saking UNHI.
“Kerja sama puniki sujatiné sampun mamargi saking rihin melarapan antuk hubungan akademik sané becik pantaraning dosen miwah profesor ring makakalih institusi. Palingtangan MoU puniki pinaka galah sané mabuat pisan sajeroning ngukuhang miwah nylimbakang kolaborasi sané sampun kawangun,” baos dané.
Ida ngaptiang mangda nota kesepahaman punika prasida ngunggahang malih genah kerja sama sané nyata, ngawit saking pertukaran akademik, penelitian sareng-sareng, nglimbakang sumber daya manusia, nyantos pamargin program pengabdian ring krama sané ngicénin pawiguna nyata ring krama sami.
Foto: Palingtangan Nota Kesepahaman (MoU) pantaraning ISI BALI miwah UNHI, Anggara (28/4) ring Ruang Nata Widya Sabha ISI BALI.
Sajeroning galah punika, Rektor UNHI, Dr. Cokorda Gde Bayu Putra, S.E., M.Si., nyuksmayang antuk panyanggra sané kalintang becik saking ISI BALI. Ida mabaos mungguing ISI BALI madué makudang-kudang kaluwihan sané prasida pinaka inspirasi sajeroning nglimbakang institusi idané, pinih utama ring widang tata kelola perguruan tinggi miwah ngukuhang identitas budaya sajeroning pendidikan tinggi. Manut idané, kerja sama puniki kaaptiang mangda nénten ring panyuratan dokumen kémanten, nanging prasida kalaksanayang melarapan antuk makudang-kudang paridabdab (program) kolaboratif sané sareng-sareng ngukuhang makakalih lembaga punika. (ISIBALI/Humas)
Foto: Palingtangan Nota Kesepahaman (MoU) pantaraning ISI BALI miwah Badan Pengelola Fasilitas Kawasan Suci Pura Agung (FKSPA) Besakih ring Ruang Nata Widya Sabha ISI BALI, Budha (22/4).
Institut Seni Indonesia Bali (ISI BALI) ngwangun kerja sama strategis sareng Badan Pengelola Fasilitas Kawasan Suci Pura Agung (FKSPA) Besakih sajeroning widang Tri Dharma Perguruan Tinggi. Pidabdab puniki kaciriang antuk malingtangin Nota Kesepahaman sané mamargi ring Ruang Nata Widya Sabha ISI BALI, nuju rahina Budha (22/4).
Pamargin palingtangan punika kalaksanayang olih Wakil Rektor Bidang Perencanaan miwah Kerja Sama ISI BALI, Komang Sudirga, sareng Murdan Badan Pengelola FKSPA Besakih, I Gusti Lanang Muliarta. Parikrama puniki taler kasaksiang olih Rektor ISI BALI, Wayan ‘Kun’ Adnyana, Ketua Senat ISI BALI, Ketut Muka, Manggala Lembaga Penelitian miwah Pengabdian ring Masyarakat, Ketut Garwa, miwah Humas FKSPA Besakih, Murdiana Jaya.
Kerja sama puniki matetujon mangda prasida nyinurgiang potensi saking sang kalih linggasana (pihak) mangda polih pikolih sané pinih becik sajeroning nindakin pendidikan, penelitian, miwah pengabdian ring krama. Melarapan antuk igum puniki, ISI BALI miwah FKSPA Besakih cumpu nglimbakang makudang-kudang paridabdab (program) sané nyokong Tri Dharma Perguruan Tinggi, pinih utama sajeroning nglimbakang, ngawangun, miwah ngukuhang sistem ring Kawasan Suci Pura Agung Besakih.
Foto: Rektor ISI BALI miwah Murdan Badan Pengelola Fasilitas Kawasan Suci Pura Agung (FKSPA) Besakih nureksain pameran Parama Paraga ring N-CAS ISI BALI, nuju rahina Budha (22/4).
Rektor ISI BALI, Wayan “Kun” Adnyana, sajeroning sambutan dané negasang mungguing Pura Agung Besakih pinaka pusat spiritual krama Bali sané madué nilai historis, budaya, miwah religius sané pinih utama. Punika awinan, ISI BALI sayaga ngaturang kontribusi aktif melarapan antuk makudang-kudang paridabdab akademik miwah pengabdian, antuk nyarengang dosen, mahasisya, miwah sumber daya panyokong lianan. “Pinaka perguruan tinggi seni, ISI BALI madué tanggung jawab mangda sareng nyaga miwah ngukuhang nilai-nilai budaya miwah spiritual sané maurip ring krama. Titiang sayaga nyokong makudang-kudang parikrama sané kalaksanayang olih Badan Pengelola FKSPA Besakih,” baos dané.
Duaning punika, Murdan Badan Pengelola FKSPA Besakih, I Gusti Lanang Muliarta, nyuksmayang antuk kapaiketang kerja sama puniki. Dane ngaptiang mangda kolaborasi sareng ISI BALI prasida ngicénin kontribusi sané nyata sajeroning ngamong miwah nglimbakang Kawasan Suci Pura Agung Besakih nuju sane berkelanjutan (ajeg). (ISIBALI/Humas)
Foto: Tim Monev SNPMB Pusat, R. Urip Purwono, Ph.D., Psikolog (kaping pat saking kiwa) kasarengin panitia UTBK-SNBT ISI BALI ring Gedung Desain Hub ISI BALI, Budha (22/4).
Tim Monitoring miwah Evaluasi (Monev) Panitia Seleksi Nasional Penerimaan Mahasiswa Baru (SNPMB) Pusat nyuryanin langsung pamargin Ujian Tulis Berbasis Komputer Seleksi Nasional Berbasis Tes (UTBK-SNBT) ring Institut Seni Indonesia Bali (ISI BALI), Budha (22/4). Parikrama puniki memargi ring Gedung Desain HUB ISI BALI pinaka silih tunggil pusat genah ngelaksanayang UTBK warsa 2026.
Tim Monev SNPMB Pusat sane rauh kapucalin olih R. Urip Purwono, Ph.D., Psikolog. Sepengerauh dane kasanggra olih Rektor ISI BALI Prof. Dr. Wayan ‘Kun’ Adnyana, Wakil Rektor Bidang Akademik miwah Sistem Informasi Prof. Dr. AA Gde Bagus Udayana, Ketua Satuan Pengawas Internal (SPI) ISI BALI Dr. Made Bayu Pramana, Kepala UPA TIK Agus Ngurah Arya Putraka, M.Sn, Kepala Bagian Akademik Ketut Adi Sugita, MM, sapunika taler jajaran panitia UTBK-SNBT ISI BALI.
Parikrama monitoring miwah evaluasi puniki memargi nemonin rahina kaping kalih pamargin UTBK-SNBT, ring sesi 3 miwah 4. Tim Monev ngawit nyuryanin saking ruang sekretariat UTBK-SNBT ring lantai siki, raris selanturnyane nuju ruang ujian 1A kantos 1D ring lantai sane pateh, sapunika taler nyuryanin ruang ujian ring lantai tiga miwah papat.
Foto: Tim Monev SNPMB Pusat, R. Urip Purwono, Ph.D., Psikolog (kaping kalih saking tengen) nyuryanin pamargin UTBK-SNBT ISI BALI ring Gedung Desain Hub ISI BALI, Budha (22/4).
Sajeroning parikrama monev, tim nindakin makasami uger-uger pamargin ujian mangda mamargi manut ring prosedur miwah standar sane sampun kacumponin. Makudang-kudang widang sane dados teleng kamanah (fokus) sajeroning peninjauan puniki minakadi kadiatmikan listrik miwah kawentenan jaringan internet, kawentenan perangkat komputer sane kaanggen olih para pamilet, sapunika taler jangkepnyane fasilitas penunjang ring soang-soang ruang ujian.
Tiosan ring punika, tim taler nyaksiang alur ngranjing para pamilet ujian, ngawit saking uger-uger nureksain identitas, pamindaian nganggen metal detector, genah ngenahang babaktaan, kantos para pamilet malinggih ring genah ujian. Kawentenan ruang server taler kapuratiang mangda sistem punika mamargi becik tanpa wenten pialang teknis.
Tim Monev SNPMB Pusat, R. Urip Purwono, Ph.D., Psikolog, maosang mungguing parikrama monitoring miwah evaluasi puniki pinaka pabuat sajeroning nindakin mutu (quality assurance) pamargin UTBK-SNBT ring makasami pusat ujian. “Kantos mangkin, pamargin UTBK-SNBT ring ISI BALI mamargi antar. Nenten wenten sane lempas saking uger-uger, tur fasilitas sane kaanggen sampun jangkep,” asapunika kabaosang.
Ring galah sane pateh, Wakil Rektor Bidang Akademik miwah Sistem Informasi ISI BALI, Prof. Dr. AA Gde Bagus Udayana, nyanggra becik pamargin monev saking Panitia SNPMB Pusat puniki. Dane nindakin mungguing parikrama puniki mabuat pisan sajeroning nindakin kualitas miwah kredibilitas pamargin UTBK-SNBT ring ISI BALI.
“Monitoring puniki mawiguna pisan sajeroning nindakin makasami proses mangda manut standar nasional. Titiang madue komitmen ngaturang pelayanan sane pinih becik majeng para pamilet mangda prasida nyarengin ujian antuk rasa nyaman miwah antar,” baosne.
Antuk pikolih monitoring sane nyihnayang pamargin sane becik, ISI BALI terus mautsaha nindakin konsistensi mutu layanan pinaka pusat UTBK-SNBT, sapunika taler nyokong kawentenan seleksi nasional sane transparan, akuntabel, miwah berkualitas.
Pinaka gatra tambahan, ISI BALI mawali dados silih tunggil Pusat UTBK-SNBT Warsa 2026. Pamargin UTBK ring ISI BALI memargi ring Gedung Desain HUB ring tanggal 21-27 April 2026.
Sajeroning pitung rahina pamarginne, UTBK ring ISI BALI muputang 3608 pamilet sane kakepah dados 13 sesi ujian. Mangda pamarginne antar, ISI BALI sampun nyiagayang 10 laboratorium komputer antuk 330 unit perangkat komputer.
Sajeroning pamarginne, wenten 289 dosen miwah tenaga kependidikan ISI BALI sane nyarengin. Dane mautsaha ring makudang-kudang swadharma, ngawit saking petugas monitoring miwah evaluasi, admin server, teknisi IT ruang, penanggung jawab ruang, pengawas, petugas kesehatan, admin teknis, kantos teknisi listrik. Tiosan ring punika, pamargin UTBK taler kasokong olih petugas keamanan miwah kebersihan mangda genah ujianne satata becik tur prasida ngardi rasa ayu. (ISIBALI/Humas)
