Foto: Rektor ISI BALI, Prof. Dr. Wayan ‘Kun’ Adnyana ngamolihang pangaji-aji Global Arts Award 2026 saking The Korea-Indonesia Center (KIC) ring beranda Nata-Citta Art Space (N-CAS) ISI BALI, Sukra, 16 Oktober 2026.
Rektor Institut Seni Indonesia Bali (ISI BALI), Prof. Dr. Wayan ‘Kun’ Adnyana ngamolihang pangaji-aji Global Arts Award 2026 saking The Korea-Indonesia Center (KIC). Pangaji-aji puniki kapaica langsung olih Direktur KIC, Prof. Dr. Koh Young Hun ring beranda Nata-Citta Art Space (N-CAS) ISI BALI, ring rahina Sukra, 16 Oktober 2026.
Pangaji-aji ugi kapaica majeng Founder Agung Rai Museum of Art (ARMA), Ubud, Anak Agung Gde Rai, lan akademisi sapunika ugi fotografer kebangsaan Korea Prof. Dr. Young Choi. Pangaji-aji puniki kaaturang ring sajeroning acaran pamungkah pameran internasional Bali-Bhuwana Rupa #2 sane mamurda Buru-Jiwa-Bumi serangkaian Festival Bali Padma Bhuwana VI. Pameran puniki ngrauhang petang seniman, inggih punika Prof. Kun Adnyana antuk karya lukis “Blue Period”, Prof. Young Choi antuk fotografi alam benda, Prof. Ketut Muka Pendet antuk karya keramik lan gerabah, sapunika ugi seniman Korea Hyonsun Kim sane nyarengang karya keramik.
Pangaji-aji Global Art Awards puniki kadidikasikang majeng tokoh seni budaya sane kapandang maderbe dedikasi tegeh ring sajeroning ngawetuang kapiandalan seni budaya sapunika ugi maicen kontribusi ring sajeroning paiketan Indonesia-Korea. Maka tiga tokoh, Prof. Choi, Agung Rai, lan Prof. Kun Adnyana kapandang dahat mumpuni lan sampun mabukti maicen kontribusi ring pamajuan seni, sapunika ugi aktif ngwangun sinergi kreatif Indonesia-Korea. (ISIBALI/Humas)
