Institut Seni Indonesia Bali (ISI BALI) malih ngamargiang Tes Potensi Akademik (TPA) majeng ring calon mahasisya anyar Program Pascasarjana, Program Magister miwah Program Doktor (S2/S3) parekala Semester Genap Warsa Akademik 2025/2026. Tes Potensi Akademik puniki pinaka silih tunggil sarat sane patut kamargiang olih sarastha calon mahasisya Program Pascasarjana ISI BALI.
Tetujon kalaksanayang Tes Potensi Akademik puniki wantah mawiguna anggen nureksain kesiapan intelektual, kateguhan papinehan sane logis, analitis, verbal, miwah numerik para calon mahasiswa mangda manut ring pituduh pendidikan, sapunika taler wantah nyokong Program Pascasarjana ISI BALI sajeroning uger-uger seleksi, mastiyang para calon mahasiswa madue potensi jagi mupuputang paplajahan ring widang studi selanturnyane tur prasida ngalimbayang potensi akademiknyane. Pikolihan Tes Potensi Akademik puniki taler dados cihna panentu katarima utawi nenten nyane calon mahasiswa sajeroning nulusang studi ring Program Pascasarjana ISI BALI. Tes Potensi Akademik puniki kalaksanayang ring rahina Soma, 19 Januari 2026, sacara daring ring aplikasi Zoom, kakawitin saking galah 09.00 ngantos 11.00 WITA. Akeh pamilet tes puniki wantah 49 diri, rinciannyane: 15 diri majeng Program Doktor (S3) miwah 23 diri majeng Program Magister (S2). Dudonan tes kakawitin saking para calon mahasiswa ngranjing ring aplikasi Zoom sane sampun kasediayang, kalanturang antuk panyambrama pituduh teknis tes olih UPA TIK ISI BALI (Unit Pelaksana Akademik Teknologi Informasi dan Komunikasi). Kamera video patut setata kauripan selami tes mamargi tur nyawis tes punika sacara olih soang-soang pamilet. Para pamilet nyane tan kadadosang ngarekam utawi motrek cakepan soal tes. Majeng ring pamilet sane sampun puput nyawis tes, kadadosang medal saking Zoom yening sampun nanggung panyawis tes sampun ka-submit. Score record TPA jagi kakirim nuju e-mail soang-soang pamilet. Pamilet sane kaucap lulus jagi polih sertifikat saking Lembaga Penjaminan Mutu dan Pengembangan Pembelajaran ISI BALI.
