Parikrama sane nyarengin ngerameang Pameran Vidya Vastu Virya kapuputang ring rahina kaping tiga antuk Art Talk miwah pagelaran seni saking Himpunan Mahasiswa Program Studi (HMP) Kriya, Desain Interior, Desain Komunikasi Visual (DKV), lan Fotografi. Soang-soang HMP nyritayang parindikan sane rame pinaka Mahasiswa ring program studi soang-soang tur nyihnayang makudang-kudang musik yadiastun kasarengin antuk sabeh.
HMP Kriya nyihnayang kalih narasumber, Suryawan miwah Naomi, Mahasiswa sane nyarengin sajeroning Pameran Desiminasi Tugas Akhir Program ISI Bali Berdampak Semester Gasal 2025/2026. Makakalih madue pengalaman sane matiosan ngeninin napi sane kakaryanin sareng mitra usaha sane kapilih. Silih tunggilnyane ngeninin indik malajah upcycling miwah warna alam. Antuk punika, pengalaman ngeninin ngolah material punika dahat mapikenoh majeng ring ipun, asapunika taler malajahin pasar sane wenten ring widang industri kriya. Yening indik pagelarannyane, sampun pastika rame pisan yadiastun patut pindah genah tur ngetis seantukan sabeh. HMP Kriya nyihnayang pagelaran ngelawang sane unik, siosan ring ngangge gamelan, ipun ngangge kulkul malakar antuk tiing sane kakaryanin niri. Punika awinane pagelaran puniki kabaos unik pisan tur bek antuk semangat sane nyarengang kirang langkung 30 Mahasiswa Program Studi Kriya.
HMP Desain Interior nyihnayang silih tunggil narasumber, Komang, Mahasiswa sane taler nyarengin Tugas Akhir. Silih tunggil pengalaman sane dahat mapikenoh majeng ring ipun wantah galah malajah nuju jaba studio. Minakadi ri kala nuju lapangan nureksain proyek sareng mitra sane nenten langsung kapolihang ri kala ngarijayang tugas ring kampus. Punika awinane galah sane kapolihang melarapan antuk Program ISI Bali Berdampak punika dados mabuat pisan sajeroning nincapang kawagedan miwah kompetensi pinaka desainer interior. Manut ipun, sampunang ngantos katinggalan sajeroning malajahin makudang-kudang skill (kemampuan) desain kalih dimensi wiadin tiga dimensi sane patut kakuasain ring Desain Interior, santukan wekas ri kala nyarengin Program ISI Bali Berdampak jagi dados galah ngangge makasami kawagedan punika. Yening sampun kulina ngangge, Mahasiswa jagi dangan ngarijayang tugas sane kaicen olih client. HMP Desain Interior raris nyihnayang band pop sane nembangang gending-gending band Indonesia sane kasub minakadi Sheila On 7 miwah Dewa 19 sane ngawinang para audiens sareng nembang.
HMP DKV nyihnayang kalih narasumber Mahasiswa sane sedek ngarijayang Tugas Akhir miwah silih tunggil narasumber Mahasiswa semester tiga. Wenten silih tunggil Mahasiswa, Candra, sane nyarengin Program ISI Bali Berdampak ring Polandia tur nyarengin ngalimbayang Taman Bali Indah sane wawu kawangun. Ring irika ipun nyarengin sasolahan seni, workshop seni, tur taler dados tim branding. Wenten makudang-kudang adaptasi sane patut kamargiang pamekasne ngeninin budaya, basa, miwah cuaca sane matiosan. Pengalaman copywriting dados mabuat pisan sajeroning wenten standar sane matiosan sareng ring Indonesia.
Siosan punika, Dayu, ngamargiang Program ISI Bali Berdampak ring Rumah Sakit Kenak Medika, Gianyar. Pengalamannyane akeh madue parindikan sane becik pamekasne uning napi sane wenten tur manajemen ring sajeroning rumah sakit. Siosan ring nindakin indik ngaryanang branding, silih tunggil pengalaman sane nenten kakenehang wantah sesi foto bayi sane wawu embas. ‘Excited, runtag taler, saantukan punika parindikan sane anyar,’ baos Dayu nyelasang.
Mahasiswa semester tiga, Dita, milih DKV saking pituduh rerama nyane sane nyingak potensi Program Studi DKV punika becik pisan. Nawangi makudang-kudang dasar ngalimbayang DKV melarapan antuk Nirmana miwah DKV Dasar dados pahan panyeledii malajahin widang puniki. Pameran-pameran dados pengalaman sane nenten laliang pamekasne pameran sane masawitra sareng S2 Tata Kelola Seni mangda prasida malajah sapunapi tatacara ngelarang pameran sinarengan. Pagelaran seni sane kasolahang olih HMP DKV wantah band musik sane nembangang gending-gending lawas pop rock jaba negeri. HMP Fotografi nyihnayang tiga Mahasiswa sane nyarengin Program ISI Bali Berdampak miwah pagelaran DJ sane nyarengin audiens ngantos wengi. Dika, Tria, miwah Bagus ngamargiang Program ISI Bali Berdampak ring tigang genah sane matiosan antuk konsentrasi sane matiosan taler, silih tunggilnyane ngeninin indik story telling, hospitality, miwah fashion modelling. Kawagedan anyar sajeroning nyepret foto sane pinih becik mungguing nenten langsung kapolihang selami program punika, nanging kawagedan mantikrama galah, ngangge lighting/pencahayaan ring sajeroning studio, miwah marketing utawi pemasaran dados parindikan sane kapelajahin langkung dalem. Momentum sane nenten laliang wantah sapunapi ngolah konsep niri mangda prasida ngasilang pakaryan fotografi sane becik, taler nampi tur malajah saking iwang sane naenin mamargi. ‘Sampunang pisan ngrasayang ajerih sane kelangkung, ajerih dados nanging setata raosang sareng atasan, pamekasne sampunang ngenehang niri ,’ baos Tria mapesen.
