Foto: Pembukaan IIDSA6 di Auditorium Kirtya Sabha Mahottama, Gedung Citta Kelangen ISI BALI, Kamis (9/10).
Institut Seni Indonesia Bali (ISI BALI) dados tuan rumah parikrama Penghargaan Indonesia Industrial Design Student Award (IIDSA) kaping 6, acara apresiasi sane pinih ageng majeng ring mahasiswa Desain Produk ring Indonesia. Parikrama puniki kasarengin olih 21 Program Studi Desain Produk saking makudang-kudang perguruan tinggi sane dados anggota Forum Program Studi Desain Produk Industri Indonesia. Pawigian IIDSA6 puniki kamargiang ring Auditorium Kirtya Sabha Mahottama, Gedung Citta Kelangen ISI BALI, rahina Kamis (9/10), tur sampun resmi kabungkah olih Rektor ISI BALI, Prof. Dr. Wayan ‘Kun’ Adnyana, S.Sn., M.Sn.
Risajeroning pidartanyane, Prof Kun Adnyana negesan indik mabuat pisan ngukuhang pengetahuan ilmiah ring widang desain produk sane madasar antuk identitas nasional. “Sane pinih utama inggih punika sabilang jadma akademisi ngarasayang ke-Indonesiaan, kesadaran antuk ngenahang nilai-nilai, kearifan lokal, lan keragaman budaya Nusantara pinaka sumber inspirasi lan dasar ring sajeroning ngerancang karya desain. Desain produk industri prasida nyikiang semangat pemikiran lan semangat pangrawit sane kadasarin antuk budaya bangsa. baos Profesor Sejarah Seni punika. Rahajeng majeng ring Program Studi Desain Produk sami ring Indonesia sane sampun prasida ngamargiang IIDSA6”, punika baos Guru Besar Bidang Sejarah Puniki.
Sedek punika, Koordinator Program Studi Desain Produk ISI BALI, Wahyu Indira, M.Sn., negesan, IIDSA6 nenten wantah genah ngajiang pakaryan kemanten, nanging taler genah anggen ngajinin impian miwah proses kreatif generasi muda. “Ring parikrama puniki, iraga nenten wantah ngamargiang penilaian kemanten, nanging taler ngajiang impian, proses, miwah dedikasi generasi muda sajeroning ngaryanin solusi desain sane madrebe dampak majeng ring krama miwah industri. Parikrama puniki pinaka momentum anggen saling menginspirasi miwah ngukuhang kolaborasi pantaraning mahasiswa desain produk ring sajebag Indonesia,” baos dane.
Manggala Forum Desain Produk Indonesia, Dr. Guguh Sujatmiko, S.T., M.Ds. saking Universitas Surabaya (UBAYA), maosang parikrama puniki nyihnayang semangat kolaborasi pantaraning mahasiswa miwah dosennyane sajeroning nglimbakang desain produk sane relevan lan mapangaruh. “Malarapan antuk acara puniki, iraga ngawangun semangat kolaborasi lan globalisasi desain produk Indonesia mangda mawiguna lan ngicenin kontribusi sane nyata majeng ring bangsa,” baos dane.
Foto: Pembukaan IIDSA6 di Auditorium Kirtya Sabha Mahottama, Gedung Citta Kelangen ISI BALI, Kamis (9/10).
IIDSA6 pacang kamargiang nyantos kalih rahina, 9–10 Oktober 2025, antuk makudang-kudang parikrama minakadi pameran, seminar, talkshow, presentasi karya, awarding, launching buku, miwah pabligbagan indik pamargi forum 2026. Tiosan ring punika, ISI BALI taler pacang dados genah Pameran Desain Produk Nasional sane mamurda “Desain Menceritakan Kisah: Menyusun Bukti, Memelihara Tradisi Nusantara”, sane pacang kalaksanayang ring Ruang Vicon Gedung Citta Kelangen, Lantai 2, ISI BALI.
Kegiatan IIDSA6 puniki taler kasarengin olih makudang-kudang tokoh sane mabuat pisan ring wewidangan desain produk, minakadi Achmad Syarief, S.Sn., M.S.D., Ph.D. saking Institut Teknologi Bandung, Dr. Rahmawan Dwi Prasetya, S.Sn., M.Si. saking Institut Seni Indonesia Yogyakarta, Dr. Zaki Saptiar Saldi, S.T., M.Eng. saking Universitas Pembangunan Jaya, Dr.Guguh Sujatmiko saking Universitas Surabaya, Ira Samri, M.Ds. saking Universitas Paramadina, Winta Tridhatu Satwikasant, Ph.D. saking Universitas Kristen Duta Wacana, miwah Prananda Luffiansyah Malasan, S.Ds., M.Ds., Ph.D. saking Institut Teknologi Bandung sane taler dados Manggala Asosiasi Desain Produk Industri Indonesia (ADPII) Pusat.
Malarapan antuk IIDSA6, ISI BALI puniki ngukuhang perannyane pinaka genah patemon akademisi miwah praktisi desain anggen ngalimbakang inovasi, ngalimbakang jaringan, miwah ngukuhang posisi desain produk Indonesia ring panggung nasional miwah global. Acara puniki taler ngicenin galah majeng ring para desainer anggen genah nyihnayang karya sane pinih becik, nincapin pengalaman kreatifnyane, miwah ngalimbakang semangat identitas Indonesia sane madasar antuk keragaman budaya Nusantara. (ISIBALI/Humas)
