Foto: Penyerahan wantuan tunai marep para mahasisya ISI BALI sane katiben bencana Sumatera, Anggara (9/12) ring Kampus ISI BALI
Dosen lan pegawai Institut Seni Indonesia Bali (ISI BALI) sumanggem mupulang dana welas asih nyihnayang rasa kapariangenan marep ring krama sane keni panca baya Blabar Agung ring wawidangan Sumatra, utamin ipun Sivitas Akademika, ingihan punika mahasisya ISI BALI miwah kampus tiosan sane kapancabaya mekadi ring Aceh, Sumatera Utara, lan Sumatera Barat.
Dana punia sane kapupulang ngawit saking pinanggal 5 kantos 8 Desember 2025, sampun prasida mapikolih makwehnyane Rp122.455.000,-(satus dua likur yuta, samas seket lima tali rupiah). Dana punia puniki raris kasukserahang melantaran tigang geguat inggih punika: 1) katiwakang langsung marep 36 mahasisya ISI BALI sane pamngrawuhnyane mawit saking wewidangan sane ketiben pancabaya (daerah terdampak),makwehnyane Rp18.000.000,-(Plekutus yuta rupiah) soang-soang mahasisya narima marupa jinah Rp500 ribu (limangatus tali rupiah); 2) melantaran rekening Kementerian Pendidikan Tinggi, Sains, lan Teknologi Peduli seageng Rp75.000.000,-(telung benang yuta rupiah ; lan 3) melantaran rekening Infaq Sedekah ISI Padang Panjang-Sumatera Barat seageng Rp29.455.000,-(Sia likur yuta samas seket lima rupiah.
Foto: Penyerahan wantuan tunai marep mahasisya ISI BALI sane katiben Pancabaya Blabar Agung Sumatera, Anggara (9/12) di Kampus ISI BALI
Rektor ISI BALI Prof. Dr. Wayan ‘Kun’ Adnyana nyukserahang langsung wantuan jinah tunai marep ring 36 mahasisya ISI BALI sane pangrawuhnyane sakeng wewidangan sane ketiben pancabaya Sumatra, ring rahina Anggara (9/12) ring Kampus ISIBali. Dane mawosang “Dana punia puniki wantah cihna kaguyuban lan rasa kapariangenan dosen lan tenaga kependidikan (tendik) ISI BALI mantuke ring sasama wargi Nusantara sane katiben panca baya Blabar Agung Sumatera. Melarapan pangrastiti dumogi gelis mewali kadi jati mula, tur kramane mulatsarira metangi egar ngelanturang swadharma soang-soang tur bagia. Ring galah becik puniuki, titiang ngaturang suksamaning manah majeng ring angga dosen lan tendik ISI BALI sareng sami sane sampun saking lascarya mapunia.” Sukserah wantuan inucap taler kasarengin antuk Wakil Rektor Bidang Perencanaan, Keuangan, lan Umum, Dr. Made Jodog; Wakil Rektor Bidang Kemahasiswaan lan Kerja Sama, Prof. Komang Sudirga; Manggala Satuan Pengawas Internal, Dr. Made Bayu Pramana; miwah jejeran manggala Program Studi.
Prof. Kun Adnyana taler nguningayang rasa pariangen lan duhkita sane metu sakeng papusuh jeroning ati, mantuke ring sang palatra, taler ngaturang manah pariangen (bersimpati) mantuke ring kulawarga sane sedeng katiben pancabaya, sinambi ngerastiti dumoigi sang paltra landuh nyujur sunia, santa mapatungilan ring Ida Hyang Parama Wisesa /Tuhan Yang Maha Esa“ (ISIBALI/Humas)
