Foto: Loka Karya Ngaryanin Ider-Ider miwah Saput Saka Gedung Jineng ring Wantilan Loka Sabha Mandala ISI BALI, Soma (30/3).
Institut Seni Indonesia Bali (ISI BALI) ngalaksanayang Loka Karya Ngaryanin Ider-Ider miwah Saput Saka Gedung Jineng sane mamurda “Kriya-Yadnya-Kawiya” ring rahina Soma, 30 Maret 2026, magenah ring Wantilan Loka Sabha Mandala ISI BALI. Parikrama puniki kasarengin olih mahasiswa saking Program Studi Desain Komunikasi Visual, Kriya, miwah Seni Murni.
Loka karya puniki kabungkah olih Ketua Senat ISI BALI, Prof. Dr. Drs. I Ketut Muka, M.Si. Ring sajeroning parikrama punika, ISI BALI ngerauhang pragina/perajin saking Klungkung, Anak Agung Gede Anom Martawan, dados narasumber.
Manggala Panitia, Dr. Nyoman Laba, nlatarang mungguing loka karya puniki matetujon ngenalang tata cara ngaryanin gambar ider-ider miwah saput saka nganggen teknik prada bakar majeng ring para mahasiswa. Melarapan antuk parikrama puniki, mahasiswa nenten ja malajahin proses artistik manten, nanging taler nelebin piranti miwah bahan sane kaperluang, teknik pengerjaan sane becik, kantos ring tahapan ngardi karya.
Mahasiswa kamanahang prasida malajah langsung saking narasumber ngeninin teknik ngaryanin ider-ider miwah saput saka nganggen teknik prada bakar, ngawit saking kawigunan piranti kantos ring proses pengerjaannyane,” baos Dr. Nyoman Laba.
Foto: Loka Karya Ngaryanin Ider-Ider miwah Saput Saka Gedung Jineng ring Wantilan Loka Sabha Mandala ISI BALI, Soma (30/3).
Ring sajeroning loka karya punika, para pamilet kawanahang ngeninin tata cara ngaryanin ider-ider miwah saput saka sane kakawitin antuk ngerupa (ngaryanang sketsa) ring kain beludru. Motif sane kagarap lumrahnyane mawit saking papahiasan tradisional Bali, minakadi patra, pepatran, taler unsur flora miwah fauna.
Wusan ngerupa, para pamilet malajahin teknik prada bakar antuk manesang garis-garis sketsa nganggen solder panes. Pahan kain beludru sane keni solder punika jagi ngardi alur manut ring gambar sane sampun kakaryanin. Salanturnyane, pahan punika katurid antuk warna prada mas mangda motifne kanten nunggal tur ageng. Teknik puniki muatang kapuputan miwah kateleban tangan santukan iwang akidik prasida muugang kain miwah rincikan motif sane sampun kagambar. Melarapan antuk proses punika, mahasiswa malajah ngasilang papahiasan sane rapi tur maduwe nilai estetis sane tegeh.
Ring sajeroning daging sambutannyane, Prof. I Ketut Muka mapangapti mangda loka karya puniki prasida micayang pangalaman anyar majeng ring mahasiswa, saha dados sarana malajah madasar praktik sane ngicenin kaweruhan miwah kawagedan.
Dane taler maosang mungguing pikolih karya saking loka karya puniki jagi kanggén saput saka miwah ider-ider Gedung Jineng, wangunan anyar ring lingkungan ISI BALI sane jagi kamelaspas ring pinanggal 4 April 2026.
Melarapan loka karya puniki, mahasiswa nenten ja malajah makarya manten, nanging taler nyihnayang kontribusi langsung majeng ring kaperluan artistik kampus. Pikolih karya sane kakaryanin rahina puniki jagi ka-anggen ring Gedung Jineng sane jagi diplaspas ring 4 April sane jagi rauh,” baos dane.
Parikrama puniki dados cihna sinergi pabuat malajah akademik miwah ngulati kawentenan seni tradisi Bali. Antuk ngerauhang perajin sane sampun waged, mahasiswa polih galah malajah langsung ngeninin teknik tradisional sane maduwe nilai estetika miwah kawigunan ring upacara miwah arsitektur Bali. (ISIBALI/Humas)
Foto: Menteri Pariwisata Republik Indonesia, Widiyanti Putri Wardhana, B.Sc. nyaksiang Pameran Retrospektif Seni Lukis Kontemporer “Parama Paraga” ring Nata-Cita Art Space (N-CAS) ISI Bali, ring rahina Buda (25/3).
Pamargin lantang seni rupa kontemporer kapupulang sajeroning Pameran Retrospektif Seni Lukis Kontemporer ‘Parama Paraga’ pakaryan sang rupa taler pinaka Rektor Institut Seni Indonesia Bali (ISI BALI), Prof. Dr. Wayan Kun Adnyana, sané kamargiang ring Nata-Cita Art Space (N-CAS) ISI BALI, nuju rahina Buda (25/3) sanja.”
Pameran puniki pinaka inisiatif praragan Prof. Kun Adnyana sané nyihnayang penyingakan pamargin artistik dané langkung saking kalih dasawarsa. Pameran sané kakurasi olih Jeon Dongsu, Warih Wisatsana, miwah Alaida Niwaya puniki nampingang 88 pakaryan sané nyihnayang transformasi visuall saking uleman wangunan angga ngantos nincap dados komposisi abstrak madasar saking garis miwah warna.
Sajeroning galah piteket pangukuhan, Menteri Pariwisata Republik Indonesia, Widiyanti Putri Wardhana, B.Sc. maderbe galah rauh taler nyantenang langsung pakaryan-pakaryan sané kasajiang. Rauhné Menteri Pariwisata taler dados pahan saking parikrama pangukuhan Kalangan Widya Mahardika V, sané kamargiang ring wewidangan kampus ISI BALI.
Foto: Pameran Retrospektif Seni Lukis Kontemporer “Parama Paraga” pakaryan Prof. Kun Adnyana ring Nata-Cita Art Space (N-CAS) ISI BALI, ring rahina Buda (25/3).
Sajeroning paridarta nyané, Prof. Kun Adnyana nureksayang indik ‘Parama Paraga’ pinaka pamargin lantang sané nyuratang dinamika pangupaya artistik sané satata nincap. ‘Puniki pinaka pamargin lantang, langkung saking 20 warsa, saking uleman angga ngantos dados komposisi warna sané ning, madasar antuk garis pinaka bantang utama,’ asapunika pabaos dané.”
Guru Besar Widang Sejarah Seni puniki taler nyambungang pameran puniki antuk semangat Kalangan Widya Mahardika V sané ngunggahang unteng ‘Kirtya Jnana Kawiya’, pinaka upaya ngediyang miwah nangiang kaweruhan malarapan antuk parikrama maseni.
Pinaka genah seni sané magenah ring wewidangan kampus, Nata-Cita Art Space (N-CAS) ISI BALI dados genah strategis sajeroning nampingang parikrama seni rupa kontemporer majeng krama sareng akeh taler nyukertayang ekosistem akademik. Wentennyane pameran tunggal puniki taler nyihnayang swadharma ganda Prof. Kun Adnyana, nénten ja wantah pinaka manggala institusi, nanging taler pinaka sang rupa sané satata makarya.
Prof. Kun Adnyana ngawewuhin, parikrama puniki nénten ja wantah pameran kemanten, nanging taler dados ‘pesta seni akademika’ sané ngicénin galah majeng dosen miwah mahasisya mangda wanén nampingang raga ring panggung global. ‘Pariwisata madasar antuk budaya punika pinaka dasar sané mabuat sajeroning nincapang seni miwah budaya Bali. Punika sangkaning titiang ngaturang pakeling majeng Ibu Menteri Pariwisata pinaka pahan saking sinergi pantaraning jagat seni miwah pariwisata,’ asapunika teges dané.
Menpar Widiyanti Putri Wardhana, B.Sc. ngicénin apresiasi utama majeng pameran pakaryan Prof. Kun Adnyana sané kabaos maderbe kakuatan artistik miwah kawéntenan unteng sané akeh. Manut dané, pakaryan-pakaryan punika nénten ja wantah maderbe nilai estetika, nanging taler nagingin narasi budaya Bali ring tengahing pamargin seni kontemporer. Pameran ‘Parama Paraga’ kajadwalang mamargi ngantos tanggal 4 Mei sané jagi rauh miwah kabungkah majeng krama sareng akéh pinaka genah apresiasi majeng pamargin lantang sang rupa sajeroning nindakin pamargin seni rupa kontemporer. (ISIBALI/Humas)
Foto: Pangukuhan Kalangan Widya Mahardika V ring Auditorium Kirtya Sabha Mahottama, Institut Seni Indonesia (ISI BALI), ring rahina Buda (25/3).
Menteri Pariwisata RI, Widiyanti Putri Wardhana, B.Sc. ngawedar parikrama Kalangan Widya Mahardika V (Pekan Kesenian Akademika) sané mamurda Kirtya-Jnana-Kawya ‘Mulia Pengetahuan Luhur’ ring Auditorium Kirtya Sabha Mahottama, Institut Seni Indonesia (ISI BALI), ring rahina Buda (25/3). Parikrama sané sampun memargi wanti warsa kaping lima puniki, malih dados genah kreatif sané nunggilang nincapang seni, kaweruhan, miwah nyukertayang nilai-nilai budaya Bali.
Sajeroning daging pabaos nyané, Widiyanti nureksayang indik uahan tren pariwisata global sané mangkin sayan nuju ring pangalaman sané langkung dalem. Manut dané, para wisatwané nénten ja wantah ngrereh genah malali-lali kemanten, nanging taler ngrereh pangalaman sané maderbe suksma.
Menpar Widiyanti ngicénin apresiasi majeng swadharma ISI BALI pinaka institusi pendidikan seni sané maderbe kaitan erat antuk ekosistem pariwisata. Dané nureksayang kontribusi sivitas akademika miwah alumni ISI BALI sampun nagingin makudang-kudang parikrama seni budaya, sajeroning tingkat lokal miwah nasional.
Kalangan Widya Mahardika sampun memargi limang warsa miwah dados genah mabuat sajeroning nampingang inovasi taler ngediyang kadiatmikan tradisi Bali,’ asapunika pabaos dané.
Foto: Menteri Pariwisata RI, Widiyanti Putri Wardhana, B.Sc. ngawedar parikrama Kalangan Widya Mahardika V ring Auditorium Kirtya Sabha Mahottama, Institut Seni Indonesia (ISI BALI), ring rahina Buda (25/3).
Dané taler nureksayang makudang-kudang pakaryan kolaboratif sané kasolahang sajeroning parikrama puniki, ngawit saking sasolahan kolosal ngantos nincapang seni tradisi sakadi drama tari Arja sané kasajiang antuk tata cara anyar.
Sajeroning galah punika, Menpar Widiyanti taler nyaksiang penandatanganan Nota Kesepahaman (Memorandum of Understanding/MoU) pantaraning ISI BALI miwah Politeknik Pariwisata Bali. Penandatanganan MoU puniki pinaka pemargi strategis sajeroning nincapang kualitas sumber daya manusia pariwisata, madasar antuk raketing pasubayan widang pariwisata miwah kebudayaan.
Rektor ISI BALI, Prof. Dr. Wayan Kun Adnyana, ngaturang rasa suksma miwah apresiasi majeng Menteri Pariwisata RI sareng jajaran taler para tokoh sané rauh miwah ngicénin panyokong majeng pamargin Kalangan Widya Mahardika V.
Sajeroning pabaos nyané, dané nlatarang suksma filosofis saking Kalangan Widya Mahardika pinaka genah aktualisasi sané nénten ja wantah artistik, nanging taler spiritual miwah intelektual. ‘Kalangan punika genah aktualisasi sané merluang pangupaya nincap sané darmaning jati, nanging Mahardika mateges kemahardikaan sané taler patut kagrayang malarapan antuk pemargi sané nénten dangan,’ asapunika pabaos dané.
Langkung saking punika, dané nureksayang indik makakalih konsep punika nyihnayang genah pangulati sané ngalangkungin kabuatan praragan. Kalangan Widya Mahardika dados genah transformasi saking tetujon praragan nuju tetujon institusi, sané salanturnyané nincap dados tetujon kebangsaan ngantos kemanusiaan sané jati.
Foto: Pangukuhan Kalangan Widya Mahardika V ring Auditorium Kirtya Sabha Mahottama, Institut Seni Indonesia (ISI BALI), ring rahina Buda (25/3).
Kalangan Widya Mahardika V nampingang makudang-kudang sasolahan seni sané nyihnayang kasugihan ekspresi miwah inovasi sivitas akademika Institut Seni Indonesia Bali. Parikrama puniki ngranjing Gelar Pertunjukan Kolosal Intermedium sané mamurda Kirtya–Jnana–Kawya pinaka pamungkah utama, taler Pameran Retrospektif Seni Lukis Kontemporer ‘Parama Paraga’ pakaryan Rektor ISI BALI, Prof. Dr. Wayan Kun Adnyana.
Langkung saking punika, Kalangan Widya Mahardika taler nampilang Prosesi Seni Pertunjukan Ritus sané dagingnjané nagingin nilai tradisi, taler Gelar Drama Tari Luwih Arja Luh sané mamurda Ranu–Saraswati–Rasmi pinaka pahan saking nincapang seni sasolahan madasar antuk tradisi nganggen tata cara kreatif miwah kontekstual. (ISIBALI/Humas)
Foto: Pagelaran Tari Serng Kratip olih makudang-kudang mahasiswa saking Angthong College of Dramatic Arts lan Roi Et College of Dramatic Arts, Thailand sareng-sareng mahasiswa ISI BALI, nuju rahina Soma (23/2) magenah ring Gedung Natya Mandala ISI BALI.
Institut Seni Indonesia Bali (ISI BALI) ngalaksanayang pagelaran seni sane nyihnayang kolaborasi budaya pantaraning Angthong College of Dramatic Arts lan Roi Et College of Dramatic Arts, Thailand, sareng sivitas akademika ISI BALI, nuju rahina Soma (23/2) magenah ring Gedung Natya Mandala ISI BALI. Pagelaran puniki pinaka lanturan saking parikrama workshop seni sane sadurungnyane sampun kalaksanayang sareng delegasi saking Thailand, sapisanan dados genah apresiasi ring pikolih pangajah-ajah miwah pakerat kanti budaya sane sampun mamargi.
Acara puniki kakawitin antuk sasolahan Tari Selat Segara sane kabaktayang olih mahasiswa Program Studi Pendidikan Seni Pertunjukan (PSP) ISI BALI, kaindihin antuk tabuh gamelan olih mahasiswa PSP. Sasolahan panyanggra puniki nyihnayang kawentenan sane dinamis sapisanan nyinahang kasugihan seni pertunjukan Bali ring sapangrauh sang sane saking Thailand.
Foto: Sasolahan Karawitan olih para dosen Angthong College of Dramatic Arts lan Roi Et College of Dramatic Arts, Thailand sareng para dosen miwah mahasiswa ISI BALI, nuju rahina Soma (23/2) magenah ring Gedung Natya Mandala ISI BALI.
Salanturnyane, delegasi saking Thailand nyihnayang tigang soroh sasolahan tradisional Thailand sane nyinahang kasugihan budaya saking makudang-kudang wewidangan ring panegara punika. Sasolahan sane kapertama inggih punika Fon Dok Mai utawi Dance of Flowers, silih tunggil sasolahan tradisional sane nyinahang solah tangan sane alus maduluran antuk sarana bunga pinaka simbol kalanguan lan kaharmonisan.
Sasolahan sane kaping kalih inggih punika Serng Kratip, sasolahan krama saking wewidangan Isan sane madue solah dinamis tur nganggen kain lipit sane rupa ipun kadi kampid ritatkala pragina punika masesolahan. Sasolahan puniki kabaktayang antuk kolaborasi olih mahasiswa Thailand sareng mahasiswa ISI BALI sane sadurungnyane sampun nyarengin workshop tari tradisional Thailand.
Panyutun sasolahan puniki inggih punika sasolahan krama Isan sane kabaktayang mapahiyasan (mapasangan) olih pragina lanang lan istri. Sasolahan puniki nyinahang kauripan krama ring desa sane bek antuk kaliangan miwah kapiulangan, antuk gerak sane enerjik tur ekspresif.
Siosan ring sasolahan, pagelaran puniki taler nyihnayang pikolih workshop karawitan sane sadurungnyane sampun kamargiang sareng mahasiswa ISI BALI. Sasolahan punika kabaktayang olih para dosen saking Thailand sareng Wakil Rektor Bidang Kemahasiswaan lan Kerja Sama ISI BALI, Prof. Dr. Komang Sudirga, Kepala Lembaga Penelitian dan Pengabdian kepada Masyarakat (LPPM) Dr. Ketut Garwa, Koordinator Prodi (Koprodi) PSP, Putu Hartini, M.Sn, Koprodi Karawitan Made Dwi Andika Putra, M.Sn, miwah makudang-kudang mahasiswa PSP ISI BALI. Kolaborasi puniki nyinahang paridabdab pakerat kanti kaweruhan miwah praktik seni pantaraning makakalih pihak sane sampun mamargi ritatkala parikrama workshop.
Pagelaran puniki dados galah sane mabuat pisan sajeroning ngeratang kanti akademik miwah budaya pantaraning ISI BALI lan institusi seni saking Thailand. Melarapan antuk sasolahan seni sane kolaboratif, parikrama puniki ngicenin pangalaman artistik ring para mahasiswa sapisanan nincapang dialog budaya ring sajeroning para seniman miwah akademisi saking makakalih panegara.
Foto: ISI Bali ngalaksanayang workshop tari tradisional Thailand sareng Angthong College of Dramatic Arts lan Roi Et College of Dramatic Arts, Thailand, ring rahina Soma (23/2) magenah ring Studio Tari ISI Bali.
Institut Seni Indonesia Bali (ISI Bali) nampi sapangrauh delegasi saking Angthong College of Dramatic Arts lan Roi Et College of Dramatic Arts, Thailand, sajeroning nincapang penjajakan kerja sama ring widang pergelaran seni lan workshop kolaboratif. Parikrama puniki kalaksanayang ring rahina Soma (23/2) magenah ring Gedung Natya Mandala, ISI Bali.
Delegasi saking Thailand punika kakepah antuk pimpinan, dosen, miwah mahasiswan saking makakalih institusi inucap. Delegasi Angthong College of Dramatic Arts kamargiang olih Mr. Etsawat Paksin pinaka Direktur, kasarengin antuk para dosen Mr. Channar Kaeosawang, Mr. Chalermchai Pimonrak, Mrs. Ratchanewan Srinsakrat, Miss Suchanya Kongsin, Miss Thitima Ongthong, miwah Mr. Atitak Rukdee, sapunika taler mahasiswa Mr. Vongathorn Timnoee, Miss Nattanan Chumsuwan, lan Miss Kanyarat Kumsin.
Ring galahe punika, delegasi Roi Et College of Dramatic Arts kamargiang olih Miss Benjita Petchsom pinaka Direktur kasarengin antuk Miss Kemika Wongamrin pinaka Deputy Director. Taler rauh para dosen Mr. Achariya Wongsi, Miss Nattawan Pimonket, Miss Phailin Sarnkam, Mr. Chaimongkhon Sriphaet, Mr. Runset Sritham, miwah Mr. Pongsakda Padkeoplon, sapunika taler mahasiswa Miss Jariya Chosakao lan Miss Chanantida Luaksiase.
Foto: Parikrama workshop karawitan sané kasarengin olih para dosen saking Angthong College of Dramatic Arts lan Roi Et College of Dramatic Arts, Thailand, kalaksanayang ring rahina Soma (23/2) magenah ring Studio Karawitan ISI Bali.
Sajeroning parikrama penjajakan kerja sama punika, sapangrauh delegasi taler kadagingin antuk workshop seni pinaka galah macepukang kaweruhan lan pangalaman artistik antuk makakalih institusi inucap. Delegasi Thailand ngicénin workshop tari tradisional Thailand sané kalaksanayang ring Studio Tari ISI Bali tur kasarengin olih para mahasiswa Program Studi Tari ISI Bali. Parikrama puniki ngicénin galah majeng para mahasiswa mangda uning ring teknik, estetika, miwah karakter gerak sajeroning dresta tari Thailand. Pinaka pamesuang timbal balik, ISI Bali taler ngawéntenang workshop karawitan sané kamargiang ring Studio Karawitan ISI Bali. Workshop puniki kabaosang olih Wakil Rektor Bidang Kemahasiswaan lan Kerja Sama ISI Bali, Prof. Dr. Komang Sudirga, kasarengin antuk Kepala Lembaga Penelitian dan Pengabdian kepada Masyarakat (LPPM) ISI Bali, Dr. Ketut Garwa. Parikrama punika kasarengin olih para dosen miwah mahasiswa saking delegasi Thailand sané polih galah malajahin dasar-dasar musik tradisional Bali, pamekasnyané ring praktik karawitan. (ISIBALI/Humas)
Foto: Riri Riza (tengen) kawisuda ring Wisuda Sarjana, Sarjana Terapan, Magister, miwah Doktor XXXIX sane kalaksanayang nuju rahina Sukra (27/2) ring Auditorium Kirtya Sabha Mahottama ISI BALI
Program Studi Seni Program Doktor ring Program Pascasarjana ISI BALI sane sampun polih akreditasi Unggul saking Badan Akreditasi Nasional Perguruan Tinggi (BAN-PT), malih nyinahang linggihnyane pinaka genah akademik sane ngembahang sang maraga pemikir miwah praktisi seni madasar antuk riset. Rekam jejak para lulusannyane nyihnayang kontribusi sane nyata ring makudang-kudang widang seni miwah kebudayaan, yadiastun punika ring widang penciptaan, pengkajian, utawi kebijakan budaya.
Ring Wisuda Sarjana, Sarjana Terapan, Magister, miwah Doktor XXXIX sane kalaksanayang nuju rahina Sukra (27/2) ring Auditorium Kirtya Sabha Mahottama ISI BALI, kalih figur publik nasional taler kakukuhang dados Doktor Seni, inggih punika sineas Riri Riza miwah aktris Zeezee Shahab. Makakalih kawisuda sareng para lulusan lianan sajeroning suasana sane khidmat tur membanggakan.
Riri Riza, sane madue wastana Mohammad Rivai Riza, kasub pinaka sutradara miwah produser sane karya-karyannyane madue sesana mabuat pisan ring panglimbak perfilman Indonesia modern. Melalantupan film-filmnyane, dane nampilang perspektif sinematik sane reflektif tur kontekstual sajeroning nureksain realitas sosial miwah budaya. Pendidikan doktoral sane kamargiang ring ISI BALI puniki dados genah mabuat anggen nincapang pamineh akademik ngeninin indik praktik kreatif sane sampun kalaksanayang, sinambi nagingin khazanah kajian seni madasar antuk pengalaman profesional.
Foto: Zeezee Shahab (tengen) kawisuda ring Wisuda Sarjana, Sarjana Terapan, Magister, miwah Doktor XXXIX sane kalaksanayang nuju rahina Sukra (27/2) ring Auditorium Kirtya Sabha Mahottama ISI BALI.
Sajeroning galah punika, Zeezee Shahab sane madue wasta jangkep Fauziah Shahab, taler resmi polih gelar Doktor Seni ring galah sane pateh. Kiprah dane ring industri seni peran miwah jagat kreatif nasional mangkin sayan kukuh madasar antuk akademik miwah riset sane teleb. Pendidikan doktoral puniki ngicenin dane galah nureksain indik praktik keaktoran miwah dinamika industri kreatif sajeroning perspektif keilmuan.
Rauhne para lulusan saking latar belakang profesional sane ngrincab puniki nyihnayang mungguing Program Studi Seni Program Doktor ISI BALI nenten ja wantah pusat pengembangan akademik semata, nanging pinaka genah dialog riantara teori miwah praktik, riantara penciptaan miwah pemikiran. Program puniki setata ngenahang raga pinaka genah ngukuhang widang pemineh, artikulasi praksis seni madasar antuk riset, tur panglimbak ilmu pengetahuan seni sane relevan ring dinamika kebudayaan kontemporer. (ISIBALI/Humas)
