Foto: Lingatangan MoA pantaraning Fakultas Seni Pertunjukan ISI BALI miwah Faculty of Liberal Arts, Thammasat University, Budha (15/4) ring Gedung Natya Mandala ISI BALI.
Fakultas Seni Pertunjukan Institut Seni Indonesia Bali (ISI BALI) nampi pangrauh 16 delegasi saking Faculty of Liberal Arts Thammasat University, Thailand, Budha (15/4) ring Gedung Natya Mandala ISI BALI. Parikrama puniki kapidartayang sajeroning parikrama Temu Silang Budaya sane mamurda Widya-Bhuana-Waskita (Kecakapan Pengetahuan Global). Parikrama puniki pinaka bukti nyata kolaborasi internasional pantaraning Fakultas Seni Pertunjukan ISI BALI miwah Faculty of Liberal Arts, Thammasat University, Thailand.
Akeh delegasi saking Thammasat University sane rauh inggih punika 16 diri, sane kaenter olih Dr. Hamam Supriyadi, M.A. Pangrauh delegasi punika ngukuhang pasubayan akademik miwah budaya sane sampun mamargi pantaraning makakalih institusi punika.
Sajeroning dudonan parikrama, kamargiang palingatangan Memorandum of Agreement (MoA) miwah Implementation of Arrangement (IA) pantaraning Fakultas Seni Pertunjukan ISI BALI miwah Faculty of Liberal Arts, Thammasat University. Naskah pasubayan punika kalingatangan olih Dekan Fakultas Seni Pertunjukan ISI BALI, Prof. Dr. I Gede Yudarta, S.SKar., M.Si., tur kasaksiang olih perwakilan Thammasat University, Dr. Hamam Supriyadi, M.A. Salanturnyane, naskah punika pacang kabakta ka Thailand mangda kalingatangan olih Dekan Faculty of Liberal Arts, Thammasat University.
Sajeroning sambutannyane, Prof. Dr. I Gede Yudarta maosang indik parikrama puniki pinaka pamargi strategis sajeroning ngukuhang kerja sama internasional ring widang seni pertunjukan. Manut dane, kolaborasi puniki nenten ja wantah ngicen pikenoh akademik, nanging taler ngukuhang pasubayan antarbangsa miwah budaya. Sinergi puniki kaaptiang mangda prasiddha ngwangun ekosistem pendidikan seni sane manut ring kahanan (kontekstual) tur prasiddha nampingin tantangan global.
Foto: Pidarta indik Bali miwah Ngrajengang Budaya Bali olih Koordinator Urusan Internasional ISI BALI, Dr. Ni Kadek Dwiyani, Budha (15/4) ring Gedung Natya Mandala ISI BALI.
Pasubayan pantaraning ISI BALI miwah Thammasat University sadurungnyane taler sampun mamargi malarapan antuk program mobilitas mahasiswa. Ring warsa 2024, mahasiswa ISI BALI sane polih Paica Beasiswa AIMS (ASEAN International Mobility for Students) milih Thammasat University pinaka universitas tatujon.
Perwakilan Faculty of Liberal Arts, Thammasat University, Dr. Hamam Supriyadi, M.A., nyihnayang rasa angayubagia antuk panyanggra sane becik pisan saking ISI BALI ring makasami delegasi. Dane ngaturang suksma pisan antuk panyanggra sane becik sakadi kulawarga sajeroning pangrauh punika. Salanturnyane, ida ngaptiang pasubayan sane sampun mamargi puniki prasiddha sayan nincap malarapan antuk makudang-kudang program kolaboratif ring masa jagi rauh, becik punika ring widang akademik, panyilur mahasiswa, miwah parikrama seni budaya.
Tiosan ring palingatangan naskah pasubayan, parikrama puniki taler kadagingin antuk pidarta indik Bali miwah budaya Bali sane kawedar olih Koordinator Urusan Internasional (KUI) ISI BALI, Dr. Ni Kadek Dwiyani. Sajeroning pidartannyane, ida ngenalang makudang-kudang pahan budaya Bali sane becik, kakawitin saking kuliner, busana adat, kantos basa Bali.
Pinaka panyineb, mahasiswa Program Studi Pendidikan Seni Pertunjukan (PSP) ISI BALI nyolahang Tari Kecak sane taler nyarengang 15 mahasiswa saking Thammasat University. Kolaborasi punika nyihnayang semangat panyilur budaya sane dados unteng parikrama Temu Silang Budaya puniki. (ISIBALI/Humas)
Foto: Sesolahan Drama Tari Luwih Arja Luh sane mamurda “Ranu–Saraswati–Rasmi” ring Kalangan Nretya Mandala ISI BALI, Saniscara (4/4).
Ngarsayang Kalangan Widya Mahardika V (Pekan Seni Akademika) sane mamurda Kirtya-Jnana-Kawya antuk suksman ipun “Memulia Pengetahuan Luhur”, Institut Seni Indonesia Bali (ISI BALI) nyihnayang Sesolahan Drama Tari Luwih Arja Luh sane mamurda “Ranu–Saraswati–Rasmi” ring Kalangan Nretya Mandala ISI BALI, Saniscara (4/4), nemoning Rahina Suci Saraswati (Saniscara Kliwon Wuku Watugunung). Sesolahan punika dados silih tunggil puncak rangkaian Kalangan Widya Mahardika sane saking pangawit muatsang makudang-kudang parikrama seni lan budaya ring wewidangan kampus ISI BALI.
Rektor ISI BALI, Prof. Dr. Wayan ‘Kun’ Adnyana, maosang indik sesolahan puniki madue suksman becik sakadi wastan “Luwih Arja Luh” sane nindihang peran para istri ring jagat seni pertunjukan. “Sesolahan puniki pisan utama duaning prasiddha kasolahang olih para pragina istri, kakawitin saking dosen, tenaga kependidikan, kantos mahasiswi ISI BALI. Para istri puniki nenten ja wantah kocap tangguh, nanging taler melah, lung, lan maderbe karisma ring duur kalangan panggung tur prasiddha ngicénin piteket becik ring iraga sareng sami,” sapunika baos dane.
Foto: Sesolahan Drama Tari Luwih Arja Luh sane mamurda “Ranu–Saraswati–Rasmi” kabuka ring Kalangan Nretya Mandala ISI BALI, Saniscara (4/4).
Dane taler nyihnayang rasa angayubagia lan matur suksma ring makasami angga sane sampun nyarengin sajeroning rangkayan Kalangan Widya Mahardika V, kakawitin saking pamungkah kantos sesolahan ring rahina punika. “Tityang ngaturang suksma pisan antuk pasarengan makasami unsur ring sajeroning Kalangan Widya Mahardika saking kabuka kantos sesolahan rahina puniki. Semangat jengah sajeroning pakedek pakenyung lan kawagedan (kreativitas) sane kapaunggahang dados kakuatan mabuat ring ISI BALI nindihang kaweruhan, seni, miwah budaya,” sapunika baos dane.
Pinaka pahan sane ngukuhang daging kasuksman suci (sakral) ring pementasan punika, taler kasolahang Sesolahan Napak Pertiwi Palawatan Suci Pura Padma Nareswara ISI BALI. Penampilan puniki pinaka simbol panyungsungan ring nilai-nilai spiritual lan kearifan lokal, sinambi nyihnayang kuluwitan kauripan sane harmonis ri antara manusa, palemahan, miwah Ida Sang Hyang Widhi Wasa.
Foto: Sesolahan Napak Pertiwi Palawatan Suci Pura Padma Nareswara ISI BALI ring Kalangan Nretya Mandala ISI BALI, Saniscara (4/4).
Sadurung sesolahan drama tari punika kalaksanayang, ri kala semeng Institut Seni Indonesia Bali (ISI BALI) kapertama ngamargiang upacara Mecaru, Mlaspas, Pasupati, miwah Mapadagingan. Upacara punika kamargiang pinaka rangkayan panyucian lan panyelarasan ring makudang-kudang wewangunan anyar miwah wewangunan sane sampun puput kabenahing (direnovasi) ring wewidangan kampus ISI BALI. (ISIBALI/Humas)
Foto: Upacara Mecaru, Mlaspas, Pasupati, miwah Mapadagingan, ring rahina Saniscara (4/4) magenah ring Kampus ISI BALI.
Institut Seni Indonesia Bali (ISI BALI) nglaksanayang upacara Mecaru, Mlaspas, Pasupati, miwah Mapadagingan ring rahina Saniscara (4/4) nemoning Rahina Suci Saraswati (Saniscara Kliwon Wuku Watugunung) ring wewidangan kampus ISI BALI. Upacara punika kalaksanayang pinaka ririgan parikrama panyucian miwah panyelarasan majeng makudang-kudang wangunan anyar taler wangunan sane sampun puput kabenah (direnovasi) ring wewidangan kampus.
Indik wangunan sane kaupacarain minakadi Gedung Jineng, Bencingah Agung, Candi Nretya Mandala, Tugu Nama, Gedung Natya Mandala, miwah Gedung Gede Manik. Dosen, mahasisya, miwah tenaga kependidikan ISI BALI sareng-sareng nyarengin pamargin upacara sane mamargi khidmat pisan.
Foto: Upacara Mecaru, Mlaspas, Pasupati, miwah Mapadagingan, ring rahina Saniscara (4/4) magenah ring Kampus ISI BALI.
Pamargin upacara Mecaru puniki kamargiang pinaka utsaha nyaga kategtegan miwah kauratiang jagat sekala miwah niskala ring wewidangan kampus. Salanturnyane, upacara Mlaspas miwah Pasupati kalaksanayang sajeroning nyuciang taler nunas panyupatan miwah kakuatan spiritual majeng wangunan-wangunan sane jagi kanggén genah paplajahan (aktivitas akademik), seni, miwah linging papalaian (pelayanan) ring ISI BALI. Sajeroning punika, Mapadagingan pinaka pralambang pangunggah miwah kauripan wangunan mangda sayaga kanggén.”
Foto: Ayahan Tari Baris Gede olih mahasisya ISI BALI sajeroning Upacara Mecaru, Mlaspas, Pasupati, miwah Mapadagingan, ring rahina Saniscara (4/4) magenah ring Kampus ISI BALI.
Ririgan upacara puniki taler kasarengin antuk makudang-kudang ayahan seni sane katurang olih sivitas akademika ISI BALI. Mahasisya ISI BALI ngaturang Konser Gamelan Ritus, Tari Rejang Dewa, Tari Baris Gede, miwah Topeng Wali pinaka pahan saking aturan suci sajeroning upacara.
Tiosan punika, Dharma Wanita Persatuan (DWP) ISI BALI taler nyarengin ngaturang Tari Rejang Nata Hita. Pangunggah ayahan punika nukuang malih kening (kekhidmatan) upacara sapisanan nyinahang semangat pasikian saking makasami unsur kampus sajeroning nyokong pamargin upacara puniki. (ISIBALI/Humas)
Foto: Ayahan Tari Rejang Nata Hita olih DWP ISI BALI sajeroning Upacara Mecaru, Mlaspas, Pasupati, miwah Mapadagingan, ring rahina Saniscara (4/4) magenah ring Kampus ISI BALI.
Institut Seni Indonesia Bali (ISI BALI) nglaksanayang parikrama mareresik miwah nandur taru sajeroning Bali-Dwipantara Karma (Nemu Gelang Nusantara) maka pahuman Bali Sangga Dwipantara VI sane mamurda Kerthi-Tuwuh-Krama, nuju Rahina Sukra (3/4) ring Kampus ISI BALI.
Kategtegan masemeton miwah pasasuratan becik pisan kanten rikala parikrama punika mamargi. Mahasisya, dosen, miwah tenaga kependidikan sareng-sareng mresihin wewidangan kampus taler nitenin genah sane jagi kanggén ring sajeroning upacara. Parikrama puniki pinaka bukti nyata nglaksanayang nilai ngulungung (gotong royong) miwah rasa duék sareng sami ring wewidangan kampus.
Upacara Mecaru, Mlaspas, Pasupati, miwah Mapadagingan kapidabdabin jagi kemargiang ring rahina Saniscara (4/4) nemoning Rahina Suci Saraswati ring Pura Padma Nareswari ISI BALI. Pamargin masedia parikrama mareresik miwah nandur taru puniki kaaptiang prasida nukuang kelancaran upacara sapisanan ngukuhang semangat pasikian sivitas akademika ISI BALI.
Bali-Dwipantara Karma (Nemu Gelang Nusantara) inggih punika silih tunggil ririgan Bali Sangga Dwipantara VI sane nenten wantah nampilang seni miwah budaya, nanging taler nanurang nilai kauratiang ring palemahan miwah ngukuhang kategtegan sosial ring wewidangan kampus. (ISIBALI/Humas)
Foto: Mahasisya Maprestasi ISI BALI, I Kadek Ongky Dwi Dhavinci (pinih tengawan) miwah Haggai Osfred Benagamma Dao (kiwa) sajeroning parikrama panyapa (pembekalan) miwah ngunggahang berkas Pilmapres tingkat wilayah, Anggara (31/3) ring Ruang Lounge ISI BALI.
Institut Seni Indonesia Bali (ISI BALI) nitetapang mahasisya maprestasi tingkat institut majeng ring program sarjana miwah diploma warsa 2026. Penatapan punika kamargiang madasar antuk pikolih Pemilihan Mahasiswa Berprestasi (Pilmapres) sané kalaksanayang ring rahina Sukra (27/3) ring Kampus ISI BALI.
Pikolih pamilihan punika kasurat sajeroning Berita Acara Nomor Manual.1056/IT5.5/DT.01.02/2026 majeng program sarjana miwah Nomor Manual.1057/IT5.5/DT.01.01/2026 majeng program diploma, tanggal 30 Maret 2026.
Wakil Rektor Bidang Kemahasiswaan miwah Kerja Sama ISI BALI, Prof. Dr. I Komang Sudirga, S.Sn., M.Hum., maosan indik pamilihan mahasisya maprestasi puniki madasar antuk Pedoman Pemilihan Mahasiswa Berprestasi Warsa 2026 sané kamedalang olih Direktorat Pembelajaran miwah Kemahasiswaan, Direktorat Jenderal Pendidikan Tinggi, Kementerian Pendidikan Tinggi, Sains, miwah Teknologi Republik Indonesia.
Ring kategori program sarjana, I Kadek Ongky Dwi Dhavinci saking Program Studi Desain Komunikasi Visual molihang predikat Mahasisya Maprestasi I. Jayanti II kapolihang olih Nyoman Atheny Pramasastra Dewi saking Program Studi Teater, tur Jayanti III kapolihang olih Ketut Yogi Wiriatama saking Program Studi Seni Karawitan.
Siosan punika, predikat Mahasisya Maprestasi Harapan I kapolihang olih Desak Putu Agnis Dewa Yanti Putri saking Program Studi Seni Murni. Mahasisya Maprestasi Harapan II kapolihang olih Ni Putu Harimayaka Putri Lila saking Program Studi Musik, tur Mahasisya Maprestasi Harapan III kapolihang olih Neisha Zintya Fireska saking Program Studi Kriya.
Ring kategori program diploma, Haggai Osfred Benagamma Dao saking Program Studi Produksi Film miwah Televisi kapilih dados Mahasisya Maprestasi I. Jayanti II kapolihang olih Angelina Agatha Mardiancia saking Program Studi Desain Mode, tur Jayanti III kapolihang olih Caleb Nikao Hutabarat saking Program Studi Animasi.
Mahasisya Maprestasi I tingkat sarjana miwah diploma taler jagi nyalira (mewakili) ISI BALI ring seleksi tahap wilayah sané kalaksanayang olih LLDIKTI Wilayah VIII sadurung nuju tingkat nasional. (ISIBALI/Humas)
Foto: ISI Bali ngaturang ayahan ring Pura Agung Besakih, nuju rahina Wraspati (2/4)
Institut Seni Indonesia Bali (ISI BALI) ngaturang ayahan ring Pura Agung Besakih sajeroning parikrama Upacara Karya Ida Bhatara Turun Kabeh, sané nuju rahina Purnama Kadasa, Wraspati (2/4).
Ayahan punika nyihnayang makudang-kudang sesolahan sakral Bali sané kamargiang antuk dresta sané khidmat olih para mahasisya, dosen, miwah tenaga kependidikan ISI BALI. Sasolahan sané katurang minakadi Rejang Dewa, Baris Gede, Topeng, Wayang Gedog, miwah Tabuh Gong Gede.
Parikrama puniki pinaka silih tunggil implementasi saking program Bali Citta Pradesa, pamekasnyané ring Aktualisasi Pembelajaran ring Ruang Sakral. Melarapan antuk program puniki, ISI BALI ngrauhang proses paplajahan sané nénten ja wantah ring jeroning kelas, nanging taler langsung ring madya kauripan spiritual miwah budaya krama Baliné.
Foto: ISI Bali ngaturang ayahan ring Pura Agung Besakih, nuju rahina Wraspati (2/4)
Sajeroning kawéntenan punika, ayahan ring Pura Agung Besakih dados genah majeng sivitas akademika ISI BALI sajeroning nresepang, ngrasayang, taler ngalaksanayang nilai-nilai kesenian sakral Bali manut ring kawigunan, etika, miwah linggihnyané. Antuk punika, para mahasisya nénten ja wantah mlajahin seni saking widang teknis kémanten, nanging taler nresepang widang religius miwah filosofis sané rumaket ring sabilang sasolahan.
Kawéntenan sivitas akademika ISI BALI ring upacara punika taler dados bukti nyata implementasi Tri Dharma Perguruan Tinggi, pamekasnyané ring widang pengabdian masyarakat, saha pinaka pabuat kampuné sajeroning nyaga miwah nglestariang seni budaya Bali sané adi luhung. (ISIBALI/Humas).
