Foto: Pemargin sumpah miwah pelantikan Koordinator Prodi Desain Produk sareng 16 Pegawai Negeri Sipil (PNS) ring wewidangan ISI BALI, rahina Soma (29/6) ring Studio Media Rekam ISI BALI.
Institut Seni Indonesia Bali (ISI BALI) malih ngukuhang tata kelola kelembagaan palarapan antuk pemargin sumpah miwah pelantikan Koordinator Program Studi (Prodi) Desain Produk serajeng 16 Pegawai Negeri Sipil (PNS) ring wewidangan ISI BALI. Pelantikan punika kapucukin langsung olih Rektor ISI BALI, Prof. Dr. I Wayan Adnyana, S.Sn., M.Sn., ring rahina Soma (29/6) ring Studio Media Rekam ISI BALI.
Sajeroning pelantikan punika, Dr. I Kadek Dwi Noorwatha, S.Sn., M.Ds., resmi kalantik pinaka Koordinator Program Studi Desain Produk. Dane ngentosin Wahyu Indira, S.Sn., M.Sn., sane sadurungne ngamong jabatan pinaka Koordinator Prodi Desain Produk tur sampun mantuka utawi berpulang ring rahina Anggara (2/6) sangkaning sungsut (sakit).
Nenten ja wantah ngalantik Koordinator Prodi Desain Produk kemanten, Rektor ISI BALI taler ngamargiang sumpah miwah pelantikan majeng 16 Pegawai Negeri Sipil ring wewidangan ISI BALI. Saking akeh punika, 12 diri pinaka dosen miwah pat (4) diri pinaka tenaga kependidikan sane jagi ngukuhang pemargin tridarma perguruan tinggi serajeng pelayanan administrasi ring wewidangan kampus.
Foto: Pemargin sumpah miwah pelantikan Koordinator Prodi Desain Produk serajeng 16 Pegawai Negeri Sipil (PNS) ring wewidangan ISI BALI, rahina Soma (29/6) ring Studio Media Rekam ISI BALI.
Sajeroning panyanggra (sambutan) dane, Rektor ISI BALI maosang mungguing pelantikan puniki pinaka amanah sapisanan marupa rasa prcaya sane patut kamargiang antuk sekancan integritas, profesionalisme, miwah rasa tanggung jawab. Manut dane, saben jabatan miwah status pinaka aparatur sipil negara makta konsekuensi jagi ngicen kontribusi pinih becik majeng ring kemajuan institusi.
Majeng ring Koordinator Program Studi Desain Produk sane anyar, Rektor mapangapti mangda kepemimpinan sane kamargiang prasida ngelanturang makudang-kudang program panglimbak akademik sane sampun kakawitin sadurungne, sapisanan ngawetuang inovasi jagi nincapang kawentenan (kualitas) pendidikan, paniletan (penelitian), miwah pengabdian majeng krama.
Sajeroning punika, majeng para PNS sane wau kalantik, Rektor mapesen mangda setata nyunjung tegeh nilai-nilai ASN, nyaga etika profesi, serajeng mekarya sareng-sareng (kolaboratif) sajeroning nukung visi ISI BALI dados perguruan tinggi seni sane mautama, unggul, miwah madue reputasi global.
Dudonon acara pelantikan punika memargi khidmat pisan tur kasaksiang olih makasami pejabat struktural ring wewidangan ISI BALI. Momentum puniki dados pahan saking mautsaha ngukuhang sumber daya manusia sapisanan nyanthang kelanturan tata kelola organisasi sajeroning nukung pemargin tridarma perguruan tinggi pinih optimal. (ISIBALI/Humas)
Ngawentenang pakilitan (kolaborasi) jagi ngamargiang Pendidikan Seni Kriya Internasional
Foto: Rektor ISI BALI Prof. Dr. I Wayan ‘Kun’ Adnyana (ping kalih saking kiwa) kasarengin olih Dekan FSRD ISI BALI Drs. I Nengah Sudika Negara, M.Erg ngeritayang (nandatanganin) MoU sareng Chairman Hasami Tohjiki Industrial Association Kazuhiko Ota (ping kalih saking kiwa), miwah CEO BESTie Co., Ltd., Matsumoto Yuki (kiwa).
Institut Seni Indonesia Bali (ISI BALI) mautsaha sayan ngalimbangang pakilitan (jejaring) internasional sajeroning nincapang kawentenan (kualitas) pendidikan miwah kawagedan para alumni (daya saing lulusan). Komitmen punika kamargiang sangkaning kawentenan ngeritayang (penandatanganan) Nota Kesepahaman (MoU) sareng Hasami Tohjiki Industrial Association miwah BESTie Co., Ltd., Jepang, ring rahina Anggara (23/6) ring Kota Hasami, Prefektur Nagasaki, Jepang.
Nota Kesepahaman punika kairit (katandatanganin) olih Rektor ISI BALI Prof. Dr. I Wayan ‘Kun’ Adnyana, sareng Chairman Hasami Tohjiki Industrial Association Kazuhiko Ota, miwah CEO BESTie Co., Ltd., Matsumoto Yuki. Ring galah sané becik punika, taler kamargiang ngeritayang Perjanjian Kerja Sama (PKS) riantara Fakultas Seni Rupa dan Desain (FSRD) ISI BALI sareng makakalih mitra saking Jepang punika. PKS punika kairit (katandatanganin) olih Dekan FSRD ISI BALI Drs. I Nengah Sudika Negara, M.Erg.
Foto: Dudonan Acara Ngeritayang (Penandatanganan) MoU riantara ISI BALI sareng Hasami Tohjiki Industrial Assocition miwah BESTie Co., Ltd., Jepang, ring rahina Anggara (23/6) ring Kota Hasami, Prefektur Nagasaki, Jepang.
Dudonon acara ngeritayang punika memargi becik pisan tur kasarengin antuk rasa sutrepti miwah anget. Kakantenang kirang langkung 40 uleman (undangan) saking pahan industri keramik, lembaga paniletan (penelitian) keramik, anggotan parlemen, miwah pamrentah Kota Hasami taler Prefektur Nagasaki, rumasuk Wakil Wali Kota Hasami, Murayama Hiroshi. Sadurung dudonon acara ngeritayang punika, kasolahang gending kabangsaan Indonesia Raya miwah gending kabangsaan Jepang, Kimigayo.
Palarapan kerja sama puniki dados pemargi sane utama sajeroning nuntun kawentenan pendidikan seni keramik sane ngranjing ring undagan (level) internasional liwat panyanggra (sinergi) riantara perguruan tinggi sareng industri keramik Jepang sane sampun kasub ring jagate.
Pakilitan (kolaborasi) punika pinaka pemargi kaping kalih saking pemargin Wali Kota Hasami, Yoshinori Maekawa, sareng Pamucuk (Ketua) Hasami Tohjiki Industrial Association, Kazuhiko Ota, ring Kampus ISI BALI ring tanggal 18 Februari 2026. Ring pemargi punika, makakalih pihak mapiguman ngenenin indik kerja sama sane raris kelanturang antuk uleman resmi majeng ring Rektor ISI BALI miwah Dekan FSRD jagi ngrauhin acara ngeritayang kesepakatan ring Jepang.
Foto:Keramik pikaryan saking Kota Hasami, Prefektur Nagasaki, Jepang.
Hasami kasub pinaka silih tunggil pusat industri keramik sane pinih utama ring Jepang sane sampun ngamedalang pikaryan marupa keramik pinih becik saking panyatusan warsa. Palarapan kerja sama puniki, Kota Hasami mautsaha ngawangun proyek kolaboratif sane dados kreteg riantara jadma, pendidikan, miwah teknologi ring Indonesia lan Jepang, sapisanan ngukuhang pakilitan riantara dunia akademik sareng industri kreatif.
Rektor ISI BALI, Prof. Dr. I Wayan Adnyana, S.Sn., M.Sn., nyubagia pisan antuk kawentenan kerja sama punika. Manut dane, kolaborasi puniki dados galah sane mabuat pisan majeng ring panglimbak pendidikan seni kriya ring ISI BALI sapisanan ngwelasang galah majeng para mahasiswa ngenenin indik pengalaman mlajah miwah magang ring industri internasional.
“Program Studi Kriya, Desain Produk, miwah Seni Murni ring ISI BALI madue kawentenan (kualitas) sane becik pisan sajeroning ngamedalang kakawian (karya) keramik sane anyar (inovatif). Para mahasiswa nenten ja ngamedalang kakawian keramik murni kemanten, nanging taler makasami piranti keramik sane maguna (fungsional) sane sayaga kaadol. Sangkaning punika, kerja sama sareng industri keramik Jepang puniki jagi ngukuhang kawagedan (kompetensi) mahasiswa sapisanan ngerauhang ipun nyisipang raga ring dunia kerja global,” sapunika baos dane.
Saking pihak Hasami maosang komitmenne jagi nukung panglimbak sumber daya manusia liwat pendidikan miwah pelatihan madasar industri. Nenten ja ngicen galah majeng mahasiswa ISI BALI mlajahin industri keramik tradisional Jepang tusing malih liwat perantara, kerja sama puniki taler ngwelasang galah karier majeng para alumni sane madue kawagedan ring widang keramik jagi mekarya ring Hasami, Jepang.
Palarapan Nota Kesepahaman miwah Perjanjian Kerja Sama punika, makakalih pihak cumpu (sepakat) ngalimbangang makasami program, ngawit saking ngamargiang pendidikan, ngawangun kurikulum internasional, ngamargiang Kuliah Kerja Praktik (magang), genah mekarya majeng mahasiswa lan alumni, nyiagayang sarana pendidikan, miwah widang lianan sane kacumpuin sareng-sareng.
Silih tunggil program utama sane jagi gelis kamargiang inggih punika nyusun tur ngalaksanayang kurikulum standar Jepang sajeroning ngamargiang pendidikan seni kriya internasional ring ISI BALI. Kurikulum punika jagi kasusun sareng mitra industri ring Jepang mangda manut ring kaperluan dunia kerja miwah panglimbak industri keramik internasional.
Taler, para mahasiswa jagi polih galah nyarengin program Kuliah Kerja Praktik (magang) ring perusahaan miwah industri keramik ring Hasami antuk dukungan penuh saking pihak Jepang. Program puniki kabuatang majeng mahasiswa semester VII Program Studi Seni Murni, Seni Kriya, miwah Desain Produk, tur keni rincikan jagi kakawitin ring sasih September 2026. Liwat pangresep sane katampi langsung ring pusat industri keramik Jepang, para mahasiswa kaaptiang nenten ja waget ring teknik produksi miwah inovasi material kemanten, nanging taler resep ring budaya mekarya, manajemen industri, nyantep ring standar kualitas internasional. Pengalaman punika kaaptiang dados bekel mabuat majeng para alumni ISI BALI jagi masaing ring undagan global. (ISIBALI/Humas)
Foto:Seminar Sinarengan ISI BALI sareng AIIT Jepang, Anggara (23/6) ring Ruang Kuliah Umum, Desain Hub ISI BALI.
Institut Seni Indonesia Bali (ISI BALI) magotong-royong sareng Advanced Institute of Industrial Technology (AIIT), Jepang, ngamargiang seminar sinarengan sané mamurda “Religion in Art” (With Particular Focus on Balinese Hinduism and Culture) ring dina Anggara (23/6) magenah ring Ruang Kuliah Umum, Desain Hub ISI BALI. Parikrama puniki pinaka pahan saking program Bali-Bhuwana Kanti (Global-Culture and Arts Project Networking) sajeroning rerangkén Bali Padma Bhuwana VI warsa 2026.
Seminar puniki ngarauhangan tigang diri narasumber saking Indonesia sareng Jepang sané mabaosang indik kaitan agama, seni, sareng budaya sajeroning kauripan krama Bali. Dane sareng tiga inggih punika Secretary General of Asia Professional Education Network (APEN) Prof. Mitsuhiro Maeda, Executive Director of Global Association of Civilizational Diversity Mr. Masashi Nakagawa, saréng Dekan Fakultas Seni Pertunjukan ISI BALI Prof. Dr. Gede Yudarta.
Sajeroning panyledihnyané, Prof. Mitsuhiro Maeda ngunggahang topik “Balinese Community Rituals/Festivals as a New Civilization: Towards Brain Functional Civilizational Analysis”. Dané nlatarang yéning ritual miwah festival krama Bali boya ja madué nilai spiritual miwah budaya kémanten, nanging taler dados kauratiang pinaka pahan saking peradaban sané ngawangun pola pikir, solah sosial, saking hubungan sané harmonis pantaraning manusa, palemahan, miwah nilai-nilai keagamaan.
Foto:Seminar Sinarengan ISI BALI sareng AIIT Jepang, Anggara (23/6) ring Ruang Kuliah Umum, Desain Hub ISI BALI.
Siosan ring punika, Mr. Masashi Nakagawa ngamargiang materi “From Artwork to Resonance: Art as a Living Connection in Balinese Society”. Dané nlecekang mungguing karya seni ring Bali boya ja dados objek estetis kémanten, nanging dados media sané nyambungang krama sareng tradisi, palemahan sosial, miwah nilai-nilai spiritual sané urip sajeroning kauripan sarahina.
Ring galah sané pateh, Prof. Dr. Gede Yudarta nyledihin kajian sané mamurda “Religiusitas dan Eksistensi Gamelan Gong Beruk dalam Ritual Ngusaba Desa di Pura Pemaksan Bangle, Karangasem, Bali”. Dané nlatarang yéning Gamelan Gong Beruk punika tetamian budaya sané madué fungsi mautama sajeroning ngamargiang ritual keagamaan krama irika. Kawéntenannyané boya ja pinaka sarana balih-balihan seni kémanten, nanging taler dados pahan integral saking parilaksana spiritual miwah identitas budaya krama Bali.
Foto:Seminar Sinarengan ISI BALI sareng AIIT Jepang, Anggara (23/6) ring Ruang Kuliah Umum, Desain Hub ISI BALI.
Seminar puniki mamargi antar tur kabaosang interaktif, kasarengin antuk makudang-kudang mahasiswa saking makidang program studi ring lingkungan ISI BALI. Angga pamilet nyihnayang rasa meled uning sané tegeh pinih tulus saking makudang pitakén miwah pabligbagan sané mabaosang indik utsaha miara, ngalestariang, saking ngalimbahang seni miwah budaya Bali ring tengahing arus globalisasi. (ISIBALI/Humas)
Foto: Penandatanganan MoU pantaraning ISI BALI lan Studio Arsitektur Rumah Intaran, Soma (22/6) ring Ruang Nata Widya Sabha, ISI BALI.
Institut Seni Indonesia Bali (ISI BALI) resmi ngawitang kerja sama sareng Studio Arsitektur Rumah Intaran melarapan antuk penandatanganan Nota Kesepahaman (MoU) ring Ruang Nata Widya Sabha ISI BALI, Soma (22/6/2026).
Penandatanganan MoU puniki kamargiang olih Wakil Rektor Bidang Kemahasiswaan lan Kerja Sama ISI BALI, Prof. Dr. Komang Sudirga, S.Sn., M.Hum., sareng Pamraksa (Pendiri) Studio Arsitektur Rumah Intaran, Gede Kresna Nata Dwijaksana. Kerja sama puniki dados pemargi sane strategis sajeroning ngatinanin kolaborasi pantaraning institusi pendidikan tinggi seni sareng ruang kreatif sane kapiarsayang ngelimbahang praktik seni, budaya, lan arsitektur ring Bali.
Wakil Rektor Bidang Kemahasiswaan lan Kerja Sama ISI BALI, Prof. Dr. Komang Sudirga, nyanggra becik pisan sangkaning wéntené kerja sama puniki. Manut dane, sinergi pantaraning perguruan tinggi lan para pelaku industri kreatif wiadin ruang budaya puniki mabuat pisan sajeroning ngwimbahang pangalaman melajah para mahasiswa, sepisanan ngatinanin pemargin Tri Dharma Perguruan Tinggi.
“ISI BALI terus mautsaha ngewangun jejaring kerja sama sareng makudang-kudang pihak sane maduwe visi sane pateh sajeroning ngelimbahang seni, budaya, lan kreativitas. Rumah Intaran pinaka genah sane sampun kasub aktif ngamargiang makudang parikrama seni lan budaya. Tiang ngaptiang mangda kerja sama puniki prasida ngentasin malih akeh galah majeng mahasiswa, dosen, wiadin seniman anggen makolaborasi, makarya, lan ngawetuang inovasi sinarengan,” punika baosne.
Foto: Penandatanganan MoU pantaraning ISI BALI lan Studio Arsitektur Rumah Intaran, Soma (22/6) ring Ruang Nata Widya Sabha, ISI BALI.
Dane ngawewehin, kerja sama punika kaaptiang nenten ja mandeg ring parindikan formalitas kemanten, nanging prasida kamargiang melarapan antuk makudang program konkret sekadi pameran, sasolahan, mabligbagan (diskusi), riset, pengabdian majeng masyarakat, nyantos pangembangan program magang lan mlajah melarapan antuk praktik.
Sauntalan punika, Pamraksa Studio Arsitektur Rumah Intaran, Gede Kresna Nata Dwijaksana, maosang mungguing pasubayan pantaraning Rumah Intaran sareng sivitas akademika ISI BALI sujatine sampun mamargi saking riyin. Makudang-kudang parikrama seni lan budaya sane ngrapatang dosen, mahasiswa, alumni, wiadin seniman sane mapaiketan sareng ISI BALI sampun silih tunggil mamargi ring Rumah Intaran, yadiastun salami puniki kantos nenten formal.
“Rumah Intaran sampun suwe dados genah matemu majeng akeh seniman, rumasuk sivitas akademika ISI BALI. Makudang pameran seni rupa, sasolahan, diskusi, nyantos parikrama kreatif liyanan sampun kamargiang ring genah titiange. Sangkaning punika, penandatanganan MoU puniki dados galah sane mabuat pisan anggen ngatinanin paiketan sane salami puniki sampun mamargi secara alami, lan ngawinang paiketan puniki sayan tereh tur berkelanjutan,” punika telatarane.
Manut dane, kolaborasi sareng ISI BALI pacang ngicen pikenoh majeng makakalih pihak sajeroning ngwentenang ekosistem kreatif sane sayan dinamis tur nukung pangembangan seni lan budaya Bali ring tengahing panyungkan jaman puniki.
Melarapan antuk kerja sama puniki, ISI BALI lan Rumah Intaran maduwe komitmen sajeroning ngelimbahang makudang program kolaboratif sane prasida ngicen kontribusi nyata majeng pendidikan, penelitian, pengabdian majeng masyarakat, sepisanan ngatinanin ekosistem seni lan budaya ring Bali.
Pinaka informasi, Rumah Intaran inggih punika studio arsitektur berbasis riset lan ruang kreatif sarta genah mlajah lintas disiplin berbasis masyarakat sane dados wadah kolaborasi ring widang seni, budaya, desain, lingkungan, pemberdayaan masyarakat, lan pangembangan ekonomi kreatif ring Bali Utara.
Foto:Booth pameran ISI BALI ring sajeroning Badung Education Fair (BEF) 2026 ring Balai Budaya Giri Nata Mandala, Panyutrian (10/6).
Institut Seni Indonesia Bali (ISI BALI) nyarengin pamargi Badung Education Fair (BEF) 2026 sané kalaksanayang olih Pemerintah Kabupaten Badung ring Balai Budaya Giri Nata Mandala, Pusat Pemerintahan (Puspem) Badung, saking tanggal 9 nyantos 11 Juni 2026. Parikrama sané ngunggahang unteng “Pendidikan Berkelanjutan untuk Semua” puniki dados genah promosi pendidikan sepisanan dados genah para sisiané uning ring makasami pilihan paguruan tegeh miwah program beasiswa.
BEF 2026 mawali kamargiang pinaka pameran pendidikan nyabran warsa sané matetujon ngwantu para jana sané puput masekolah ring Sekolah Menengah Atas (SMA) miwah sané pateh ring nyané, sajeroning nureksain program studi sané jagi kambil, sepisanan ngmolihang gatra ngenenin tentang program wantuan pendidikan miwah beasiswa sané kasedayang olih Pemerintah Kabupaten Badung. Malarapan antuk sosialisasi sané jimbar, pemerintah daerah mautsaha mangda makasami gatra ngenenin indik margi ngranjing ring pendidikan puniki prasida katampi langsung miwah kresepang olih para jana sané jagi ngmolihang pikenohnyané.
Siosan dados genah gatra pendidikan, BEF 2026 taler kakaryanin pinaka genah ngajiang (apresiasi) para sisia ring Kabupaten Badung. Makasami prestasi akademik miwah non-akademik saking undagan lokal nyantos nasional kasinggihan ring arepan krama makasami. Parikrama puniki sayan rami antuk karauhan sawatara 20 paguruan tegeh sané ngaryanang stan pameran jagi nyanjanang program studi unggulan soang-soang.
Foto:Booth pameran ISI BALI ring sajeroning Badung Education Fair (BEF) 2026 ring Balai Budaya Giri Nata Mandala, Panyutrian (10/6).
Ring galah punika, ISI BALI nyanjanang makudang-kudang kakaryan kreatif mahasisia miwah dosen sané ngunggahang konsep seni berkelanjutan miwah ramah lingkungan. Para tamiu sané rauh prasida ngantenang makudang-kudang produk miwah kakaryan inovatif, ngawit saking eco fashion, eco craft, wayang kulit, keramik, nyantos makudang-kudang hasil kreativitas siosan sané nunggalang unsur seni, budaya, miwah keberlanjutan.
Kaperbawaan ISI BALI nyarengin BEF 2026 puniki dados galah sané mabuat pisan sajeroning ngenalang makudang program studi miwah pikolihan akademik sarat kreativitas sivitas akademika ring krama sami, pamekasnyané ring para yowana sané sedek nyiagang raga jagi nglanturang kaurayan ngranjing ring paguruan tegeh.
Malarapan antuk stan pameran sané interaktif, ISI BALI taler ngwéhin gatra ngenenin indik margi ngranjing dados mahasisia anyar, prospek pakaryan ri kala sampun puput masekolah, miwah makudang-kudang galah sajeroning nglimbakang bakat miwah kreativitas sané prasida kamolihang salami nuntut kaweruhan ring kampus seni negeri ring Bali punika.
(ISIBALI/Humas)
Foto:Booth pameran ISI BALI ring sajeroning Badung Education Fair (BEF) 2026 ring Balai Budaya Giri Nata Mandala, Panyutrian (10/6).
Foto:Rektor ISI BALI Prof. Dr. Wayan ‘Kun’ Adnyana kasarengin Wakil Menteri Diktisaintek Prof. Stella Christie ring ArtMoments Jakarta.
Kasarengan Institut Seni Indonesia Bali (ISI BALI) ring pameran seni rupa kontemporer lan modern internasional ArtMoments Jakarta 2026 ngamolangang urati sane jimbar saking makudang-kudang sarwa. Antuk booth Nata-Citta Art Space (N-CAS) sane ngusung murda RAYA-CITTA-RUPA (Cahya Imaji Cipta), pakaryan para dosen lan mahasiswa ISI BALI karauhin olih makudang-kudang uleman negara, kolektor, jurnalis, nyantos tokoh seni nasional salami pameran punika kamargiang ring Agora Ballroom Jakarta, 4–7 Juni 2026.
Sinalih tunggil karauhan sane mabuat pinih utama inggih punika saking Wakil Menteri Pendidikan Tinggi, Sains, lan Teknologi, Prof. Stella Christie. Ring karauhan dane, Wamen Stella ngapresiasi pisan kasarengan ISI BALI sane nyihnayang makudang-kudang pakaryan seni rupa kontemporer Bali ring parikrama internasional punika. Tiosan ring Stella Christie, booth N-CAS ugi karauhin olih Menteri Perindustrian Agus Gumiwang Kartasasmita sapunika ugi Wakil Menteri Kebudayaan Giring Ganesha.
Foto:Rektor ISI BALI Prof. Dr. Wayan ‘Kun’ Adnyana kasarengin Wakil Menteri Kebudayaan Giring Ganesha ring ArtMoments Jakarta.
Nenten ja wantah ngamolangang urati saking sang sane ngamong jagat (pemerintahan), booth ISI BALI ugi dados silih tunggil genah kacunduk makudang-kudang tokoh seni lan media. Makudang-kudang parab sane macatet rauh manggihin pameran minakadi jurnalis Kompas Hilmi Faiq, pangawit Nawa Tunggal, Pemimpin Majalah Prestige Ronald Liem, pangawi lan kritikus seni Agus Dermawan T., sapunika ugi Bambang Bujono. Saking para kolektor, rauh Tossin Himawan, Wiyu Wahono, lan Sendy Widjaya. Sapunika ugi figur publik minakadi Anjasmara lan Chef Juna Rorimpandey kacingak rauh ring booth ISI BALI.
Rektor ISI BALI, Prof. Dr. Wayan ‘Kun’ Adnyana nguningayang, ring ArtMoments Jakarta warsa puniki, Nata-Citta Art Space (N-CAS) nyihnayang pakaryan seni lukis, fotografi, patung, kriya keramik, sapunika ugi desain wastra sane dados papinget panglimbak pinih anyar saking seni rupa kontemporer Bali.
Foto:Booth Nata-Citta Art Space ISI BALI ring ArtMoments Jakarta.
Pameran puniki kakuratori olih Prof. Dr. AA Rai Remawa, Warih Wisatsana, lan Alaida Niwaya. Makehan 16 perupa saking makudang undagan generasi sareng ring pameran sinarengan puniki, sane kawangun antuk 13 dosen lan tigang mahasiswa pinih kapilih saking ISI BALI. Dane inggih punika I Wayan “Kun” Adnyana, I Ketut Muka Pendet, I Nengah Wira Kesuma, Wayan Sujana Suklu, I Made Jodog, I Made Suparta, Ida Ayu Gede Artayani, Tjok Istri Ratna C.S., Ida Bagus Candra Yana, Ni Made Tiartini Mudarahayu, I Made Hendra Mahajaya P., I Gede Jaya Putra, I Wayan Adi Sucipta, I Gede Ari Widia Utama Pucangan, Tebuana Istri Mahisarani, lan Desak Putu Agnis.
Prof. Kun Adnyana ngwewehin, pakaryan-pakaryan sane kasihnayang punika embas saking pamargin kreatif sane panjang, nunggalang pangalaman anggon, riset artistik, panyingakan empiris, lan pangwacen malih majeng ring makudang-kudang tatinggalan budaya sane idup ring Bali. “Makudang sarwa medium lan pamargin artistik sane kasihnayang puniki nyihnayang sapunapi seni rupa kontemporer Bali setata nglimbak nenten ngutang akah budaya sane dados dasar ipun,” baos Guru Besar Bidang Sejarah Seni puniki. Kasarengan ISI BALI ring ArtMoments Jakarta 2026 puniki dados genah strategis anggen nyihnayang pikolihan kreatif sivitas akademika majeng ring krama nasional miwah internasional. Karauhan makudang-kudang uleman, kolektor, sang sane ngamargiang industri kreatif, lan tokoh seni ring booth N-CAS puniki nyihnayang tegehnyane urati krama majeng ring panglimbak seni rupa kontemporer sane embas saking palemahan akademik ISI BALI.(ISIBALI/Humas)
