Foto:Pamungkah Peksimida Bali Warsa 2026, Auditorium Kirtya Sabha Mahottama, ISI BALI, Saniscara (6/6).
12 mahasiswa Institut Seni Indonesia Bali (ISI BALI) prasida ngamolangang tiket nuju Pekan Kesenian Mahasiswa Nasional (Peksiminas) 2026 risampunne molihang juara kapertama ring Pekan Kesenian Mahasiswa Daerah (Peksimida) Bali Warsa 2026. Parikrama punika kalaksanayang ring Kampus ISI BALI ring rahina Saniscara (6/6).
Kamungguhan puniki pinaka bukti prestasi mahasiswa ISI BALI ring makudang-kudang widang seni sane katandingang. Makehan 12 mahasiswa sane ngranjing ring nem pahan lomba prasida molihang juara kapertama tur jagi ngwakilin Provinsi Bali ring undagan nasional.
Foto:Pamargin pahan lomba komik strip ring Peksimida 2026, Saniscara (6/6) ring Gedung Desain Hub ISI BALI.
Sapunika ugi mahasiswa sane prasida molihang juara kapertama inggih punika Zahid Zahendra saking Program Studi Pendidikan Seni Pertunjukan ring pahan lomba Menyanyi Dangdut, Sri Agung Wulandewi Putri Laksana saking Program Studi Musik ring pahan lomba Menyanyi Keroncong Putri, lan I Kadek Ariandi Triana Putra Widi Nugraha saking Program Studi Desain Komunikasi Visual ring pahan lomba Baca Puisi.
Ring pahan lomba Tari, tim ISI BALI sane kawangun antuk Ida Ayu Adi Tri Wiranti, Ni Kadek Dhya Sumitha Apsari, Ni Nengah Diah Tantri, Made Githa Sanjiwani, I Made Wahyu Danutirtha, I Putu Gede Pradipta Utama, lan G. Ngr. Bagus Andika Prasetya prasida molihang juara kapertama. Tiosan ring punika, Ni Luh Made Bindi Hita saking Program Studi Animasi dados juara kapertama ring pahan lomba Komik Strip, miwah Insan Kamis saking Program Studi Fotografi molihang juara kapertama ring pahan lomba Fotografi Jurnalistik Dokumenter.
Wakil Rektor Bidang Kemahasiswaan lan Kerja Sama ISI BALI nguningayang rasa kalulutan lan apresiasi majeng ring laksana para mahasiswa sane sampun ngenyahang dedikasi, kreativitas, miwah kabisan pinih becik ring parikrama punika.
“Prestasi puniki laksana saking pakaryan abot para mahasiswa, dosen pembimbing, sapunika ugi saking sokongan makasami sivitas akademika ISI BALI. Tiyang rumasa bangga santukan mahasiswa prasida ngenyahang kualitas lan nenten kalah saing ring undagan daerah. Dumogi para jayanti (pemenang) prasida nyiagayang raga antuk becik tur prasida ngawetuang kapiandalan aran Bali lan ISI BALI ring undagan nasional,” lentrehnyane.
Foto:Pamargin pahan lomba lukis ring Peksimida 2026, Saniscara (6/6) ring Studio Seni Murni ISI BALI.
Tiosan ring molihang nem gelar juara kapertama, kontingen ISI BALI ugi ngawetuang makudang prestasi ring pahan lomba sane lianan. ISI BALI prasida molihang juara kadua ring pahan lomba Vokal Grup, Menyanyi Seriosa Putri, Menyanyi Pop Putra, Baca Puisi Putri, lan Lukis.
Sapunika ugi, juara katatlu kapolihang ring pahan lomba Desain Poster. Ring kategori penghargaan harapan, mahasiswa ISI BALI molihang Harapan II ring pahan lomba Monolog lan Menulis Puisi.
Pikolihan prestasi punika sayan neganang linggih ISI BALI pinaka paguruan tegeh seni sane setata mapikenoh ngembangang talenta-talenta sane utama ring widang seni lan budaya. Kasarengan mahasiswa ring Peksimida puniki nenten ja wantah genah matanding, nanging ugi pinaka sarana nglimbakang kreativitas, apresiasi seni, sapunika ugi anggen ngukuhang karakter para yowana sane mabuat ring budaya lan madue prestasi.(ISIBALI/Humas)
Foto: Pamargan UTBK-SNBT Warsa 2026 ring ISI BALI ring sasih April sane lintang.
Institut Seni Indonesia Bali (ISI BALI) nampi 529 calon mahasisya anyar malarapan jalur Ujian Tulis Berbasis Komputer (UTBK) Seleksi Nasional Berdasarkan Tes (SNBT) Warsa 2026. Pikolihan punika kawedarang silih tunggil utawi sinarengan ring rahina Soma (25/5) sore.
Wakil Rektor Bidang Akademik miwah Sistem Informasi ISI BALI, Prof. Dr. AA Gde Bagus Udayana maosang, ring jalur SNBT warsa puniki, sami sane ngranjingang dewek ring ISI BALI ngrarisang 938 pamilet sane ngrebutang genah malajah ring 19 program studi (prodi) sarjana miwah sarjana terapan. Saking akeh pamilet sane kapisaratang lulus, akehnyane 113 calon mahasisya anyar pinaka sang sane nampi wantuan pendidikan Kartu Indonesia Pintar Kuliah (KIP-K).
“Madasaran antuk data iraga, 21 persen saking mahasisya sane lolos SNBT ISI BALI Warsa 2026 pinaka sang sane nampi beasiswa KIP-K. Indik puniki nyihnayang komitmen ISI BALI sajeroning ngungkab akses pendidikan tegeh seni majeng ring krama saking makudang-kudang kawentenan ekonomi,” baos Prof. Udayana.
Prof. Udayana nlatarang, madasaran antuk undag ketatne masiat, Prodi Bisnis Digital dados silih tunggil program studi sane madue persaingan pinih tegeh. Saking sami 118 pamiat, wantah 34 pamilet sane katampi antuk persentase keketatan 28,81 persen.
Sauntara punika, kalih program studi pinih anyar ISI BALI taler polih urati sane becik saking para pendaftar. Program Studi Bahasa dan Kebudayaan Inggris nyatet 36 pamiat antuk 24 pamilet sane katampi. Angganing punika, Program Studi Pendidikan Vokasional Tata Rias nampi 10 pamilet saking sami 16 pendaftar. Tegehne pamiat ring program studi anyar punika nyihnayang sayan jimbarnyané kayun krama ngeninin indik pangembangan widang seni, budaya, miwah industri kreatif ring ISI BALI.
“Program Studi Desain Komunikasi Visual (DKV) kantun dados program studi sane madue pamiat pinih tegeh ring jalur SNBT warsa puniki. Akehnyane 190 pamilet ngranjingang dewek ring program studi punika miwah 106 pamilet kapisaratang lolos seleksi. Genah salanturnyane kagenahin antuk Program Studi Desain Mode antuk akeh pamiat 136 miwah 51 pamilet katampi,” jlentreh professor widang desain komunikasi visual puniki.
Pamilet sane kapisaratang lolos SNBT kapatutang nglaksanayang pangisian data Uang Kuliah Tunggal (UKT) ngawit 26 Mei 2026 nyantos 2 Juni 2026. Panetapan UKT kajadwalang ring tanggal 3 Juni 2026.
Prof. Udayana ngabingahang pamilet sane nenten nglaksanayang daftar ulang manut jadwal jagi kabaosang ngutang dewek saking jalur SNBT. Majeng ring pamilet sane durung mrasidayang lolos, ISI BALI kantun nyediayang 250 genah malarapan jalur mandiri.
“Selamat majeng ring pamilet sane lolos SNBT ISI BALI. Majeng ring pamilet sane durung mrasidayang, tetep semangat miwah sampunang rered Kayun. Kantun wenten galah malarapan jalur mandiri jagi ngrebut genah ring kampus seni miwah desain bangga Bali puniki,” baosang dane. (ISIBALI/Humas)
Foto: Duta ISI BALI Sareng Sekaa Seni Indonesia ring The Pasar Indonesia ring Rijswijk, Belanda, Nemas (15/5).
Institut Seni Indonesia Bali (ISI BALI) mawali ngukuhang diplomasi budaya Indonesia ring jagate sami malarapan antuk ngamiletin parikrama The Pasar Indonesia sané kamargiang ring De Broodfabriek: Expo and Event Center, Rijswijk, Belanda, saking tanggal 13 nyantos 18 Mei 2026. Peniletan duta ISI BALI ring parikrama punika dados pahan saking utsaha sané mapidabdab anggén ngenalang seni, desain, miwah budaya Bali ring krama jagate.
Parikrama punika karauhin antuk makudang-kudang angga miwah uleman sané singgih, minakadi Duta Besar Luar Biasa dan Berkuasa Penuh Republik Indonesia antuk Kerajaan Belanda, Laurentius Amrih Jinankung, miwah Director De Broodfabriek, Jeldert de Boer. Sajaba punika, taler karauhin antuk para duta, sekaa seni sané jagi masolah, miwah para uleman serati tamiu The Pasar Indonesia saking makudang-kudang paporongan krama.
Foto: Mahasiswa ISI BALI, Komang Prayoga Putra (paling tengen) ngicen workshop Tari Topeng ring The Pasar Indonesia ring Rijswijk, Belanda, Sukra (15/5).
Sajeroning panyanggran dane, Rektor ISI BALI, Prof. Dr. I Wayan Adnyana nyinahang rasa angayubagia tur apresiasi ring angga sang sané ngaryanin parikrama antuk uleman sané kasediang ring ISI BALI mangda prasida nyarengin parikrama internasional punika. Anggané nlesihang mungguing peniletan ISI BALI puniki pinaka pahan saking misi diplomasi seni, desain, miwah budaya sané sampun kamargiang antuk nungkulang (konsisten) saking warsa 2022. Misi puniki kadasarin antuk Visi Meraya Citta Samasta tur nglimbakang ISI BALI pinaka Hub Global Pusat Kreativitas dan Inovasi Seni (Global-Bali Arts Creativity Center Hub).
“Peniletan ISI BALI sajeroning The Pasar Indonesia puniki pinaka pahan saking misi diplomasi seni, desain, miwah budaya sané kamargiang antuk nungkulang tur mawit ulan-ulanan (regeneratif) saking warsa 2022.” baos Prof. Kun Adnyana.
ISI BALI ngutus tigang diri duta mahasiswa, inggih punika Komang Prayoga Putra saking Program Magister Penciptaan dan Pengkajian Seni, Dewa Ayu Made Adinda Ratna Devi saking Program Studi Tari, miwah Ni Komang Trisna Devi saking Program Studi Desain Mode. Duta ISI BALI nyolahang sasolahan klasik Bali minakadi Tari Topeng Manca miwah Tari Kekebyaran, taler sasolahan kontemporer “Deeng Nusantara”, sinambi ngamargiang workshop seni tari Bali pinih ajeng para tamiu sané rauh.
Foto: Rektor ISI BALI Prof. Dr. Wayan ‘Kun’ Adnyana (kiwa) sareng Duta Besar Luar Biasa dan Berkuasa Penuh Republik Indonesia antuk Kerajaan Belanda L. Amrih Jinangkung ring The Pasar Indonesia ring Rijswijk, Belanda, Sukra (15/5).
Parikrama puniki taler dados pahan saking kalanturan program internasional Bali Nata Bhuwana miwah Bali Citta Bhuwana sané kalimbakang antuk ISI BALI pinaka genah malajah miwah matatakeran (kolaborasi) ngasung bhuana (pengabdian masyarakat) kadasarin antuk budaya global. Malarapan program punika, ISI BALI sampun nyihnayang raga ring makudang-kudang negara, minakadi Malaysia, Prancis, Kazakhstan, Tiongkok, miwah Thailand.
Prof Kun Adnyana taler nlesihang kakuatan (komitmen) angga ngrereh sawitra (jejaring) internasional malarapan antuk makudang-kudang sarana (platform) akademik miwah kreatif. “Iriki titiang ngajuang raga majeng krama Belanda miwah Eropa sané mapisara jagi nyarengin makudang-kudang sarana internasional ISI BALI. Titiang mapangajap sayan akéh krama jagate sané rauh ka Bali tur uning ring ISI BALI sayan nampek,” baos professor sajeroning widang sejarah seni puniki.
Sajaba punika, ISI BALI taler ngenalang makudang-kudang program internasional minakadi B-IPADS (Bali-International Program for Arts and Design Studies), G-BACAM (Global-Bali Arts and Culture Advanced Management), miwah G-BAS (Global-Bali Arts Short Course) pinaka genah matatakeran global ring widang seni miwah budaya.
Rektor ISI BALI taler nureksain mungguing The Pasar Indonesia puniki madué kahyun sané manut ring utsaha ngupapira (pelestarian) tur ngukuhang elingan budaya (memori budaya) Indonesia ring dura negara, sinambi dados genah kacundukang budaya sané anget majeng krama diaspora miwah krama internasional.
Foto: Mahasiswa ISI BALI Makarya Paranti Pamungkah PKB XLVIII, Buda (13/5) ring Kampus ISI BALI
Institut Seni Indonesia Bali (ISI BALI) malih kapracayan dados pahan mabuat sajeroning pamungkah Pesta Kesenian Bali (PKB) XLVIII Warsa 2026 sané pacang resmi kabungkah ring pinanggal 13 Juni 2026 sané pacang rauh. Sakadi warsa-warsa sadurungnyané, ISI BALI pacang nyihnayang raga pinaka pamungkah sajeroning pahan Peed Aya PKB sané dados silih tunggil sasolahan utama tur pinih kaaptiang-aptiang olih krama sareng sami.
Sajeroning pamungkah PKB XLVIII, pahan pamargin parikrama pacang kakawitin antuk Peed Aya ring galah tengai, raris kalanturang antuk sasolahan sendratari ring galah wengi. Ring warsa puniki, ISI BALI pacang nyolahang sasolahan Peed Aya sané mamurda Mahamredangga Kalpa, sapunika sajeroning sasolahan sendratari ring galah wengi pacang ngungguhang satua Lubdaka.
Foto: Mahasiswa ISI BALI Makarya Paranti Pamungkah PKB XLVIII, Buda (13/5) ring Kampus ISI BALI.
Sajeroning galah puniki, ISI BALI sedek ngutsahayang tur ngangsehang pangrencana sami pahan sasolahan, ngawit saking pidarta artistik, koreografi, tata tetabuhan, kantos kasiapan para pamilet sané nyungkupan sasolahan punika. Kairingnyané sami sivitas akademika dados bukti komitmen ISI BALI sajeroning nitenin, nglimbakang, miwah nglimurang seni budaya Bali malarapan antuk genah-genah kreativitas sané agung sakadi PKB.
Kurang langkung 300 mahasiswa, dosen, miwah tenaga kependidikan pacang nyarengin langsung sajeroning pawai Peed Aya punika taler sasolahan sendratari. Paiketan agung puniki nénten ja wantah dados genah nunggalang seni, nanging taler dados genah mlajah, ngawitang karakter masesolahan, miwah nglaksanayang kawicaksanannyané gotong royong sajeroning kriya kreatif punika. (ISIBALI/Humas)
DENPASAR – Sajeroning nincapang kawikanan kreatif mahasiswa miwah ngenalang standar estetika sinema global, Program Studi Animasi Institut Seni Indonesia (ISI) Bali prasida nglaksanayang parikrama “Road to Europe on Screen 2026”. Parikrama sané madaging pemutaran film animasi kapilih miwah sesi diskusi puniki kamargiang ring rahina Wraspati, 7 Mei 2026, magenah ring Gedung Vicon Lantai 2 Citta Kelangen, ISI Bali.
Kolaborasi istimewa puniki nampilang film animasi saking sineas Eropa sané mamurda “TITINA” (Norwegia, 2022, Sutradara: Kajsa Næss, Durasi 91 menit) sané kaloktah madue kakirangan narasi miwah teknik visual sané siteng. Film animasi punika nyaritayang indik pemargi ring warsa 1920, petualang Norwegia Roald Amundsen ngajak insinyur kapal saking Italia, Umberto Nobile, sajeroning ekspedisi ka kutub utara, ring dija Nobile makakta asunnyane sané mawasta Titina.
Parikrama sané kakawitin galah 14.00 WITA puniki kasanggra becik olih langkung saking 130 mahasiswa saking makudang-kudang prodi, krama umum, seniman Prancis, miwah dosen ring lingkungan ISI Bali. Gedung Vicon Citta Kelangen dados saksi antusiasme para sineas muda Bali sajeroning mbedah karya-karya dunia, sinambi nindihang mungguing talenta lokal sampun sayaga masaing ring kancah internasional. Kawéntenan program puniki ring ISI Bali matatujon ngardi genah dialog sajeroning kreator lokal sareng panglimbak industri film internasional.
Wusan pemutaran film, kalaksanayang sesi talkshow sané ngrawuhang Festival co-director Europe on Screen 2026, Ibu Menina Putri. Sesi diskusi interaktif punika mamargi antar tur seneng pisan, maosang indik teknis produksi, galah distribusi festival nasional miwah internasional, ngantos tantangan industri film miwah animasi ring masa sané jagi rauh. “Kerja sama puniki nénten ja wantah mabalih film sareng-sareng manten, nanging pinaka upaya titiang sajeroning nangiang inspirasi mahasiswa. Ngatonang sapunapi animator Eropa nglaksanayang idennyane, kaaptiang prasida nikaang mahasiswa Animasi ISI Bali mangda sayan wanén mautsaha antuk identitas budaya lokal sajeroning standar global,” sapunika baos I Putu Arya Janottama, Koordinator Prodi Animasi ISI Bali.
Foto: Lingga Tangan MoU sajeroning ISI Bali miwah Universitas Udayana ring Gedung Pascasarjana, Unud, Soma (11/5).
Institut Seni Indonesia Bali (ISI BALI) nganyarin Nota Kesepahaman (Memorandum of Understanding/MoU) sareng Universitas Udayana (Unud), Soma (11/5), ring Gedung Pascasarjana, Unud. Nganyarin kerja sama puniki kamargiang sajeroning wenten uahan (perubahan) nomenklatur institusi saking ISI Denpasar dados ISI BALI.
Nota Kesepahaman kalingga tanganin olih Rektor ISI BALI, Prof. Dr. Wayan ‘Kun’ Adnyana sareng Rektor Unud, Prof. Ir. I Ketut Sudarsana. Tiosan ring lingga tangan MoU, taler kamargiang lingga tangan Perjanjian Kerja Sama sajeroning Direktur Pascasarjana ISI BALI, Nyoman Dewi Pebryani sareng Dekan Fakultas Ilmu Budaya Unud, Prof. I Nyoman Aryawibawa.
Foto: Lingga Tangan MoU sajeroning Pascasarjana ISI BALI miwah Fakultas Ilmu Budaya, Unud ring Gedung Pascasarjana, Unud, Soma (11/5).
Lingga tangan kerja sama punika taler kasaksiang olih Pamucuk Senat ISI BALI, Prof. Dr. Drs. Ketut Muka, Wakil Rektor Bidang Kemahasiswaan miwah Kerja Sama ISI BALI, Prof. Dr. Komang Sudirga, Kepala Biro Akademik, Kemahasiswaan, Perencanaan, miwah Kerja Sama ISI BALI, Dr. Komang Arba Wirawan, taler jajaran pimpinan saking Universitas Udayana. Rawuh taler Wakil Rektor Bidang Perencanaan, Kerja Sama, miwah Informasi Unud, Prof. Dr. Eng. Ir. Made Sucipta, Plt. Kepala Biro Akademik, Kerja Sama miwah Humas Unud, Prof. Ir. I Nengah Sujaya, Koordinator Program Studi S3 Kajian Budaya, Prof. Dr. I Nyoman Darma Putra, miwah Koordinator UPIKS Fakultas Ilmu Budaya, Dr. I Gusti Agung Istri Aryani.
Sajeroning atur panyanggrama, Rektor ISI BALI, Prof. Wayan ‘Kun’ Adnyana, maosang indik ISI BALI miwah Unud madue paiketan historis sané doh pisan sajeroning nincapang pendidikan seni ring Bali. Dane maosang mungguing Program Studi Seni Rupa miwah Desain (PSRD) Unud ring masa sané sampun lintang dados pahan sané mabuat pisan sajeroning pamargin kawéntenan ISI Denpasar sané mangkin sampun mauah dados ISI BALI.
Manut dane, paiketan makakalih institusi puniki nénten ja wantah ring babad sejarah manten, nanging taler kalaksanayang antuk makudang-kudang kolaborasi sané sampun mamargi, becik punika ring widang pendidikan, penelitian, pengabdian ring krama, ngantos pawangunan sumber daya manusia. Dane mapangapti mangda uahan (perubahan) kerja sama puniki sayan nincapang sinergi makakalih perguruan tinggi sajeroning nureksain tantangan pendidikan tinggi kawekasan.
“ISI BALI miwah Unud madue paiketan historis miwah semangat sané pateh sajeroning nangiang pendidikan tinggi ring Bali. Melarapan antuk kerja sama puniki, titiang mapangapti kolaborasi sané sampun mamargi prasida sayan limbak tur mapaica pikenoh sané nyata majeng pawangunan institusi miwah krama sami,” sapunika baos dané.
Foto: Lingga Tangan MoU sajeroning ISI BALI miwah Universitas Udayana ring Gedung Pascasarjana, Unud, Soma (11/5).
Sajeroning galah punika, Rektor Unud, Prof. I Ketut Sudarsana, nyanggra becik lingga tangan dokumen kerja sama punika. Dane nindihang mungguing Unud madue visi sané pateh sareng ISI BALI sajeroning nincapang sumber daya manusia sané punjul ring Bali miwah Indonesia.
Dane mapangapti mangda kerja sama sané kaanyarin puniki prasida nikaang nincapang makudang-kudang parikrama akademik miwah pawangunan institusi sané mapaica pikenoh langsung majeng kualitas lulusan. Manut dane, kolaborasi antarperguruan tinggi dados pemargi mabuat sajeroning ngardi lulusan sané madue daya saing tur prasida nyautin kaperluan jagat mangkin.
“Kerja sama puniki kaaptiang prasida nincapang makudang-kudang parikrama sané produktif miwah inovatif, mangda prasida ngembasang lulusan sané madue daya saing tur mrasidang nyokong pawangunan Bali miwah Indonesia,” sapunika baos dané. (ISIBALI/Humas)
