Foto: Pemeriksaan jangkep administrasi pamilet UTBK-SNBT 2026 magenah ring Gedung Desain Hub ISI BALI, nuju rahina Anggara (21/4).
Institut Seni Indonesia Bali (ISI BALI) malih polih kapercayan dados silih tunggil Pusat Ujian Tulis Berbasis Komputer (UTBK) sajeroning nampi mahasisya anyar warsa 2026 melarapan jalur Seleksi Nasional Berbasis Tes (SNBT). Pamargin UTBK ring ISI BALI kapusat ring Gedung Desain Hub saking tanggal 21 nyantos 27 April 2026.
Ring sajeroning nasional, wenten 74 pusat UTBK sane sampun kacumawisang olih Panitia Seleksi Nasional Penerimaan Mahasiswa Baru (SNPMB) 2026 ring sajebag Indonesia. Kapercayan puniki nyihnayang kesiapan sarana, prasarana, miwah SDM ISI BALI sajeroning ngamargiang ujian berbasis komputer sane profesional tur manut standar.
Rektor ISI BALI, Prof. Dr. Wayan ‘Kun’ Adnyana, nlatarang mungguing ring pitung rahina punika, UTBK ring ISI BALI ngayahin 3.608 pamilet sane kakepah dados 13 sesi ujian. Anggen nangiang pamargin ujian mangda memargi antar, ISI BALI sampun nyiagayang 10 laboratorium komputer antuk 330 unit komputer.
“Sajebag persiapan sampun kalaksanayang kanit antuk matang, rumasuk nyoba sistem UTBK mangda nenten wenten pikobet teknis sekadi listrik, jaringan internet, miwah sane lianan,” baos Prof. Kun Adnyana sane kasarengin olih Wakil Rektor Bidang Akademik miwah Sistem Informasi, Prof. Dr. AA Gde Bagus Udayana.
Dane negasang mungguing ISI BALI mautsaha maktayang pelayanan sane pinih becik majeng ring sinamian pamilet UTBK-SNBT 2026. “Titiang nitenin mangda sinamian pamilet prasida nyarengin ujian antuk rasa nyaman, tertib, miwah antar,” sapunika imbuhne.
Sajeroning pamargi puniki, wenten 289 dosen miwah tenaga kependidikan ISI BALI sane sareng mautsaha. Ida dane madué swadharma ring makudang-kudang posisi, kakawitin saking petugas monitoring, admin server, teknisi IT, pengawas, petugas kesehatan, nyantos teknisi listrik. Lianan ring punika, pamargi UTBK taler kasokong olih petugas keamanan miwah kebersihan mangda genah ujian tetep becik.
Antusiasme calon mahasisya sane jagi malajah ring ISI BALI melarapan jalur SNBT sayan nincap. Kacatet, akéh pendaftar nyantos 837 diri. Akéhnyane minat puniki kacingak ring makudang-kudang program studi. Program Studi Desain Komunikasi Visual (DKV) dados silih tunggil sane pinih akéh kaminatin, kasambung olih program studi anyar Desain Mode sane taler ngedotang kayun para pendaftar.
Ring jalur SNBT warsa puniki, ISI BALI nyediayang 16 program studi sarjana miwah 3 program studi sarjana terapan sane wenten ring Fakultas Seni Pertunjukan miwah Fakultas Seni Rupa dan Desain.
Melarapan antuk pamargi UTBK-SNBT 2026 puniki, ISI BALI mapangapti mangda prasida satata maktayang proses seleksi sane profesional tur mualitas, sinambi nyokong nincapang pendidikan tinggi seni, desain, miwah budaya ring Indonesia. (ISIBALI/Humas)
