Foto: KegiatanDiseminasi Tugas Akhir Fakultas Seni Rupa dan Desain hari ke-2 di Bencingah Nata-Cita Arts Space ISI BALI, Rabu (14/1).
Sajeroning parikrama Vidya Vastu Virya rahina kaping kalih, siosan ring Pameran Visual sane kantun kabuka, wenten taler pidabdab parikrama saking makudang-kudang Himpunan Mahasiswa Program Studi (HMP) saking Fakultas Seni Rupa dan Desain (FSRD) ISI Bali. Rahina kaping kalih, Budha (14/1), karameang olih HMP Seni Murni, HMP Animasi, HMP Produksi Film dan Televisi, lan HMP Desain Mode
Silih tunggilne wenten orti-orti sane ngicenin inspirasi saking makudang-kudang Mahasiswa. Saking HMP Desain Mode miwah HMP Program Studi Produksi Film dan Televisi, wenten makudang-kudang Mahasiswa sane nyritayang pengalamannyane melarapan antuk Art Talk. Minakadi proses kreatif, eksplorasi ide, ngantos nilai disiplin lan konsistensi sane kapelajahin selami negepin widang puniki.
Wenten taler pagelaran seni gagendingan miwah sasolahan saking makudang-kudang Mahasiswa Desain Mode. Anggun Kristipa, silih tunggil Mahasiswa Desain Mode sane nyarengin nagingih pagelaran seni punika, maosang indik parikrama puniki dahat mapikenoh pisan. Campuhan gagendingan saking Anggun miwah timpal-timpalnyane Indah lan Anggita sane masolah ngawinang kawentenan pagelaran punika kabaos idup tur emosional. ‘Sabilang sasolahan punika silih sinunggil nagingin tur ngukuhang orti indik widang mode punika sanget mapaiketan ring ekspresi seni, rasa, lan kalulutan gerak,’ baos Anggun.
HMP Seni Murni nyihnayang parikrama live painting kasarengin narasumber Mahasiswa Tugas Akhir sajeroning Art Talk. Made Chandra nyritayang pakaryannyane sane nyihnayang pikolih pangaptine ngeninin Seni Lukis Wayang Kamasan majeng ring audiens, sapunika taler Made Nova Moyo ngunggahang indik isu lingkungan sane sayan ngusak ekosistem dunia antuk simbol makudang-kudang material miwah kedis Cendrawasih. ‘Pengalaman kawentenan tityang, kampus dados laboratori sane sinegehang, katakonang, tur genah calon seniman ngwangun sawitra seantukan kapunduhang sareng timpal-timpal saking makudang-kudang widang rumasuk SMSR,’ baos Chandra.
Makakalih madue pikayunan indik sapunapi galah Program ISI Bali Berdampak Magang wiadin Studi Independen punika wantah galah sane nenten rauh ping kalih, pamekasne majeng ring Moyo sane madue tekad mangda prasida kuliah antuk prabeya niri. Genah magang jagi dados titipan ri kala wekas medal saking kampus, asapunika taler ngajah-ajain sajeroning nincapang kateguhan Mahasiswa. ‘Satu kata, ngelindeng, yening pianak seni punika nenten ngelindeng nika nenten bebas, buntu, akehang madue timpal, relasi, pasti prasida nika, pasti!’ baos Moyo mapesen.
Saking HMP Animasi nyihnayang pagelaran musik akustik tur sajeroning Art Talk wenten Mahasiswa Semester 3 Caleb Nikao Hutabarat miwah Mahasiswa Semester 1 Putu Bagus Mas. Kawentenan industri perfilman animasi ring Indonesia sane sayan nincap dados jalaran napa awinan Program Studi Animasi puniki akeh sane nyenengin. Seantukan ipun sering nyingak kartun-kartun minakadi Boboiboy miwah Upin Ipin ngawinang ipun meled nawang sapunapi tatacara ngarya animasi. ‘Tityang mapikayun napa awinan nenten dados jadma ring ungkur layar sane prasida nagingin imajinasi sajeroning rupa kartun utawi animasi,’ baos Bagus Mas.
Yadiastun wenten pikobet ring panti krama galah makarya tur setata ngwangun komunikasi sareng timpal ngeninin proses ngarya animasi saking pra ngantos pasca produksi, Caleb miwah Bagus Mas ngerasaang tugas-tugas sane kakaryanin wekas jagi maguna. ‘Pabesen tityang setata improve ring padewekan, sampunang bes loba ring mood swing, setata makarya tur dados jadma sane mapikenoh ring masa depan,’ baos Caleb mapungkas.
