Foto: Panegteg Dies Natalis sane mamurda “Kita Jiwa Kata” sajeroning Malam Puitika miwah Artistika ring Auditorium Kirtya Sabha Mahottama, Gedung Citta Kelangen ISI BALI, nuju rahina Buda (25/2) wengi.
Sajeroning nyihnayang linggih Dies Natalis XXIII Warsa 2026, Institut Seni Indonesia Bali (ISI BALI) ngamargiang Panegteg Dies Natalis sane mamurda “Kita Jiwa Kata” ring sajeroning Malam Puitika miwah Artistika, magenah ring Auditorium Kirtya Sabha Mahottama, Gedung Citta Kelangen ISI BALI, nuju rahina Buda (25/2) wengi. Parikrama puniki dados genah reflektif anggén nyanggra ‘kata’ pinaka dewan (ruh) pangriptan miwah pangajian seni.
Silih tunggil acara utama sane kamargiang inggih punika bedah buku Artistika Rupa Paraga sane ngerauhange kurator seni rupa Arif B. Prasetyo, akademisi Prof. Dr. Gede Yudarta, miwah Prof. Dr. Anak Agung Gede Rai Remawa pinaka narasumber, tur kamargiang olih Prof. Dr. Komang Sudirga pinaka moderator. Papidarta punika ngulas sapunapi paukudan seni nenten ja wantah rupa sane kanten, nanging taler pinaka pamineh sane prasida kabaosang tur dipertanggungjawabkan (kapaidartayang) manut ring dasar-dasar ilmiah.
Foto: Bedah buku Artistika Rupa Paraga sajeroning Malam Puitika miwah Artistika, magenah ring Auditorium Kirtya Sabha Mahottama, Gedung Citta Kelangen ISI BALI, nuju rahina Buda (25/2).
Ring galah punika taler kamargiang panyukra (penyerahan) buku secara simbolik majeng ring perwakilan Dewan Pertimbangan, Kepala Unit Penunjang Akademik Perpustakaan, miwah sang sane polih penghargaan Bali Bhuwana Nata Kerthi Nugraha pinaka cihna diseminasi kaweruhan tur nindihang literasi akademik ring sajeroning lingkungan kampus.
Kahanan wengi punika sayan ledang tur khidmat rikala kawentenan pawaosan puisi olih Duta Besar Luar Biasa dan Berkuasa Penuh RI antuk Kazakhstan, Dr. Mochammad Fadjroel Rachman, sastrawan Warih Wisatsana, miwah sineas Riri Riza. Karauhan para tokoh punika nindihang yan ‘kata’ madue daya urip sane prasida ngelintangin wates disiplin ilmu miwah profesi.
Foto: Pawaosan Puisi olih Duta Besar Luar Biasa dan Berkuasa Penuh RI antuk Kazakhstan, Dr. Mochammad Fadjroel Rachman sajeroning Malam Puitika miwah Artistika ring Auditorium Kirtya Sabha Mahottama, Gedung Citta Kelangen ISI BALI, nuju rahina Buda (25/2).
Rektor ISI BALI, Prof. Dr. Wayan “Kun” Adnyana, maosang yan resepsi Dies Natalis puniki mateges pinaka utsaha nyanggra ‘kata’ pinaka panyinahan jiwa. “Kata punika pinaka dasar iraga ngerastiti. Sareng 24 dosen doktor pangriptan miwah pangajian seni, iraga ngerumusang sapunapi kaukudan siki karya prasida kabaosang antuk kata, raris kakemas sajeroning Artistika Rupa Paraga. Rupa mateges sane kanten, paraga mateges sane prasida kamanunggalang ring raga, ngalir dados ambe (gerak) tur dados sasolahan,” kadi punika baos idané. (ISIBALI/Humas)
Foto: Penyerahan Paican Penghargaan Sewaka Kerthi Mahawidya Nugraha Warsa 2026 majeng ring Mitra ISI BALI sane Mapidabdab, Sukra (20/2) ring Auditorium Kirtya Sabha Mahottama, ISI BALI.
Institut Seni Indonesia Bali (ISI BALI) micayang Paican Penghargaan Sewaka Kerthi Mahawidya Nugraha Warsa 2026 majeng ring 479 Mitra ISI BALI sane Mapidabdab ring sajeroning Pasamuan Widya Mahardika sane mamurda Kerthi–Jnana–Kwya (Cemerlang Jiwa Cendekia), ring rahina Sukra (20/2) magenah ring Auditorium Kirtya Sabha Mahottama, ISI BALI. Paican penghargaan puniki pinaka cihna apresiasi majeng ring kontribusi nyata para mitra sane sampun nyokong pangwerdi akademik, jejaring profesional, tur panglimbak kapasitas para mahasiswanyane.
Ring sajeroning sambrama wacanannyane, Rektor ISI BALI, Prof. Dr. Wayan ‘Kun’ Adnyana, negasang mungguing Paican Penghargaan Sewaka Kerthi Mahawidya Nugraha puniki katurang majeng ring para mitra sane mapidabdab, sane sampun micayang kaweruhan, pangalaman, jejaring, miwah kedeh kayunnyane mapatunggalan sareng sivitas akademika. Manut keneh dane, sinergi sane kawangun pantaraning kampus miwah mitra eksternal puniki dados energi mabuat sane nyokong ISI BALI mangda sayan percaya diri pinaka institusi seni sane adaptif tur relevan.
Sakatah 479 mitra sane polih paican penghargaan puniki mawit saking makudang-kudang widang miwah sektor sane sampun mabuat pisan mapatunggalan sareng ISI BALI, sajeroning parikrama akademik, praktik profesional, riset, miwah pengabdian majeng ring krama. Pangrauh parajana puniki kabaos prasida ngicenin kawigunan ageng ring ekosistem mlajah sane madasar antuk praktik miwah kolaborasi.
Foto: Pasamuan Widya Mahardika sane mamurda Kerthi–Jnana–Kwya (Cemerlang Jiwa Cendekia), ring rahina Sukra (20/2) magenah ring Auditorium Kirtya Sabha Mahottama, ISI BALI.
Ring galah punika, kalih perwakilan mitra maosin testimoni. Defria Amelia Kirana, Mitra Fakultas Seni Rupa miwah Desain, maosang mungguing kolaborasi sareng ISI BALI ngicenin galah mababaosan kreatif sane saling nyokong pantaraning dunia profesional miwah kampus. Sinambi punika, I Gusti Bagus Matra, Mitra Fakultas Seni Pertunjukan, ngwedarang rasa bangga prasida sareng nyokong parikrama pambinaan tur maderbe galah maosin pangalaman sareng para mahasiswanyane pinaka katurunan seni ring masa sane jagi rauh.
Ring sajeroning parikrama sane pateh, ISI BALI taler micayang Paican Penghargaan Sewaka Nata Kerthi Nugraha, penganugerahan majeng ring Pengabdi Seni Bereputasi, katurang ring Made Subrata alias Petruk, seniman teater tradisional, miwah Sukanta Wahyu, pematung sane satia makarya tur ngicenin kontribusi ring panglimbak seni rupa. Taler mungguing punika, penghargaan Sewaka Mahabakti Nugraha katurang majeng ring nemnem diri pegawai purna tugas antuk dedikasi miwah pengabdian sane utama ri kala ngalaksanayang swadharma ring lingkungan ISI BALI. (ISIBALI/Humas)
Foto: Jajaran pimpinan ISI BALI kasarengin Asesor BAN-PT miwah tim akreditasi Prodi Tata Kelola Seni Program Magister ISI BALI, Sukra (20/2) ring Gedung Desain Hub ISI BALI.
Program Studi Tata Kelola Seni Program Magister, Program Pascasarjana Institut Seni Indonesia Bali (ISI BALI) ngamargiang Asesmen Lapangan Akreditasi saking Badan Akreditasi Nasional Perguruan Tinggi (BAN-PT), ring rahina Sukra (20/2) magenah ring Gedung Desain Hub ISI BALI. Parikrama puniki dados pidabdab sane mabuat pisan sajeroning proses akreditasi nindihin mutu panyeledia pendidikan mangda manut ring standar nasional pendidikan tinggi.
Tim asesor sané rauh sajeroning asesmen lapangan puniki wantah Prof. Dr. phil. Yudi Sukmayadi, M.Pd. miwah Dr. Agung Eko Budiwaspada, M.Sn., kasarengin staf BAN-PT Dwi Sakti Nugroho. Pangrauh tim asesor kasanggra langsung olih jajaran pimpinan ISI BALI, minakadi Rektor Prof. Dr. I Wayan ‘Kun’ Adnyana, Wakil Rektor Bidang Akademik miwah Sistem Informasi Prof. Dr. AA. Gde Bagus Udayana, Wakil Rektor Bidang Perencanaan, Keuangan, miwah Umum Dr. Made Jodog, tur Wakil Rektor Bidang Kemahasiswaan miwah Kerja Sama Prof. Dr. Komang Sudirga. Taler rauh Kepala Biro Umum miwah Keuangan Dr. Gusti Ngurah Sudibya miwah Kepala Biro Akademik, Kemahasiswaan, Perencanaan, miwah Kerja Sama Dr. Komang Arba Wirawan.
Foto: Asesmen Lapangan Akreditasi saking BAN-PT, Sukra (20/2) magenah ring Gedung Desain Hub ISI BALI.
Pamargin asesmen puniki kasayagayang olih Unit Pengelola Program Studi (UPPS) Program Pascasarjana ISI BALI sareng tim akreditasi sané kamanggala olih Direktur Pascasarjana Nyoman Dewi Pebryani, Ph.D., kasarengin Wakil Direktur Dr. Wayan Ardini, M.Si., Koordinator Prodi Tata Kelola Seni Program Magister Dr. Wayan Agus Eka Cahyadi, taler Ketua Lembaga Penjaminan Mutu Pendidikan dan Pengembangan Pembelajaran (LPMPP) Prof. Dr. Wayan Setem.
Rektor ISI BALI, Prof. Dr. I Wayan ‘Kun’ Adnyana, sajeroning daging panyambrama ngaturang rasa angayubagia miwah panyambrama becik pisan majeng ring tim asesor BAN-PT. Dané maosang indik akreditasi puniki pinaka bukti komitmen institusi sajeroning nindihin mutu miwah kualitas Program Studi Tata Kelola Seni Program Magister mangda setata manut ring standar sané sampun kacumawisang olih BAN-PT.
Manut Prof. Kun Adnyana, makasami dokumen miwah data sané kaperluang sajeroning proses asesmen puniki sampun kasayagayang becik pisan olih Prodi Tata Kelola Seni kasarengin UPPS. Guru Besar Sejarah Seni punika mapangapti mangda pamargin asesmen puniki mamargi antar tur molihang hasil sané pinih becik majeng ring program studi.
Foto: Asesmen Lapangan Akreditasi saking BAN-PT, Sukra (20/2) magenah ring Gedung Desain Hub ISI BALI.
Parikrama Asesmen Lapangan puniki madué tatujon utama sajeroning nureksain kelayakan miwah kualitas pamargin program studi sané jangkep, minakadi aspek tata kelola, kramaning sumber daya manusia, kurikulum, penelitian, pengabdian majeng ring krama, miwah luaran taler capaian paplajahan. Malarapan antuk proses puniki, program studi molihang panyeledia (masukan) sané becik pisan pinaka dasar nglimbakang paridabdab sané berkelanjutan miwah nincapang sistem penjaminan mutu internal.
Sajaba sesi sareng UPPS, tim asesor taler ngamargiang paruman sareng pelaksana penjaminan mutu internal, alumni miwah sang sané nganggén lulusan (pengguna lulusan), mahasisya, dosen, taler tenaga kependidikan. Rangkaian sesi puniki matatujon mangda polih gambaran sané jangkep indik tata kelola, proses paplajahan, luaran, miwah kontribusi program studi majeng ring kaperluan jagat karya miwah krama.
Sajeroning galah punika, Prof. Dr. phil. Yudi Sukmayadi, M.Pd. maosang indik Program Studi Tata Kelola Seni madué linggih sané unik tur mabuat pisan ring Bali. Kautaman punika magenah ring dwaning prodi puniki dados kreteg sajeroning nyambungang praktik seni, manajemen, taler nglestariang budaya lokal sané dados jati raga (identitas) Pulo Bali. Prodi puniki kasokong olih kerajengan tradisi seni, ekosistem budaya sané urip, taler panyeledia saking krama miwah sang sané ngamargiang seni, mawinan dados laboratorium nyata sajeroning nglimbakang tata kelola seni sané madasar antuk kearifan lokal.
Siosan ring punika, program studi puniki kasokong olih para dosen sané mautama, sané akéhan sampun dados guru besar miwah akademisi sané sampun wikan (berpengalaman) ring widang seni miwah manajemen budaya. Paica sarana miwah prasarana sané becik pisan taler dados panyokong utama sajeroning proses paplajahan, penelitian, miwah pengabdian majeng ring krama.
Foto: Asesmen Lapangan Akreditasi saking BAN-PT, Sukra (20/2) magenah ring Gedung Desain Hub ISI BALI.
Asesor Dr. Agung Eko Budiwaspada, M.Sn. maosang indik malarapan antuk sesi wawancara sareng mahasisya, alumni, miwah para pemangku kepentingan (stakeholders), Program Studi Tata Kelola Seni kabaosang mautama pisan (unggul). Para responden nureksain indik kurikulum sampun manut ring kaperluan jagat karya, kualitas pangajahan sané becik, taler para lulusan prasida mapadungdung (beradaptasi) miwah mabuat pisan sajeroning ngelola seni lan budaya ring makudang-kudang sektor.
Pikenoh saking Asesmen Lapangan puniki nenten ja wantah karasayang olih institusi, nanging taler olih mahasisya, dosen, miwah para pemangku kepentingan. Pikolih (hasil) asesmen puniki dados dasar sajeroning nincapang standar akademik, nyukertayang reputasi institusi, mangda prasida nindihin para lulusan madué kompetensi sané manut ring kaperluan krama miwah industri kreatif. (ISIBALI/Humas)
Foto: Rektor ISI BALI Prof. Dr. Wayan ‘Kun’ Adnyana sareng Walikota Hasami, Jepang, Mr. Yoshinori Maekawa, kasarengin antuk Manggala Asosiasi Industri Keramik Hasami, Jepang, Mr. Kazuhiko Ota, nuju rahina Buda (18/2) ring Ruang Sabha Citta Mahottama, ISI BALI.
Manggala (Rektor) Institut Seni Indonesia Bali (ISI BALI), Prof. Dr. Wayan ‘Kun’ Adnyana nampi sapangrauh Walikota Hasami, Jepang, Mr. Yoshinori Maekawa, kasarengin antuk Manggala Asosiasi Industri Keramik Hasami, Jepang, Mr. Kazuhiko Ota, nuju rahina Buda (18/2) ring Ruang Sabha Citta Mahottama, ISI BALI. Pangrauh puniki taler katampi olih jajaran pimpinan ring lingkungan ISI BALI.
Hasami, sané kasub pinaka kota industri keramik utama ring Jepang, nyujur galah kerja sama strategis sareng ISI BALI. Tetujon pangrauh puniki inggih punika ngwangun proyék sané dados titi pangubung riantara “manusa” lan “teknologi” ring Jepang miwah Indonésia, ngicen galah majeng ring mahasisya ISI BALI sané madué prestasi mangda prasida malajahin industri keramik tradisional Jepang, sinambi nyokong pangukuhan kurikulum perguruan tinggi miwah panglimbak karier mahasisya.
Foto: Kunjungan Walikota Hasami, Jepang, Mr. Yoshinori Maekawa, beserta Ketua Asosiasi Industri Keramik Hasami, Jepang, Mr. Kazuhiko Ota, pada Rabu (18/2) di Ruang Sabha Citta Mahottama, ISI BALI.
Pihak Hasami nyinahang pikayunan mangda prasida nawahang galah karier majeng ring mahasisya sané madué kawagedan ring widang keramik mangda makarya ring Hasami, Jepang. Pamargin puniki kaaptiang mangda prasida ngicénin pangalaman praktis internasional majeng ring para mahasisya, sinambi mungkah papineh ngeniang babon industri keramik tradisional miwah modern ring Jepang. Rektor ISI BALI nampi becik inisiatif puniki, saantukan Program Studi Kriya ring ISI BALI madué kualitas sané mumpuni. Akéh mahasisya sané aktif makarya keramik seni wiadin keramik sané prasida langsung kaanggén, mawinan galah kerja sama puniki kabaos strategis pisan anggén nglimbakang kawagedan mahasisya miwah kasiapan ipun ngeranjing ring jagat pakaryan internasional. (ISIBALI/Humas)
“Foto: Paruman koordinasi nyayagaang Asesmen Lapangan Akreditasi BAN-PT Prodi Tata Kelola Seni Program Magister ring Ruang Sidang Gedung Pascasarjana ISI BALI, Budha (11/2).”
Program Studi (Prodi) Tata Kelola Seni Program Magister Institut Seni Indonesia Bali (ISI BALI) sedek nyayagaang laksana Asesmen Lapangan Akreditasi Program Studi saking Badan Akreditasi Nasional Perguruan Tinggi (BAN-PT) sane jagi kamargiang ring pinanggal 19–21 Februari 2026. Asesmen puniki pinaka akreditasi sane kapertama ring Prodi Tata Kelola Seni saking kawentenannyane ring warsa 2024.
Pinaka silih tunggil pemargi strategis nuju asesmen punika, Program Pascasarjana ISI BALI ngamargiang paruman koordinasi nyayagaang asesmen lapangan, nuju rahina Budha (12/2), magenah ring Ruang Sidang Gedung Pascasarjana ISI BALI.
Paruman koordinasi puniki kapucukin langsung olih Direktur Pascasarjana ISI BALI, Nyoman Dewi Pebryani, Ph.D., tur kabaktanin olih jajaran pimpinan Program Pascasarjana, para pejabat ring lingkungan Lembaga Penjaminan Mutu dan Pengembangan Pembelajaran (LPMPP), tim panyusun dokumen akreditasi, para dosen, miwah tenaga kependidikan sane sareng nyokong ring pamargin akreditasi punika.
Sajeroning arahannyane, Nyoman Dewi Pebryani, Ph.D. maosang indik paruman puniki kamargiang sajeroning nunggalang persepsi, memetakan nincapang kesiapan, tur nitenin sareng sami unsur pendukung akreditasi mangda mamargi antar tur sistematis. Ipune ngaptiang sareng sami sivitas akademika sane sareng nyokong prasida mautsaha nunggilang raga manut ring tugas lan swadharman soang-soang, mangda pamargin asesmen lapangan prasida mamargi antar lan optimal. “Saking paruman puniki, iraga meled nitenin indik sareng sami dokumen, data pendukung, miwah bukti kinerja sane gelahang program studi sayuwakti sampun sayaga tur kasajiang nunggilang akurat. Asesmen lapangan puniki patut karemba antuk pangrencana sane becik, sareng-sareng makarya (kerja sama) sane kukuh, miwah komitmen sinarengan ngeninin indik mutu,” kadi punika baos ipune. Sajeroning paruman punika taler kabaosang indik pahan tugas, muputang (finalisasi) dokumen akreditasi, miwah laksana simulasi asesmen lapangan sane jagi kamargiang ring pinanggal (18/2) pinaka cihna nincapang kesiapan sadurung rauh asesor BAN-PT. (ISIBALI/Humas)
Foto: Audiensi Rektor ISI BALI, Prof. Dr. Wayan ‘Kun’ Adnyana, sareng Gubernur DKI Jakarta, Dr. Ir. Pramono Anung Wibowo, M.M., ring Ruang Tamu Gubernur, Balai Kota Jakarta, nemu Wraspati (5/2).
Institut Seni Indonesia Bali (ISI BALI) ngawangun kerja sama strategis sareng Pemerintah Provinsi Daerah Khusus Ibukota (DKI) Jakarta sajeroning widang seni miwah budaya. Penjajakan kerja sama punika kabaosang sajeroning audiensi riantara Rektor ISI BALI, Prof. Dr. Wayan “Kun” Adnyana, sareng Gubernur DKI Jakarta, Dr. Ir. Pramono Anung Wibowo, M.M., sane mamargi ring Ruang Tamu Gubernur, Balai Kota Jakarta, nemu i roras Wraspati (5/2).
Audiensi puniki taler karauphin olih Kepala Dinas Kebudayaan Provinsi DKI Jakarta, Mochamad Miftahulloh Tamary, S.STP, MT, M.Sc., miwah Kepala Biro Kerja Sama Daerah Sekretariat Daerah Provinsi DKI Jakarta, Marulina Dewi, S.STP, MPA. Saking ISI BALI, hadir Wakil Rektor Bidang Kemahasiswaan lan Kerja Sama, Prof. Dr. Komang Sudirga; Ketua Senat, Prof. Dr. Ketut Muka; Protokol, Made Irma Novita Sari, S.Sn.; taler Humas ISI BALI, Rara Tian Anyar Sari, S.S.
Sajeroning parikrama punika, makakalih pihak mabaosang indik makudang-kudang potensi kolaborasi riantara Pemerintah Provinsi DKI Jakarta miwah institusi pendidikan seni sajeroning nincapang ekosistem kebudayaan. Kerja sama puniki kaaptiang mangda prasida nyokong pangembangan seni, ngalestariang budaya, taler nincapang partisipasi krama malarapan antuk program-program kolaboratif sane berkelanjutan.
Foto: Audiensi ISI BALI sareng Pemerintah Provinsi DKI Jakarta ring Ruang Tamu Gubernur, Balai Kota Jakarta, nemu jem Wraspati (5/2).
Rektor ISI BALI, Prof. Dr. Wayan “Kun” Adnyana, sajeroning galah punika midartaang silih tunggil program unggulan ISI BALI, inggih punika Bali Nata Bhuwana, pinaka wahana diseminasi nasional seni miwah budaya sane sampun mamargi saking warsa 2022. Program puniki sampun kalaksanayang ring makudang-kudang wawidangan, minakadi Kediri (Jawa Timur), Labuan Bajo (Nusa Tenggara Timur), Lampung, miwah Yogyakarta, tur karancanayang jagi nglantur ring Kendari ring warsa 2026.
Manut Rektor ISI BALI, Bali Nata Bhuwana nenten wantah pinaka media diseminasi karya miwah gagasan seni, nanging taler mabuat sajeroning nincapang ekosistem seni sane ngicenin pikenoh langsung majeng krama, becik punika saking widang edukasi, ekonomi kreatif, miwah ngukuhang identitas budaya.
Gubernur DKI Jakarta, Dr. Ir. Pramono Anung Wibowo, M.M., nyumbangang apresiasi majeng inisiatif kerja sama sane katurang olih ISI BALI. Ida negasang mungguing Jakarta pinaka kota multikultural maduwe genah sane jembar sajeroning pangembangan seni miwah budaya saking makudang-kudang latar belakang, sajeroning punika kolaborasi sareng institusi pendidikan seni minakadi ISI BALI kabaos dahat mabuat tur strategis. Audiensi puniki dados pamahbah sajeroning ngawangun sinergi riantara ISI BALI miwah Pemerintah Provinsi DKI Jakarta sajeroning ngardi ekosistem seni miwah budaya sane inklusif, dinamis, taler maduwe pikenoh majeng krama akeh.
