Foto: Pagelaran Tari Serng Kratip olih makudang-kudang mahasiswa saking Angthong College of Dramatic Arts lan Roi Et College of Dramatic Arts, Thailand sareng-sareng mahasiswa ISI BALI, nuju rahina Soma (23/2) magenah ring Gedung Natya Mandala ISI BALI.
Institut Seni Indonesia Bali (ISI BALI) ngalaksanayang pagelaran seni sane nyihnayang kolaborasi budaya pantaraning Angthong College of Dramatic Arts lan Roi Et College of Dramatic Arts, Thailand, sareng sivitas akademika ISI BALI, nuju rahina Soma (23/2) magenah ring Gedung Natya Mandala ISI BALI. Pagelaran puniki pinaka lanturan saking parikrama workshop seni sane sadurungnyane sampun kalaksanayang sareng delegasi saking Thailand, sapisanan dados genah apresiasi ring pikolih pangajah-ajah miwah pakerat kanti budaya sane sampun mamargi.
Acara puniki kakawitin antuk sasolahan Tari Selat Segara sane kabaktayang olih mahasiswa Program Studi Pendidikan Seni Pertunjukan (PSP) ISI BALI, kaindihin antuk tabuh gamelan olih mahasiswa PSP. Sasolahan panyanggra puniki nyihnayang kawentenan sane dinamis sapisanan nyinahang kasugihan seni pertunjukan Bali ring sapangrauh sang sane saking Thailand.
Foto: Sasolahan Karawitan olih para dosen Angthong College of Dramatic Arts lan Roi Et College of Dramatic Arts, Thailand sareng para dosen miwah mahasiswa ISI BALI, nuju rahina Soma (23/2) magenah ring Gedung Natya Mandala ISI BALI.
Salanturnyane, delegasi saking Thailand nyihnayang tigang soroh sasolahan tradisional Thailand sane nyinahang kasugihan budaya saking makudang-kudang wewidangan ring panegara punika. Sasolahan sane kapertama inggih punika Fon Dok Mai utawi Dance of Flowers, silih tunggil sasolahan tradisional sane nyinahang solah tangan sane alus maduluran antuk sarana bunga pinaka simbol kalanguan lan kaharmonisan.
Sasolahan sane kaping kalih inggih punika Serng Kratip, sasolahan krama saking wewidangan Isan sane madue solah dinamis tur nganggen kain lipit sane rupa ipun kadi kampid ritatkala pragina punika masesolahan. Sasolahan puniki kabaktayang antuk kolaborasi olih mahasiswa Thailand sareng mahasiswa ISI BALI sane sadurungnyane sampun nyarengin workshop tari tradisional Thailand.
Panyutun sasolahan puniki inggih punika sasolahan krama Isan sane kabaktayang mapahiyasan (mapasangan) olih pragina lanang lan istri. Sasolahan puniki nyinahang kauripan krama ring desa sane bek antuk kaliangan miwah kapiulangan, antuk gerak sane enerjik tur ekspresif.
Siosan ring sasolahan, pagelaran puniki taler nyihnayang pikolih workshop karawitan sane sadurungnyane sampun kamargiang sareng mahasiswa ISI BALI. Sasolahan punika kabaktayang olih para dosen saking Thailand sareng Wakil Rektor Bidang Kemahasiswaan lan Kerja Sama ISI BALI, Prof. Dr. Komang Sudirga, Kepala Lembaga Penelitian dan Pengabdian kepada Masyarakat (LPPM) Dr. Ketut Garwa, Koordinator Prodi (Koprodi) PSP, Putu Hartini, M.Sn, Koprodi Karawitan Made Dwi Andika Putra, M.Sn, miwah makudang-kudang mahasiswa PSP ISI BALI. Kolaborasi puniki nyinahang paridabdab pakerat kanti kaweruhan miwah praktik seni pantaraning makakalih pihak sane sampun mamargi ritatkala parikrama workshop.
Pagelaran puniki dados galah sane mabuat pisan sajeroning ngeratang kanti akademik miwah budaya pantaraning ISI BALI lan institusi seni saking Thailand. Melarapan antuk sasolahan seni sane kolaboratif, parikrama puniki ngicenin pangalaman artistik ring para mahasiswa sapisanan nincapang dialog budaya ring sajeroning para seniman miwah akademisi saking makakalih panegara.
Foto: ISI Bali ngalaksanayang workshop tari tradisional Thailand sareng Angthong College of Dramatic Arts lan Roi Et College of Dramatic Arts, Thailand, ring rahina Soma (23/2) magenah ring Studio Tari ISI Bali.
Institut Seni Indonesia Bali (ISI Bali) nampi sapangrauh delegasi saking Angthong College of Dramatic Arts lan Roi Et College of Dramatic Arts, Thailand, sajeroning nincapang penjajakan kerja sama ring widang pergelaran seni lan workshop kolaboratif. Parikrama puniki kalaksanayang ring rahina Soma (23/2) magenah ring Gedung Natya Mandala, ISI Bali.
Delegasi saking Thailand punika kakepah antuk pimpinan, dosen, miwah mahasiswan saking makakalih institusi inucap. Delegasi Angthong College of Dramatic Arts kamargiang olih Mr. Etsawat Paksin pinaka Direktur, kasarengin antuk para dosen Mr. Channar Kaeosawang, Mr. Chalermchai Pimonrak, Mrs. Ratchanewan Srinsakrat, Miss Suchanya Kongsin, Miss Thitima Ongthong, miwah Mr. Atitak Rukdee, sapunika taler mahasiswa Mr. Vongathorn Timnoee, Miss Nattanan Chumsuwan, lan Miss Kanyarat Kumsin.
Ring galahe punika, delegasi Roi Et College of Dramatic Arts kamargiang olih Miss Benjita Petchsom pinaka Direktur kasarengin antuk Miss Kemika Wongamrin pinaka Deputy Director. Taler rauh para dosen Mr. Achariya Wongsi, Miss Nattawan Pimonket, Miss Phailin Sarnkam, Mr. Chaimongkhon Sriphaet, Mr. Runset Sritham, miwah Mr. Pongsakda Padkeoplon, sapunika taler mahasiswa Miss Jariya Chosakao lan Miss Chanantida Luaksiase.
Foto: Parikrama workshop karawitan sané kasarengin olih para dosen saking Angthong College of Dramatic Arts lan Roi Et College of Dramatic Arts, Thailand, kalaksanayang ring rahina Soma (23/2) magenah ring Studio Karawitan ISI Bali.
Sajeroning parikrama penjajakan kerja sama punika, sapangrauh delegasi taler kadagingin antuk workshop seni pinaka galah macepukang kaweruhan lan pangalaman artistik antuk makakalih institusi inucap. Delegasi Thailand ngicénin workshop tari tradisional Thailand sané kalaksanayang ring Studio Tari ISI Bali tur kasarengin olih para mahasiswa Program Studi Tari ISI Bali. Parikrama puniki ngicénin galah majeng para mahasiswa mangda uning ring teknik, estetika, miwah karakter gerak sajeroning dresta tari Thailand. Pinaka pamesuang timbal balik, ISI Bali taler ngawéntenang workshop karawitan sané kamargiang ring Studio Karawitan ISI Bali. Workshop puniki kabaosang olih Wakil Rektor Bidang Kemahasiswaan lan Kerja Sama ISI Bali, Prof. Dr. Komang Sudirga, kasarengin antuk Kepala Lembaga Penelitian dan Pengabdian kepada Masyarakat (LPPM) ISI Bali, Dr. Ketut Garwa. Parikrama punika kasarengin olih para dosen miwah mahasiswa saking delegasi Thailand sané polih galah malajahin dasar-dasar musik tradisional Bali, pamekasnyané ring praktik karawitan. (ISIBALI/Humas)
Foto: Riri Riza (tengen) kawisuda ring Wisuda Sarjana, Sarjana Terapan, Magister, miwah Doktor XXXIX sane kalaksanayang nuju rahina Sukra (27/2) ring Auditorium Kirtya Sabha Mahottama ISI BALI
Program Studi Seni Program Doktor ring Program Pascasarjana ISI BALI sane sampun polih akreditasi Unggul saking Badan Akreditasi Nasional Perguruan Tinggi (BAN-PT), malih nyinahang linggihnyane pinaka genah akademik sane ngembahang sang maraga pemikir miwah praktisi seni madasar antuk riset. Rekam jejak para lulusannyane nyihnayang kontribusi sane nyata ring makudang-kudang widang seni miwah kebudayaan, yadiastun punika ring widang penciptaan, pengkajian, utawi kebijakan budaya.
Ring Wisuda Sarjana, Sarjana Terapan, Magister, miwah Doktor XXXIX sane kalaksanayang nuju rahina Sukra (27/2) ring Auditorium Kirtya Sabha Mahottama ISI BALI, kalih figur publik nasional taler kakukuhang dados Doktor Seni, inggih punika sineas Riri Riza miwah aktris Zeezee Shahab. Makakalih kawisuda sareng para lulusan lianan sajeroning suasana sane khidmat tur membanggakan.
Riri Riza, sane madue wastana Mohammad Rivai Riza, kasub pinaka sutradara miwah produser sane karya-karyannyane madue sesana mabuat pisan ring panglimbak perfilman Indonesia modern. Melalantupan film-filmnyane, dane nampilang perspektif sinematik sane reflektif tur kontekstual sajeroning nureksain realitas sosial miwah budaya. Pendidikan doktoral sane kamargiang ring ISI BALI puniki dados genah mabuat anggen nincapang pamineh akademik ngeninin indik praktik kreatif sane sampun kalaksanayang, sinambi nagingin khazanah kajian seni madasar antuk pengalaman profesional.
Foto: Zeezee Shahab (tengen) kawisuda ring Wisuda Sarjana, Sarjana Terapan, Magister, miwah Doktor XXXIX sane kalaksanayang nuju rahina Sukra (27/2) ring Auditorium Kirtya Sabha Mahottama ISI BALI.
Sajeroning galah punika, Zeezee Shahab sane madue wasta jangkep Fauziah Shahab, taler resmi polih gelar Doktor Seni ring galah sane pateh. Kiprah dane ring industri seni peran miwah jagat kreatif nasional mangkin sayan kukuh madasar antuk akademik miwah riset sane teleb. Pendidikan doktoral puniki ngicenin dane galah nureksain indik praktik keaktoran miwah dinamika industri kreatif sajeroning perspektif keilmuan.
Rauhne para lulusan saking latar belakang profesional sane ngrincab puniki nyihnayang mungguing Program Studi Seni Program Doktor ISI BALI nenten ja wantah pusat pengembangan akademik semata, nanging pinaka genah dialog riantara teori miwah praktik, riantara penciptaan miwah pemikiran. Program puniki setata ngenahang raga pinaka genah ngukuhang widang pemineh, artikulasi praksis seni madasar antuk riset, tur panglimbak ilmu pengetahuan seni sane relevan ring dinamika kebudayaan kontemporer. (ISIBALI/Humas)
Foto: Duta Besar Luar Biasa tur Berkuasa Penuh Bulgaria antuk Indonesia, Ms. Tanya Dimitrova, Ph.D, ngicenin kuliah tamu ring Ruang Kuliah Umum, Desain Hub ISI BALI, nuju rahina Anggara (3/3).”
Institut Seni Indonesia Bali (ISI BALI) malih nincapang jejaring internasional madasar antuk kuliah tamu sane ngrauhang Duta Besar Luar Biasa tur Berkuasa Penuh Republik Bulgaria antuk Republik Indonesia, Ms. Tanya Dimitrova, Ph.D, ring Ruang Kuliah Umum, Desain Hub ISI BALI, nuju rahina Anggara (3/3). Dubes Bulgaria rauh kairing olih Komisioner Perdagangan Bulgaria antuk Indonesia, Mr. Daniel Dobrev.
Sajeroning pemaparannyane, Duta Besar Tanya Dimitrova munggahang tema “70 Years of Diplomatic Relations between Bulgaria and Indonesia”. Dane nlatarang indik pemargi paiketan bilateral makakalih negara sane sampun mamargi saking warsa 1956, sane nyakupin kerja sama ring widang politik, ekonomi, pendidikan, miwah kebudayaan. Bulgaria lan Indonesia, manut dane, madue dasar pasawitran sane kukuh madasar antuk silih singgih tur semangat kolaborasi antarnusa.
Foto: Duta Besar Luar Biasa tur Berkuasa Penuh Bulgaria antuk Indonesia, Ms. Tanya Dimitrova, Ph.D, kairing olih moderator Nyoman Dewi Pebryani, Ph.D sajeroning kuliah tamu ring Ruang Kuliah Umum, Desain Hub ISI BALI, nuju rahina Anggara (3/3).
Sajeroning galah punika, dane nlatarang indik utamanyane diplomasi budaya miwah pendidikan pinaka kreteg anggen ngukuhang paiketan makakalih negara. Ring sajeroning parindikan puniki, seni kamanah pinaka media strategis anggen mwangun dialog lintas budaya, nincapang pamineh, tur mungkah galah kolaborasi kreatif riantara para yowana Bulgaria miwah Indonesia.
Kuliah tamu sane kamoderatori olih Nyoman Dewi Pebryani, Ph.D. punika kasarengin olih satusan mahasisya, saking program sarjana miwah pascasarjana. Para mahasisya piarsanyane dahat mabuat pisan rikala miragiang pemaparan, utamanyane ring sesi diskusi sane maosang indik galah masekolah miwah mobilitas internasional.
Silih sinunggil parindikan sane pinih ngerangsang urati inggih punika galah program beasiswa Erasmus+ anggen masekolah awarsa ring Bulgaria. Program puniki mungkah galah majeng mahasisya Indonesia mangda prasida polih pengalamang akademik miwah budaya ring makudang-kudang universitas ring Bulgaria madasar antuk skema pertukaran utawi studi lanjut.
Wakil Rektor Bidang Kemahasiswaan miwah Kerja Sama ISI BALI, Prof. Dr. Komang Sudirga, sajeroning sambutannyane nyuksmayang pisan rauhne Duta Besar Bulgaria sareng rombongan. Dane nlatarang mungguing rauhne puniki pinaka galah strategis anggen nyobyahang kerja sama internasional ISI BALI, pinih utama ring widang pendidikan miwah kebudayaan.
Manut dane, galah beasiswa Erasmus+ puniki dados galah sane pinih utama majeng mahasisya ISI BALI anggen nincapang perspektif global sinambi makta identitas seni miwah budaya Indonesia ka jagat internasional. Dane mapangapti, parikrama puniki prasida kalanturang antuk kerja sama sane nyata riantara perguruan tinggi ring Bulgaria sareng ISI BALI. (ISIBALI/Humas)
Foto: Rahina kaping tiga Wisuda Sarjana, Sarjana Terapan, Magister, miwah Semester Gasal Warsa Akademik 2025/2026 magenah ring Auditorium Kirtya Sabha Mahottama, ISI Bali, nuju rahina Sukra (27/2)
Institut Seni Indonesia Bali (ISI BALI) ngamargiang upacara inagurasi majeng ring 607 wisudawan sajeroning Wisuda Sarjana, Sarjana Terapan, Magister, miwah Doktor XXXVII, XXXVIII, lan XXXIX ring Semester Gasal Warsa Akademik 2025/2026 sané kalaksanaang tigang rahina, saking rahina Buda nyantos Sukra, 25–27 Februari 2026, magenah ring Auditorium Kirtya Sabha Mahottama, ISI BALI.
Pamargin wisuda sané kalaksanaang tigang rahina puniki pinaka utsaha institusi mangda prasida ngrauhang suasana wisuda sané inklusif miwah anget, ngicénin galah majeng ring para rerama miwah kulawarga wisudawan mangda prasida masanding ring sajeroning genah sané bagia puniki. Ring tengahing pamargin wisuda sané ketahnyané nenten ngicénin kulawarga ngeranjing ka gedung, ISI BALI justru ngabukak panggung sinarengan pinaka cihna rasa angayubagia sareng-sareng ring sajeroning pikolih akademik para lulusan punika.
Foto: Wisuda Sarjana, Sarjana Terapan, Magister, miwah Semester Gasal Warsa Akademik 2025/2026 magenah ring Auditorium Kirtya Sabha Mahottama, ISI BALI.
Ngunggahang tajuk “Satya-Jnana-Sukha” (Kesetiaan–Pengetahuan–Kebahagiaan), wisuda ring galah puniki ngumandhangang sasatya ngerereh kasejatian kaweruhan mabuat kabagiaan sané paripurna. Kaweruhan sané kabaosang nenten wantah pikolih intelektual semata, nanging kasejatian sané mawak seni-desain, madasar antuk inovasi digital mutakhir, saha makohtamain antuk nilai-nilai mautama ring masa sané sampun lintang.
Rektor ISI BALI, Prof. Dr. Wayan ‘Kun’ Adnyana sajeroning sambutannyané maosang, ring semester puniki, ISI BALI ngawisuda 607 wisudawan sané kepah dados 558 lulusan Program Sarjana miwah Sarjana Terapan, 30 lulusan Program Magister, miwah 19 lulusan Program Doktor. Momentum wisuda puniki kadedikasikang pinaka altar pengakuan antuk karahayuan para mahasiswané nuntasang studi antuk rasa tanggung jawab sané ageng. Majeng ring lulusan magister miwah doktor, inagurasi gelar puniki dados mimbar paripurna nyihnayang kepakaran seni, desain, miwah budaya, saha pinaka peneguhan perjuangan nincapang nilai-nilai hakiki kauripan.
Pikolih akademik semester puniki taler kapatri sajeroning rekam jejak kerja sama sané sayan galang. Sawatara 479 mitra bereputasi sané ngeranjing ring ekosistem ISI BALI Berdampak—ngawit saking jagat usaha miwah industri, studio seniman-desainer profesional, nyantos lembaga jejaring global—masikian memajukan institusi. Sangkaning komitmen mebagi kaweruhan autentik miwah cita pemajuan sareng-sareng, ISI BALI ngicen penghargaan Sewaka Kerthi Mahawidya Nugraha sajeroning Pasamuan Widya Mahardika ring rahina Sukra, 20 Februari 2026.
Foto: Wisuda Sarjana, Sarjana Terapan, Magister, miwah Semester Gasal Warsa Akademik 2025/2026 magenah ring Auditorium Kirtya Sabha Mahottama, ISI BALI.
Pinaka tatujun nincapang relevansi, jaminan mutu, miwah daya saing sajeroning kontribusi nuju transformasi sosial, budaya, miwah ekonomi bangsa, ISI BALI ngwangun Kurikulum ISI BALI Berdampak. Kurikulum puniki kaputusang madasar antuk Peraturan Rektor Nomor 3 Warsa 2026 majeng ring Program Sarjana miwah Peraturan Rektor Nomor 4 Warsa 2026 majeng ring Program Sarjana Terapan, sané mamayung ring Peraturan Menteri Diktisaintek Nomor 39 Warsa 2025 ngeninin Penjaminan Mutu Pendidikan Tinggi. Kurikulum punika dados haluan majeng ring para mahasiswa mangda prasida dados seniman, desainer, wirausahawan, peneliti-kritikus, miwah pendidik seni sané berjiwa Pancasila—kreatif, inovatif, bernalar kritis, saha nyunjung nilai kemanusiaan, palemahan, miwah kearifan luhur Indonesia.
Ngiringin pikolih akademik miwah kerja sama, sivitas ISI BALI taler ngrauhang pembaruan genah miwah simbol institusi saking pembangunan ikon-ikon anyar minakadi Tugu Batu, Gerbang Bancingah, Panggung Candi, nyantos Jineng Keluhuran. Sajeroning dudonan Wisuda miwah Dies Natalis kaping-23, ISI BALI taler nyembahang buku ‘Artistika Rupa Paraga’ pinaka sumbangsih keilmuan majeng ring krama akéh.
Prestasi kelembagaan taler nyinahang pamargin punika. Ring panguntat warsa 2025, ISI BALI polih Gold Winner Anugerah Kerja Sama Diktisaintek kategori Kerja Sama Industri Terbaik, Silver Winner Anugerah Humas Diktisaintek, Bronze Winner kategori Kerja Sama Internasional Terbaik, miwah peringkat tiga nasional Nilai Kinerja Anggaran 2025 kategori Perguruan Tinggi Satker.
Pinaka pamuput raosnyané, Prof. Kun Adnyana ngaturang rahajeng majeng ring makasami wisudawan miwah para rerama sangkaning karahayuan nuntasang studi. “Antuk rasa bangga, titiang ngelepas Akademia Cemerlang Dunia. Daya cendikiané ngarum raya, saking mangkin nyantos wekas. Saking rikala tali toga kapindahang ka tengen, para lulusané resmi dados pahan saking kulawarga ageng alumni kebanggan ISI BALI, sayaga ngabdi, makarya, miwah nincapang kauripan antuk seni, desain, miwah budaya,” baos dané. (ISIBALI/Humas)
Foto: Pamungkah Pameran Internasional Bali-Bhuwana Rupa ring ARMA, Ubud, rahina Soma (23/2).
Institut Seni Indonesia Bali (ISI BALI) malih nindihang linggihne dados pusat paunikan seni rupa lan desain global saking kawentenan Bali-Bhuwana Rupa (Global-Bali Art and Design Exhibition) sane mamurda “Adhi-Jnana-Astam” (Mastery–Mind–Marvel). Pameran puniki silih tunggil program seni-desain utama ring sajeroning parikrama Bali Padma Bhuwana VI sane kamargiang olih ISI BALI, tur dados genah matemu pamineh, kreativitas, miwah paetukaran kaweruhan lintas negara.
Pameran puniki kamargiang sangkaning pakilitan sinarengan ring Agung Rai Museum of Arts (ARMA), Ubud miwah Nata-Cita Art Space (N-CAS) ISI BALI, kawitin saking rahina (23/2) nyantos (8/3). Upacara pamungkah kamargiang ring rahina Soma (23/2) magenah ring ARMA, Ubud, sajeroning kahanan sane ledang tur karemba olih para seniman, akademisi, mahasisya, miwah para pegiat seni.
Foto: Pembukaan Pameran Internasional Bali-Bhuwana Rupa di ARMA, Ubud, Senin (23/2)
Pameran internasional puniki mamamerang paukudan seni saking 180 seniman miwah desainer utama saking Indonesia, Malaysia, Jepang, Korea Selatan, Polandia, Australia, miwah Amerika Serikat. Keberagaman saking genah (geografis) miwah dresta (kultural) punika nincapang spektrum visual sane sugih, ngawit saking seni rupa murni, desain visual, nyantos eksplorasi lintas disiplin sane nyinahang dinamika seni miwah desain kontemporer ring jagate.
Sangkaning konsep, murda “Adhi-Jnana-Astam” puniki mateges pinaka paukudan kawagedan artistik (adhi) sane matunggalan ring dalem kaweruhan (jnana) tur ngawetuang daya cipta sane mautama (astam). Kurasi pameran puniki kamargiang olih Jeon Dongsu (Korea Selatan), Arif Bagus Prasetyo, miwah Warih Wisatsana (Indonesia), sane ngeramu narasi kuratorial antuk nindihang kawigunan integrasi pantaraning kawagedan teknis, kanyantayan intelektual, miwah kawanen eksplorasi ring praktik seni miwah desain kontemporer jagate.
Foto: Pamungkah Pameran Internasional Bali-Bhuwana Rupa ring ARMA, Ubud, rahina Soma (23/2).
Pamungkah pameran puniki kalaksanayang olih maesinas seni saking Malaysia, Mohd. Asri Bin Abdul Ghafar, sane nindihang kawigunan pakilitan (kolaborasi) regional miwah internasional sajeroning nincapang jejaring seni tur ngwangun solidaritas kultural antarbangsa. Kawentenan makudang-kudang perwakilan negara ring pameran puniki dados cihna yan seni miwah desain prasida dados titi pangubung paunikan (dialog) sane ngelintangin wates geografis miwah pabinayan dresta (budaya). Rektor ISI BALI, Prof. Dr. Wayan ‘Kun’ Adnyana, sajeroning sambrama wacanandané maosang yan Bali-Bhuwana Rupa puniki dados genah matemu pamineh miwah refleksi ngenenin indik limbak seni global ring sajeroning perspektif Bali. Dané nindihang komitmen ISI BALI sajeroning ngwangun ekosistem seni sane inklusif, progresif, tur madasar antuk kearifan lokal, sinambi adaptif nuju pangobahan zaman. Melarapan pameran puniki, ISI BALI mautsaha nunggalang jagat sareng Bali, miwah Bali sareng jagat, sajeroning siki parikrama kreativitas sane mateges tur berkelanjutan. (ISIBALI/Humas)
